ബാണാസുര സാഗര് അണക്കെട്ടുണ്ടായപ്പോള് ഇല്ലാതായ പഞ്ചായത്ത്: തരിയോട്, തരിയോട് പഞ്ചായത്തിലെ 2 വാര്ഡുകള് പൂര്ണമായും ഒരു വാര്ഡ് ഭാഗികമായും വെള്ളത്തിനടിയിലായി!
ബാണാസുര സാഗര് അണക്കെട്ടുണ്ടാക്കുന്നതിനായി തരിയോട് പട്ടണവും ചേര്ന്നുള്ള കൃഷിഭൂമിയും ജനവാസകേന്ദ്രങ്ങളമുള്പെടെ 1306.73 ഹെക്ടര് ഭൂമിയാണ് ഏറ്റെടുത്തത്. 1984-ഓടെ ആദ്യഘട്ട ഒഴിപ്പിക്കല് പൂര്ത്തിയായി. അധികം വൈകാതെ കുടിയേറ്റക്കാരുടെ വാഗ്ദത്തഭൂമിയാകെ അണക്കെട്ടിനുള്ളിലായി. തരിയോട് പഞ്ചായത്തിലാണു ജലാശയമെങ്കിലും തരിയോട് എന്ന പട്ടണം ഇന്നില്ല. ബാണാസുര റിസര്വോയറിനുള്ളിലായി പഴയ തരിയോട് പഞ്ചായത്ത്...സര്ക്കാര് രേഖകളിലും ഓഫിസുകളുടെയും സ്ഥാപനങ്ങളുടെയും പേരിലും നാട്ടുകാരുടെ ഓര്മകളിലും മാത്രമാണ് ഇപ്പോള് തരിയോടിനു സ്ഥാനം.
ആ നാട്ടില് അവസാനമായി തിരഞ്ഞെടുപ്പ് നടന്നത് 1989-ലാണെന്ന് പഴയ തരിയോട് പഞ്ചായത്ത് പ്രസിഡന്റ് എം.പി. മുസ്തഫ ഓര്ക്കുന്നു. അന്നത്തെ തരിയോട് പഞ്ചായത്തിലെ 2 വാര്ഡുകള് പൂര്ണമായും ഒരു വാര്ഡ് ഭാഗികമായും വെള്ളത്തിനടിയിലായി. അവസാന തിരഞ്ഞെടുപ്പില് തരിയോട് സ്കൂളിലും വോട്ടെടുപ്പ് നടന്നിരുന്നു. കുറച്ചു മാസങ്ങള്ക്കുള്ളില് എല്ലാം വെള്ളത്തിനടിയിലായി. കുന്നും സമതലവുമെല്ലാം നിറഞ്ഞ പ്രദേശമായിരുന്നു. വോട്ടഭ്യര്ഥിച്ച് ഞങ്ങളെല്ലാം ഏറെ ഓടിനടന്ന നാട്- മുസ്തഫ പറയുന്നു.
മണ്ണില് സ്വര്ണം വിളയിച്ചവരുടെ നാട് എന്ന പേര് അക്ഷരാര്ഥത്തില്ത്തന്നെ തരിയോടിനു വിശേഷണമാകും. മണ്ണിനെ പൊന്നാക്കിയ കുടിയേറ്റക്കാരുടെ സ്വര്ഗഭൂമിയായിരുന്നു തരിയോട്. അതിനു മുന്പ് ബ്രിട്ടിഷുകാര് ഇവിടെ സ്വര്ണഖനനം നടത്തിയിരുന്നതും ചരിത്രം. ബ്രിട്ടിഷ് മലബാറിന്റെ ഭാഗമായിരുന്ന വയനാട്ടില് വെള്ളക്കാര് ഖജനാവ് സ്ഥാപിക്കാന് തിരഞ്ഞെടുത്തതും തരിയോടിനെത്തന്നെ.
ടിപ്പു സുല്ത്താന് നിര്മിച്ച കുതിരപ്പാണ്ടി റോഡിന്റെ 7 കിലോമീറ്റര് ഇപ്പോള് വെള്ളത്തിനടിയിലാണ്. ഈ വഴിയാണ് സ്വര്ണനിക്ഷേപം തേടി യൂറോപ്യന്മാര് എത്തിയതും. ബ്രിട്ടന് ഇന്കോര്പറേറ്റ് ഗോള്ഡ് മൈന്സ് ഇന്ത്യ എന്ന കമ്പനിയാണ് ഇവിടെ ഖനനം നടത്തിയത്. മഞ്ഞനിറമുള്ള മണ്ണില്നിന്നു പക്ഷേ, ആവശ്യത്തിനു സ്വര്ണം വേര്തിരിച്ചെടുക്കാനായതോടെ കമ്പനി പൂട്ടിപ്പോയി. ഖനിമുതലാളി സ്ഥാപനം ഡൈനാമിറ്റ് വച്ച് തകര്ത്ത് സ്വയം വെടിയുതിര്ത്തു മരിച്ചെന്നും കഥ. അക്കാലത്ത് ഖനിത്തൊഴിലാളികള് തുരന്നെടുത്ത സ്വര്ണഗുഹകള് ഇപ്പോഴും ഇവിടെ കാണാം.
നാലുവര്ഷത്തിനുള്ളില്, 1982-ല് ആരംഭിച്ച കുടിയൊഴിപ്പിക്കല് പൂര്ണമായി. സ്കൂള്, പോസ്റ്റ് ഓഫിസ്, കൃഷിഭവന്, ഡിസ്പെന്സറി, കാപ്പിഡിപ്പോ, ക്ഷീരസംഘം തുടങ്ങിയവയെല്ലാം മറ്റു സ്ഥലങ്ങളില് പ്രവര്ത്തനം തുടങ്ങി. തരിയോട് പൊലീസ് സ്റ്റേഷന് പേരുമാറി പടിഞ്ഞാറത്തറയിലേക്കു പറിച്ചുനട്ടു. തരിയോട് പഞ്ചായത്ത് ഓഫിസ് ആദ്യം കാപ്പുവയലിലേക്കും പിന്നീട് കാവുംമന്ദത്തേക്കും മാറ്റി.
https://www.facebook.com/Malayalivartha