ഒരു കല്യാണ മണ്ഡപത്തിലെ സംഭവങ്ങളാണ് ഇപ്പോൾ സോഷ്യൽമീഡിയയിൽ വൈറലായി മാറുന്നത്. കണക്കിലെ ഗുണനപ്പട്ടികയ്ക്ക്​ വൈവാഹിക ജീവിതത്തില്‍ വല്ല റോളും ഉ​ണ്ടോ എന്ന്​ ചോദിച്ചാല്‍ ഉണ്ടെന്നാണ്​ ഉത്തര്‍ പ്രദേശിലെ മഹോബ ജില്ലക്കാരനായ യുവാവിന്​ പറയാനുള്ളത്​.

ശനിയാഴ്ചയായിരുന്നു​ വരനും സംഘവും വിവാഹത്തിനെത്തിയത്​​. വരന്‍റെ വിദ്യാഭ്യാസ യോഗ്യതയില്‍ സംശയം തോന്നിയ പ്രതിശ്രുത വധു ലളിതമായ ഒരു കണക്ക്​ പരീക്ഷ മുന്നോട്ടു വെക്കുകയായിരുന്നു. അക്കം രണ്ടിന്‍റെ ഗു​ണനപ്പട്ടിക ചൊല്ലാനായിരുന്നു ആവശ്യം.

വരന്‍​ പരീക്ഷയില്‍ പരാജയപ്പെട്ടതോടെ വിവാഹം മുടങ്ങി. മഹോബ ജില്ലയിലെ ധാര്‍വാര്‍ ഗ്രാമത്തിലാണ്​ സംഭവം​.ഇരു കുടുംബത്തിലെയും അംഗങ്ങളും ഗ്രാമീണരും ചടങ്ങിനായി ഒത്തുകൂടിയിരുന്നു.

വിവാഹച്ചടങ്ങുകള്‍ തുടങ്ങാനിരിക്കേ പെണ്‍കുട്ടി മണ്ഡപത്തില്‍ നിന്ന്​ ഇറങ്ങിപോകുകയായിരുന്നു. ഗണിതത്തിന്‍റെ ബാലപാഠങ്ങള്‍ പോലും അറിയാത്ത ഒരാളെ തനിക്ക്​ വേണ്ടെന്ന്​ പറഞ്ഞായിരുന്നു പെണ്‍കുട്ടി വിവാഹം വേണ്ടെന്ന്​ വെച്ചത്​.

കുടുംബാംഗങ്ങളും സുഹൃത്തുക്കളും പിന്തിരിപ്പിക്കാന്‍ ശ്രമിച്ചെങ്കിലും പരാജയപ്പെട്ടു. 'വരന്‍റെ കുടുംബം അയാളുടെ വിദ്യാഭ്യാസ യോഗ്യത മറച്ചുവെക്കുകയായിരുന്നു. അയാള്‍ സ്​കൂളിന്‍റെ പടി പോലും കടന്നിട്ടുണ്ടാകില്ല.

വരന്‍റെ കുടുംബം ഞങ്ങളെ ചതിച്ചു. സാമൂഹത്തിന്‍റെ കുറ്റപ്പെടുത്തലുകളും മറ്റും മാനിക്കാതെ എന്‍റെ ധീരയായ സഹോദരി വിവാഹം വേണ്ടെന്ന്​ വെച്ചു' -വധുവിന്‍റെ ബന്ധുവായ പെണ്‍കുട്ടി പറഞ്ഞു.

ഇരു കുടുംബങ്ങളും ചേര്‍ന്ന്​ വിഷയം ഒത്തുതീര്‍പ്പാക്കിയതിനാല്‍ പൊലീസ്​ കേസ്​ രജിസ്റ്റര്‍ ചെയ്​തില്ല. പരസ്​പരം നല്‍കിയ ആഭരണങ്ങളും സമ്മാനങ്ങളും തിരികെ നല്‍കാമെന്ന വ്യവസ്​ഥയിലായിരുന്നു ഒത്തുതീര്‍പ്പ്​.