ആന്തരികാവയവങ്ങള് ചുരുങ്ങി; ഭക്ഷണം തൊണ്ടയില് നിന്ന് ഇറങ്ങിയതിന്റെ ലക്ഷണം പോലുമില്ല; പൊടിയന്റെത് പട്ടിണി മരണം തന്നെ; ഉറപ്പിക്കാന് ആന്തരികാവയവങ്ങള് രാസപരിശോധനയ്ക്കയച്ചു; അസ്വാഭാവിക മരണത്തിന് പോലീസ് കേസ് എടുത്തു; മകനെ അറസ്റ്റു ചെയ്യാന് സാധ്യത
ഭക്ഷണവും വെള്ളവും ലഭിക്കാതെ തന്നെയാണ് വണ്ടന്പതാല് അസംബനി തൊടിയില് വീട്ടില് പൊടിയന് (80) മരിച്ചത്. പ്രാഥമിക പോസ്റ്റ്മോര്ട്ടം റിപ്പോര്ട്ട് വിരല് ചുണ്ടുന്നത് ഇതിലേക്ക് തന്നെയാണ്. ആന്തരികാവയവങ്ങള് ചുരുങ്ങിയിരുന്നതായും ഭക്ഷണം തൊണ്ടയില് നിന്ന് ഇറങ്ങിയതിന്റെ ലക്ഷണങ്ങളില്ലെന്നും കണ്ടെത്തി. പട്ടിണി മരണമാണോ എന്ന് ഉറപ്പിക്കാന് ആന്തരികാവയവങ്ങള് രാസപരിശോധനയ്ക്കയച്ചു. ഏറെ ദിവസം പൊടിയന് ഭക്ഷണം കഴിച്ചിട്ടില്ലെന്ന് സ്ഥിരീകരിക്കുന്നതാണ് പ്രാഥമിക പോസ്റ്റ്മോര്ട്ടം റിപ്പോര്ട്ട്.
കൂടുതല് രാസപരിശോധന നടത്തുന്നതിലൂടെ പൊടിയന് ഭക്ഷണം കഴിക്കാവുന്ന അവസ്ഥിയിലായിരുന്നോ എന്നും വ്യക്തമാകും. ചൊവ്വാഴ്ചയാണ് പൊടിയനെയും ഭാര്യ അമ്മിണിയെയും ആശാവര്ക്കര്മാര് വീട്ടില് അവശനിലയില് കണ്ടെത്തിയത്. ഇളയ മകന് റെജിയോടൊപ്പമാണ് വൃദ്ധ മാതാപിതാക്കള് താമസിച്ചിരുന്നത്. ഇരുവരെയും ആശുപത്രിയിലേക്ക് മാറ്റിയെങ്കിലും പൊടിയന് മരിച്ചു. അവശനിലയിലായ അമ്മിണി മാനസികാസ്വാസ്ഥ്യം പ്രകടിപ്പിച്ചതോടെ കോട്ടയം മെഡിക്കല് കോളജിലേക്ക് മാറ്റി. മകന് റെജി മാതാപിതാക്കള്ക്ക് ഭക്ഷണം നല്കിയിരുന്നില്ലെന്നാണ് നാട്ടുകാരുടെ ആരോപണം.
സഹായമായി എത്തുന്നവരെ വിരട്ടിയോടിക്കാന് പട്ടിയെ വീട്ടില് കെട്ടിയിട്ടിരുന്നു. ചൊവ്വാഴ്ച മാതാപിതാക്കളെ ആശുപത്രിയിലേക്കു മാറ്റുമ്പോള് റെജി വീട്ടിലുണ്ടായിരുന്നു. വിശദമായ ഫൊറന്സിക് പരിശോധനയ്ക്കു ശേഷമുള്ള പോസ്റ്റ്മോര്ട്ടം റിപ്പോര്ട്ട് ലഭിക്കുന്ന മുറയ്ക്ക് തുടര് നടപടികള് സ്വീകരിക്കാനാണ് പോലീസിന്റെ തീരുമാനം. നാട്ടുകാരുടെയും ചികിത്സയില് കഴിയുന്ന അമ്മിണിയുടെയും വിശദമായ മൊഴികള് ശേഖരിക്കും.
ഇന്നലെയാണ് വൃദ്ധ ദമ്പതികളോട് മക്കള് കാണിച്ച ക്രൂരത മാധ്യമങ്ങളിലൂടെ പുറംലോകമറിഞ്ഞത്. ഭക്ഷണവും മരുന്നും നല്കാതെ ദിവസങ്ങളോളം ഇവരെ മുറിയില് ഒറ്റപ്പെടുത്തിയ മകന്, ദമ്പതികള് കിടക്കുന്ന കട്ടിലില് പട്ടിയെയും കെട്ടിയിട്ടു. ഭക്ഷണം ലഭിക്കാതെ അവശനായ അച്ഛന് പൊടിയനെ ആരോഗ്യപ്രവര്ത്തകരും പോലീസും ചേര്ന്ന് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
ഇദ്ദേഹത്തിന്റെ മരണത്തില് പോലീസ് അസ്വാഭാവിക മരണത്തിന് കേസെടുത്തിട്ടുണ്ട്. പ്രഥമിക പോസ്റ്റ്മോര്ട്ടം വന്ന സ്ഥിതിക്ക് മകനെ പ്രതിചേര്ത്ത് അറസ്റ്റുണ്ടായേക്കുമെന്നാണ് പോലീസ് വൃത്തങ്ങള് നല്കുന്ന സൂചന. ദമ്പതികളുടെ ഈ ദാരുണാവസ്ഥ ആശാ പ്രവര്ത്തകര് അറിയിച്ചതിനെ തുടര്ന്നാണ് ജനപ്രതിനിധികളുടേയും പോലീസിന്റെയും ശ്രദ്ധയില് പെട്ടത്. വിവരമറിഞ്ഞെത്തിയ ജനപ്രതിനിധികളെയും ആരോഗ്യ പ്രവര്ത്തകരെയും വീട്ടിനുള്ളിലേക്ക് കടക്കുന്നതില് നിന്നും വീട്ടുകാര് തടഞ്ഞു. തുടര്ന്ന് പൊലീസ് സഹായത്തോടെയാണ് വീടിന് ഉള്ളിലേക്ക് കയറിയതെന്ന് ജനപ്രതിനിധികള് പറഞ്ഞു. മാനസികാസ്വാസ്ഥ്യം പ്രകടിപ്പിച്ച വൃദ്ധമാതാവിനെ കോട്ടയം മെഡിക്കല് കോളേജില് പ്രവേശിപ്പിച്ചിരിക്കുകയാണ്.
https://www.facebook.com/Malayalivartha