സിങ്കത്തിന് പുതിയ റെക്കോര്ഡ്... എട്ടു മാസത്തിനുള്ളില് കണ്ടെത്തിയത് മുപ്പത്തിയൊന്നര കോടി രൂപയുടെ വൈദ്യുതി മോഷണം
അങ്ങനെ സാക്ഷാല് സിങ്കം സടകുടഞ്ഞെണീറ്റതോടെ വൈദ്യുതി വിഐപി കള്ളന്മാര് കുടുങ്ങി. ഫലമോ, സിങ്കത്തിന് പുതിയ റെക്കോര്ഡും. വൈദ്യുതി മോഷണം പിടിക്കുന്നതിലാണ് കെഎസ്ഇബി ചീഫ് വിജിലന്സ് ഓഫിസറായ ഋഷിരാജ് സിങ് റെക്കോര്ഡ് കുറിക്കുന്നത്. ചുമതലയേറ്റ് എട്ടു മാസത്തിനുള്ളില് മുപ്പത്തിയൊന്നര കോടി രൂപയുടെ ( 31.57 കോടി ) വൈദ്യുതി മോഷണമാണ് കണ്ടെത്തിയത്.
മോഷണവും തിരിമറിയും നടത്തുന്നതില് എറണാകുളം ജില്ലയിലെ വ്യവസായ കൊറിഡോറാണ് മുന്പന്തിയിലെന്ന് ഋഷിരാജ് സിങ്പറഞ്ഞു. കൊല്ലം, പാലക്കാട് ജില്ലകളാണ് തൊട്ടുപിന്നില്.
ഏറ്റവും കൂടുതല് പിഴ ഈടാക്കിയത് ഇക്കഴിഞ്ഞ മാര്ച്ചിലാണ് 5.98 കോടി രൂപ. ഏപ്രില് മാസം 3. 73 കോടി രൂപ ഈടാക്കി. കഴിഞ്ഞ വര്ഷം സെപ്റ്റംബര് മുതല് പ്രതിമാസം ശരാശരി നാലു കോടി രൂപ ഈടാക്കിയിട്ടുണ്ട്. വൈദ്യുതി മോഷണത്തില് വന്കിട സ്ഥാപനങ്ങള് മുതല് രാഷ്ട്രീയ നേതാക്കള് വരെ പ്രതിസ്ഥാനത്തുണ്ടെന്ന് ഋഷിരാജ് സിങ് പറഞ്ഞു.
വൈദ്യുതി മോഷണം കണ്ടെത്തുന്ന കാര്യത്തിലും പിഴ ചുമത്തുന്ന കാര്യത്തിലും വകുപ്പു മന്ത്രിയായ ആര്യാടന് മുഹമ്മദ് പൂര്ണ സ്വാതന്ത്യ്രം തന്നിട്ടുണ്ട്. ഇടപെടലൊന്നുമില്ല. ഇക്കാര്യത്തില് ഇടപെട്ട് ഒരു ഫോണ് കോള് പോലും ഇന്നു വരെ മന്ത്രിയില് നിന്നോ, ഓഫിസില് നിന്നോ വന്നിട്ടുമില്ല. ഇക്കാര്യങ്ങള് നന്നായി മുന്നോട്ട് പോകുന്നതില് 101 ശതമാനം മാര്ക്കും അദ്ദേഹത്തിന് കൊടുക്കാമെന്നും ഋഷിരാജ് സിങ് പറഞ്ഞു.
മോഷണവും തിരിമറിയും പല രൂപത്തിലാണ് നടക്കുന്നത്. താരിഫ് ഏറ്റവും കുറഞ്ഞ കാര്ഷിക കണക്ഷനില് (യൂണിറ്റിന് രണ്ടു രൂപ മാത്രം ) നിന്ന് വീട്ടാവശ്യത്തിന് ഉപയോഗിക്കുക, വീട്ട് കണക്ഷനില് നിന്ന് നിരക്ക് കൂടിയ വാണിജ്യാവശ്യത്തിന് (ബിസിനസ്, ഓഫീസ് കാര്യങ്ങള്) ഉപയോഗിക്കുക, മീറ്ററുകളില് തിരിമറി നടത്തി വന്തോതില് വൈദ്യുതി മോഷ്ടിക്കുക തുടങ്ങിയ കുറ്റകൃത്യങ്ങള് എല്ലാ ജില്ലകളില് നിന്നും വ്യാപകമായി പിടിച്ചതായി ഋഷിരാജ് സിങ് പറഞ്ഞു.
വൈദ്യുതി മോഷണങ്ങള് സംബന്ധിച്ച് വിവരങ്ങള് നല്കുന്നവര്ക്ക് , വിവരത്തിന്റെ അടിസ്ഥാനത്തില് പിടി കൂടിയ വൈദ്യുതി മോഷണത്തിന്മേല് ലഭിച്ച അധിക പിഴയുടെ അഞ്ചു ശതമാനമോ, 50,000 രൂപയോ ഏതാണ് കുറവെന്നാല് ആ തുക പാരിതോഷികമായി നല്കുമെന്നും വിവരം നല്കുന്നവരുടെ പേരു വിവരം രഹസ്യമായി സൂക്ഷിക്കുമെന്നും അദ്ദേഹം ഉറപ്പു നല്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha