യുക്തിക്കു നിരക്കുന്ന കാരണങ്ങള്‍ ഒന്നും പറയാനില്ലാതെ ഏതിനോടെങ്കിലും തോന്നുന്ന ഭയങ്ങളെയാണ് ഫോബിയകള്‍ എന്നുപറയുന്നതെന്ന് നമുക്കറിയാം. ഉദാഹരണത്തിന് തുറസ്സായ സ്ഥലങ്ങളെക്കുറിച്ചുള്ള ഭയമാണ് അഗറോഫോബിയ. ഹൈഡ്രോഫോബിയ എന്നത് ദ്രാവകങ്ങളോടുള്ള ഭയവുമാണ്. ഇങ്ങനെ പല തരത്തിലുള്ള ഫോബിയകളുണ്ട്.

യു.കെ. യില്‍ മെയ്ഡന്‍ഹെഡ് എന്ന സ്ഥലത്തെ ഒരു ടി.വി. പ്രൊഡ്യൂസറായ 31-കാരനായ ആന്‍ഡ്രൂ ബുളേളാക്കിനും ഒരു ഫോബിയ ഉണ്ട്. സോകൊളേറ്റോ ഫോബിയ എന്ന ഈ സ്ഥിതിവിശേഷത്തില്‍ ചോക്ലേറ്റിനോടാണ് ഭയമുള്ളത്. കേട്ടാല്‍ ചിരി വരുന്നുണ്ടോ? എന്നാല്‍ നിസ്സാരമായി കരുതേണ്ട. ഇതുകാരണം ആന്‍ഡ്രൂ ബുള്ളോക്ക് അനുഭവിക്കുന്ന ബുദ്ധിമുട്ട് ചില്ലറയൊന്നുമല്ല.

ചോക്ലേറ്റിലേയ്ക്ക് നോട്ടം ചെന്നുപെട്ടാല്‍ തന്നെ ബുള്ളോക്കിന് അസ്വസ്ഥതകള്‍ തുടങ്ങും. അറിയാതെയെങ്ങാനും അതിലൊന്നു തൊട്ടുപോയാല്‍ എത്ര തവണ കൈ കഴുകിയാലും വൃത്തിയായി എന്നു തോന്നില്ല. വീണ്ടും വീണ്ടും കഴുകിക്കൊണ്ടേയിരിക്കും. \'വൃത്തിമാനിയ\' പിടിച്ച വൃത്തിക്കാരനൊന്നുമല്ല ബുള്ളോക്ക്. കൈയ്യിലോ കാലിലോ ഒക്കെ ചെളിയോ മറ്റെന്തെങ്കിലുമൊക്കെയോ പറ്റിപ്പിടിച്ചാല്‍ അത് ഒരു തവണ കഴുകിക്കളഞ്ഞാല്‍ പിന്നെ അതേക്കുറിച്ചോര്‍ക്കാറില്ല. എന്നാല്‍ ചോക്ലേറ്റിന്റെ കാര്യത്തില്‍ അങ്ങനല്ല കാര്യം.

ചോക്ലേറ്റ് വില്‍ക്കാന്‍ വച്ചിരിക്കുന്ന കടകള്‍ക്കു മുന്നിലൂടെ പോകാന്‍ അയാള്‍ക്കാവില്ല. അതുകൊണ്ട് ഈസ്റ്റര്‍, ക്രിസ്തുമസ് കാലങ്ങളിലൊന്നും റോഡിലിറങ്ങാനേ വയ്യാത്ത സ്ഥിതിയാണ്. ബുള്ളോക്കിന്റെ സാമൂഹ്യജീവിതത്തെ കാര്യമായി ബാധിച്ചിട്ടുണ്ട് ഈ ഫോബിയ. പാര്‍ട്ടികളിലൊന്നും പങ്കെടുക്കാനേ തോന്നാറില്ല. എന്തു പാര്‍ട്ടിയാണെങ്കിലും ഏതെങ്കിലും ചോക്ലേറ്റ് ഇനങ്ങള്‍ അവിടെയുണ്ടാകുമെന്ന് അയാള്‍ക്കറിയാം.

ചോക്ലേറ്റ് നിന്നെ എന്തുചെയ്യും അതിനെക്കുറിച്ചോര്‍ത്ത് ഇത്ര പേടിക്കാന്‍ എന്ന് ആരെങ്കിലും ചോദിച്ചാല്‍, ഒരു അടിസ്ഥാനവുമില്ലാത്ത ഭയമാണതെന്ന് ആന്‍ഡ്രൂ ബുള്ളോക്ക് സമ്മതിക്കും. എന്നാലും ചോക്ലേറ്റ് കാണുമ്പോള്‍ത്തന്നെ വല്ലാത്ത വല്ലായ്മ തുടങ്ങുമെന്നത് സത്യമാണ് താനും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha