പ്രണയം പലപ്പോഴും വിരഹവേദന സമ്മാനിക്കുമ്പോൾ അതിൽ നിന്നും മനസിനെ മാറ്റിയെടുക്കാൻ ചിലപ്പോൾ ഏറെ സമയം എടുത്തേക്കാം. എന്നിരുന്നാൽ തന്നെയും ആ പ്രണയം എന്നും മനസ്സിൽ തന്നെ ഉണ്ടാകും. എന്നാൽ പഴയ കാമുകന്റെയോ കാമുകിയുടെയോ കുഞ്ഞിനെ തലോടിയിട്ടുണ്ടോ? ഈ ചോദ്യത്തിലൂടെ ഓരോരുത്തരും അനുഭവിക്കേണ്ടിവരുന്ന വികാരത്തിന്റെ ആഴം കുറിപ്പിലൂടെ പങ്കുവയ്ക്കുകയാണ് എഴുത്തുകാരനായ ആസിഫ് തൃശൂർ. പഴയ കാമുകിയെയോ കാമുകനെയോ അല്ല നിങ്ങളവിടെ കാണുകയെന്ന് ആസിഫ് കുറിക്കുകയാണ്.

ഫെയ്സ്ബുക്ക് കുറിപ്പിന്റെ പൂർണരൂപം:

പഴയ കാമുകന്റെ/കാമുകിയുടെ കുഞ്ഞിനെ തലോടിയിട്ടുണ്ടോ. സ്നേഹം എന്നത് മനുഷ്യർ തമ്മിലുള്ള അനേകം വികാരങ്ങളിൽ ഒന്ന് മാത്രമാവുകയും അതിനുമപ്പുറം പേരറിയാത്ത ഒരുപാട് വികാരങ്ങൾ വന്ന് ചുറ്റിപിടിക്കുകയും ചെയ്യും.

പഴയ കാമുകിയെയോ കാമുകനെയോ അല്ല നിങ്ങളവിടെ കാണുക. അവരുടെ പ്രയോരിറ്റികളുടെ ഒത്ത നടുക്ക് ഒരു കുഞ്ഞു മുഖമുണ്ടാവും. എന്റേതാകേണ്ട ഒരുവനെ/ഒരുവളെ കവർന്ന ദേഷ്യത്തിലല്ല നിങ്ങളവരുടെ പങ്കാളിയെ നോക്കുക. അവർ തമ്മിലുള്ള ബന്ധം ദൃഢമാക്കുന്ന ഒരു കുഞ്ഞു നക്ഷത്രം കാണാം. അവന്റെയോ അവളുടെയോ പനിചൂടിൽ അവർ കൂട്ടിരിപ്പുകാരായിരിക്കും.അവരുടെ പ്രതീക്ഷകളുടെ സ്നേഹത്തിന്റെ വേരായിരിക്കും ആ കുഞ്ഞ്. ഒരുപക്ഷെ അന്നത്തെ കുട്ടിത്തമുള്ള പഴയ കാമുകി പക്വതയുള്ളൊരു അമ്മയായി കാണും. പഴയ ക്ഷമയില്ലാത്ത കാമുകൻ കുഞ്ഞിന്റെ വികൃതിക്ക് മുമ്പിൽ ക്ഷമക്കുള്ള ഡിഗ്രി സർട്ടിഫിക്കറ്റ് വാങ്ങി നിൽപ്പുണ്ടാവും.

നിങ്ങളാ കുഞ്ഞിനെ എങ്ങനെ വെറുക്കാനാണ്. ഒന്ന് തലോടുമ്പോൾ ആരാണെന്ന ചോദ്യഭാവത്തിൽ കുഞ്ഞ് നിങ്ങളെ നോക്കും. അതിന് മറുപടി നിങ്ങൾ തിരയേണ്ടി വരില്ല, അച്ഛനോ അമ്മയോ നൽകിക്കോളും. നിങ്ങളാ കുഞ്ഞിനെ ഒന്ന് തലോടുക. എടുത്ത് നോക്കുക. വാത്സല്യത്തോടെ കാലം നെറുകിൽ ഉമ്മ വയ്ക്കുന്നത് ആ കുഞ്ഞിന്റെ ചുണ്ടിലൂടെയാണ്.

നിങ്ങളാ കുഞ്ഞിനെ ലാളിക്കുന്നത് അവരും നോക്കുന്നുണ്ടാവും. ഒരു നിമിഷം നിങ്ങൾക്കിടയിൽ ഉണ്ടായിരുന്ന ദേഷ്യം വറ്റിപോയെന്ന് വരാം. പ്രണയിക്കുന്ന കാലത്ത് ജനിക്കാനിരിക്കുന്ന കുഞ്ഞുങ്ങളെ കുറിച്ച് നിങ്ങൾ തമ്മിൽ സംസാരിച്ചു കാണും.അന്ന് കൊടുക്കാൻ കരുതി വച്ച ഉമ്മകളിലൊന്ന് കൊടുക്കുക. അവരുടെ സന്തോഷങ്ങളുടെ സൂക്ഷിപ്പുകാരനെ ഭദ്രമായി തിരിച്ചു നൽകുക. ഒരു മൂലയിലൂടെ കണ്ണുനീർ ഓടിപിടച്ചു വരുന്നുണ്ടെങ്കിൽ അവർ മുമ്പിൽ നിന്ന് മായുന്നത് വരെയെങ്കിലും പിടിച്ചു നിർത്തണം. എങ്കിലും അതൊരു സുഖമുള്ള അനുഭൂതിയാണ്. കുറച്ചു നേരത്തേക്കെങ്കിലും ആ കുഞ്ഞുറങ്ങുന്നത് നിങ്ങളുടെയും ഹൃദയത്തിലായിരിക്കും.