പെട്രോളിലും വൈദ്യുതിയിലും ഓടുന്ന ഒരു നാലുചക്രവാഹനം! ആകെ നിര്‍മ്മാണച്ചെലവ് വെറും 7,500 രൂപ!
പെരിന്തല്‍മണ്ണയില്‍ അധ്യാപകരായ കൊടശേരി സെയ്തലവി-റജീന ദമ്പതികളുടെ മകന്‍ മുഹമ്മദ് ഷിബിന്‍ വാഹനക്കമ്പക്കാരനാണ്. ഷിബിന്റെ ഏറെനാളത്തെ ആഗ്രഹമായിരുന്നു ഒരു സാഹസിക വാഹനം ഉണ്ടാക്കുകയെന്നത്. പ്ലസ്ടുവില്‍ ഉന്നതവിജയംകൂടി നേടിയതോടെ ആ മോഹത്തിനു വീട്ടുകാരില്‍നിന്നുള്ള അനുമതി കിട്ടി. അങ്ങനെ അവനെ അവന്റെ ഇഷ്ടത്തിനുവിട്ടപ്പോള്‍ 20 ദിവസം കൊണ്ട്് അവന്‍ നിര്‍മ്മിച്ചു ഒരു സ്വപ്നവാഹനം! അതും നിരത്തിലോടുന്ന കാറുകളുടെ സാങ്കേതികവിദ്യക്കു തുല്യമായത്.
ഇരുമ്പുകമ്പികളും തകിടും ഉപയോഗിച്ചുള്ള പ്ലാറ്റ്ഫോമില്‍ വീട്ടിലെ പഴയ ബൈക്കിന്റെ എന്‍ജിന്‍ ഘടിപ്പിച്ചു. ബാക്കി ഭാഗങ്ങള്‍ പഴയ വാഹനങ്ങളുടെ സാധനങ്ങള്‍ വില്‍ക്കുന്ന കടയില്‍നിന്നുവാങ്ങി. ബൈക്കില്‍നിന്നെടുത്ത വയറിങ്ങെടുത്ത് അതില്‍ രൂപമാറ്റം വരുത്തി അതും വാഹനത്തിനൊപ്പം ചേര്‍ത്തു. വെല്‍ഡിങ് ഉള്‍പ്പെടെ നിര്‍മാണപ്രവര്‍ത്തനങ്ങളെല്ലാം സ്വയം ചെയ്തതിനാല്‍ വാഹനത്തിന്റെ ആകെച്ചെലവ്് 7,500 രൂപയിലൊതുങ്ങി.
പെട്രോളിന് 40 കിലോമീറ്റര്‍ വരെ മൈലേജ് ലഭിക്കുമെന്ന് ഷിബിന്‍ പറയുന്നു. ഹൈബ്രിഡ് സാങ്കേതികവിദ്യകൂടി ചേര്‍ത്തതിനാല്‍ വാഹനത്തിന്റെ പെട്രോള്‍ തീര്‍ന്നാലും പേടിക്കേണ്ട, ഇലക്ട്രിക് മോട്ടോറിന്റെ സഹായത്തോടെ രണ്ടു മണിക്കൂര്‍കൂടി വാഹനം സഞ്ചരിക്കും. ബൈക്കിന്റെ എന്‍ജിനിലാണ് ഓടുന്നതെങ്കിലും ഇലക്ട്രിക് മോട്ടോര്‍ ഉള്ളതിനാല്‍ വാഹനം റിവേഴ്സ് ഗിയറില്‍ പിന്നോട്ട് എടുക്കാന്‍ കഴിയും. സ്റ്റിയറിങ്ങിന് ഓട്ടോമാറ്റിക് റിട്ടേണ്‍ സിസ്റ്റവുമുണ്ട്.
നാലു ലിറ്ററാണ് പെട്രോള്‍ ടാങ്കിന്റെ ശേഷി. ഒന്നര ലിറ്ററാകുന്നതോടെ റിസര്‍വിലെത്തും. പരിസര മലിനീകരണം കുറയ്ക്കാനായി ഇലക്ട്രിക് ചാര്‍ജ് ഉപയോഗിച്ച് വാഹനം ചലിപ്പിക്കാമെന്നതും പ്രത്യേകതയാണ്. കോമ്പി ബ്രേക്ക്, എ.ബി.എസ്, ഹൈബ്രിഡ് മോട്ടോറില്‍ സെല്‍ഫ് സ്റ്റാര്‍ട്ടിങ് എന്നിവ ഉള്‍പ്പെടുത്തുകയാണ് ഇനിയുള്ള ലക്ഷ്യം. സഹോദരന്‍ മുഹമ്മദ് സിജിലാണു നിര്‍മാണത്തിലെ സഹായി.
പരിയാപുരം സെന്റ് മേരീസ് ഹയര്‍സെക്കന്‍ഡറി സ്‌കൂളില്‍നിന്ന് 99 ശതമാനം മാര്‍ക്കോടെയാണ് ഷിബിന്‍ പ്ലസ്ടു സയന്‍സ് പാസായത്. നേരത്തേ ഹൈഡ്രോളിക് എസ്‌കവേറ്റര്‍, ഇലക്ട്രിക് എന്‍ജിന്‍, ഹവര്‍ ബോര്‍ഡ്, ഇലക്ട്രിക് സൈക്കിള്‍ എന്നിവയും ഷിബിന്‍ നിര്‍മിച്ചിരുന്നു. കുസാറ്റില്‍ മെക്കാനിക്കല്‍ എന്‍ജിനീയറിങ് പഠിക്കാനാണ് ആഗ്രഹം.
https://www.facebook.com/Malayalivartha
