നടന്നത് ഉഭയ സമ്മത പ്രകാരമുള്ള ലൈംഗിക ബന്ധം... പ്രതിയെ വിവാഹം കഴിക്കാൻ തയ്യാർ! റോബിന്‍ വടക്കുംചേരിയെ വിവാഹം കഴിക്കുവാനുള്ള അനുമതി തേടി പെണ്‍കുട്ടി സുപ്രീംകോടതിയിലേക്ക് .

കൊട്ടിയൂർ പീഡനക്കേസിൽ പ്രതിയായ മുൻ വൈദികൻ റോബിൻ വടക്കുംചേരിയെ വിവാഹം കഴിക്കണമെന്ന ആവശ്യമാണ് പെൺകുട്ടി ഉയർത്തിയിരിക്കുന്നത്. വിവാഹം കഴിക്കാനുള്ള തീരുമാനം സ്വന്തം ഇഷ്ടപ്രകാരമാണെന്ന് ഇര സുപ്രീം കോടതിയിൽ സമർപ്പിച്ച ഹർജിയിൽ പറഞ്ഞിരിക്കുന്നു . ഇരയുടെ ആവശ്യം ജസ്റ്റിസുമാരായ വിനീത് ശരൺ, ദിനേശ് മഹേശ്വരി എന്നിവർ അടങ്ങിയ സുപ്രീം കോടതി ബെഞ്ച് ആണ് പരിഗണിക്കുന്നത്.

ഉഭയ സമ്മത പ്രകാരമുള്ള ലൈംഗിക ബന്ധമാണ് പ്രതിയുമായി ഉണ്ടായിരുന്നതെന്ന് ഇര നേരത്തെ തന്നെ ഹൈക്കോടതിയിൽ തുറന്നടിച്ചിരുന്നു. ഇരയേയും കുഞ്ഞിനെയും സംരക്ഷിച്ചുകൊള്ളാമെന്ന് ഫാ. റോബിൻ വടക്കുംചേരിയും ഹൈക്കോടതിയോട് പറഞ്ഞിരുന്നു. എന്നാൽ ഈ വാദം ഹൈക്കോടതി തള്ളി.

ഹൈക്കോടതി ആവശ്യം തള്ളിയതിനെ തുടർന്നാണ് ഇര സുപ്രീം കോടതിയെ സമീപീച്ചത്. തനിക്കും കുഞ്ഞിനും റോബിൻ വടക്കുംചേരിക്ക് ഒപ്പം താമസിക്കാനുള്ള അവസരമൊരുക്കി തരണമെന്ന് സുപ്രീം കോടതിയിൽ ഫയൽ ചെയ്ത ഹർജിയിൽ ആവശ്യം ഉന്നയിച്ചിട്ടുണ്ട്. വിവാഹത്തിനായി റോബിൻ വടക്കുംചേരിക്ക് ജാമ്യം അനുവദിച്ചേ മതിയാകൂ എന്നും ഹർജിയിൽ ആവശ്യപ്പെടുന്നുണ്ട്. അഭിഭാഷകൻ അലക്സ് ജോസഫാണ് ഹർജി ഫയൽ ചെയ്തത്.

സുപ്രീംകോടതിയുടെ മുൻവിധിന്യായങ്ങളുടെ അടിസ്ഥാനത്തിൽ ലൈംഗിക അതിക്രമക്കേസുകളിൽ ഒത്തുതീർപ്പുകളോ വിട്ടുവീഴ്ചയോടുള്ള സമീപനമോ സ്വീകരിക്കാനാകില്ലെന്ന് റോബിൻ വടക്കുംചേരിയുടെ ആവശ്യം തള്ളിക്കൊണ്ട് ഹൈക്കോടതി തുറന്നടിച്ച സാഹചര്യമുണ്ടായി. സംഭവം നടക്കുമ്പോൾ പെൺകുട്ടിക്ക് പ്രായ പൂർത്തിയായിരുന്നില്ല. ഇത് വിചാരണക്കോടതി കണ്ടെത്തിയിരുന്നു .

വിവാഹത്തിന് നിയമപരമായ പവിത്രത നൽകുന്നത് കേസിലെ പ്രധാനവിഷയത്തിൽ മുൻകൂർ തീരുമാനം എടുത്തതിന് തുല്യമാകുമെന്നും ഹൈക്കോടതി കണ്ടെത്തുകയുണ്ടായി. കൊട്ടിയൂർ പീഡന കേസിൽ റോബിൻ വടക്കുംചേരിക്ക് മൂന്ന് വകുപ്പുകളിലായി അറുപത് വർഷത്തെ കഠിനതടവ് ആണ് തലശേരി പോക്സോ കോടതി വിധിച്ചിരിക്കുന്നത്. പക്ഷേ മൂന്നുശിക്ഷയും ഒരുമിച്ച് 20 വർഷത്തെ കഠിന തടവ് അനുഭവിച്ചാൽ മതിയെന്ന വ്യവസ്ഥ വെച്ചിട്ടുണ്ട്. 2016 ലായിരുന്നു കേസിനാസ്പദമായ സംഭവ വികാസങ്ങൾ അരങ്ങേറിയത്. കൊട്ടിയൂർ നീണ്ടുനോക്കി സെയിന്റ് സെബാസ്റ്റ്യൻസ് പള്ളി വികാരി ആയിരുന്ന റോബിൻ വടക്കുംചേരി പള്ളിമേടയിൽ വെച്ച് പ്രായപൂർത്തിയാകാത്ത പെൺകുട്ടിയെ പീഡിപ്പിച്ച് ഗർഭിണിയാക്കുകയായിരുന്നു.