ഉമ്മന്‍ചാണ്ടിയുടെ ഭാവി തുലാസില്‍
സി പി എം ആരംഭിച്ചിരിക്കുന്ന സെക്രട്ടറിയേറ്റ്‌ ഉപരോധം ശക്തമാവുകയാണെങ്കില്‍ ഉമ്മന്‍ചാണ്ടി മുഖ്യമന്ത്രി സ്ഥാനം ഒഴിഞ്ഞേക്കും. ഹൈക്കമാന്റില്‍ നിന്നു തന്നെ ഇത്തരമൊരു നിര്‍ദ്ദേം വരാനാണ്‌ സാധ്യത.
സ്‌ക്കൂളുകള്‍ക്ക്‌ അവധി നല്‍കിയും ഗതാഗതം നിയന്ത്രിച്ചും ജനജീവിതം സ്‌തംഭിപ്പിച്ചും എത്രനാള്‍ തുടരാനാകും എന്ന ഗൗരവമുള്ള ചിന്തയാണ്‌ മുഖ്യമന്ത്രിയെ അലട്ടുന്നത്‌.
ഇതിനിടയില്‍ വരാന്‍ പോകുന്ന ലോകസഭാ തെരഞ്ഞെടുപ്പില്‍ കേരളത്തില്‍ നിന്നും ജയിക്കാനിടയുള്ള പതിനെട്ട്‌ ഇടതു എം പി മാരുടെ പിന്തുണ ഉറപ്പിക്കണമെങ്കില്‍ പ്രകാശ്‌ കാരാട്ടിന്റെ ഇംഗിതത്തിന്‌ വഴങ്ങി ഉമ്മന്‍ചാണ്ടിയെ ഒഴിവാക്കാന്‍ സോണിയാഗാന്ധി നിര്‍ബന്ധിതയാവുമെന്നറിയുന്നു. പ്രകാശ്‌ കാരാട്ട്‌ ഡല്‍ഹിയില്‍ മടങ്ങിയെത്തിയാലുടന്‍ കേരളത്തിലെ സ്ഥിതി വിശേഷം സോണിയയെ ധരിപ്പിക്കും.
ഐ.എന്‍. എസ്‌ വിക്രാന്തിന്റെ നീറ്റിലിറക്കല്‍ ചടങ്ങിന്‌ കേന്ദ്ര പ്രതിരോധമന്ത്രി എ.കെ. ആന്റണി കൊച്ചിയിലുണ്ട്‌. ഇടതുസമരം ശക്തി പ്രാപിക്കുന്നതിനെ കുറിച്ച്‌ കൃത്യമായ വിവരങ്ങളാണ്‌ ആന്റണിക്ക്‌ ലഭിച്ചുകൊണ്ടിരിക്കുന്നത്‌. സമരം തുടങ്ങിയ ദിവസം തന്നെയുള്ള ആന്റണിയുടെ കേരള സാന്നിദ്ധ്യവും ഉമ്മന്‍ചാണ്ടിക്ക്‌ വിനയായേക്കും.
മുഖ്യമന്ത്രിയായിരിക്കെ തന്നെ കേരളത്തില്‍ നിന്നും കെട്ടുകെട്ടിച്ചതില്‍ ഉമ്മന്‍ചാണ്ടിക്കും പ്രമുഖ ഘടകകക്ഷിനേതാക്കള്‍ക്കുമുള്ള പങ്ക്‌ ആന്റണി മറന്നിട്ടില്ല. ജന്‍പഥിലെ സോണിയാഗാന്ധിയുടെ വസതിയില്‍ ആന്റണിയുടെ വാക്കുകള്‍ക്ക്‌ വലിയ വിലയാണ്‌ കല്‌പിക്കപ്പെടുന്നത്‌.
ജുഡീഷ്യല്‍ അന്വേഷണം ആകാമെന്ന ഉമ്മന്‍ചാണ്ടിയുടെ ഉറപ്പ്‌ പ്രതിപക്ഷം കാര്യമായെടുത്തിട്ടില്ല. മുഖ്യമന്ത്രിയുടെ രാജിയും അന്വേഷണവും എന്ന ആവശ്യത്തില്‍ ഉറച്ചുനില്‍ക്കുകയാണ്‌ പ്രതിപക്ഷം.
ഇതിനിടയില്‍ പാളയത്തിലെ പടയും ഉമ്മന്‍ചാണ്ടിയെ വല്ലാതെ വേദനിപ്പിക്കുന്നുണ്ട്‌. തലസ്ഥാനം സമരാഗ്നിയില്‍ കത്തിയമര്‍ന്നിട്ടും നിസംഗനായി നില്‍ക്കുന്ന കെ.പി.സി.സി. പ്രസിഡന്റിന്റെ നിലപാടിലും ഖിന്നനാണ്‌ ഉമ്മന്‍ചാണ്ടി. വേണ്ടി വന്നാല്‍ താന്‍ സ്ഥാനമൊഴിയും എന്ന് അടുപ്പക്കാരോട്‌ ഉമ്മന്‍ചാണ്ടി പറഞ്ഞു കഴിഞ്ഞു.
കുരുവിളയുടെ കേസില്‍ ഹൈക്കോടതിയില്‍ നിന്ന് ഇന്നുണ്ടായ പ്രതികൂല പരാമര്‍ശവും സര്‍ക്കാരിന്‌ ഇരുട്ടടിയായി മാറിയിരിക്കുകയാണ്‌.
https://www.facebook.com/Malayalivartha
