പേടിപ്പിച്ചു മര്യാദ പഠിപ്പിക്കാന് കാട്ടു വഴിയില് ഇറക്കി വിട്ട് കാണാതായ ജാപ്പനീസ് ബാലനെ ജീവനോടെ കണ്ടെത്തി
അച്ഛനമ്മമാരോടും ചേച്ചിയോടും ഒപ്പം പാര്ക്കില് പോയ ഏഴു വയസ്സുകാരന് യമാറ്റോ ടനൂക്ക, അവിടെ വച്ച് അനുസരണക്കേടു കാട്ടിയതിന് കോപാകുലരായ മാതാപിതാക്കള് മടങ്ങി വരവേ കാടിനുളളിലുള്ള റോഡില് അവനെ ഇറക്കി നിര്ത്തിയിട്ട് 50 അടിയോളം കാറോടിച്ചു പോയി. മിനിട്ടുകള്ക്കുള്ളില് തിരികെ വന്നെങ്കിലും കുട്ടിയെ അവിടെ കണ്ടില്ല. ചുറ്റുപാടും നടന്ന് അവനെ വിളിച്ചു നോക്കിയെങ്കിലും യമാകോയെ കണ്ടില്ല. അന്നു മുതല് അന്വേഷിക്കുന്നതാണ് ആ കുട്ടിയെ കഴിഞ്ഞ ശനിയാഴ്ചയായിരുന്നു അവനെ കാണാതായത്.
കരടികള് ഉള്ള കാട്ടു പ്രദേശമാണത് എന്നതിനാല് കുട്ടിയെ ജീവനോടെ തിരികെ ലഭിക്കുമെന്ന വളരെ നേരിയ സാധ്യതയേ എല്ലാവരും കൊടുത്തിരുന്നുള്ളൂ. സന്നദ്ധ സേവനം നടത്തുന്നവരും പോലീസുമെല്ലാം ആറുദിവസത്തോളം തിരഞ്ഞെങ്കിലും കുട്ടിയെ കുറിച്ച് യാതൊരു വിവരവും ലഭിച്ചില്ല.
തുടര്ന്ന് ബുധനാഴ്ച പട്ടാളത്തിന്റെ സേവനം അഭ്യര്ത്ഥിച്ചു. സൈന്യം രംഗത്തെത്തി ബാലനെ തിരഞ്ഞു തുടങ്ങി. അവരുടെ തെരച്ചിലിനിടെ പട്ടാളക്കാരുടെ പരിശീലന കേന്ദ്രങ്ങളുടെ ഭാഗമായ വന പ്രദേശത്ത് ഉപേക്ഷിക്കപ്പെട്ട ഒരു കുടിലിനുള്ളില് നിന്നും ഇന്നു രാവിലെ 7.50 ഓടുകൂടി അവനെ കണ്ടെത്തുകയായിരുന്നു. യാമാറ്റോയെ മാതാപിതാക്കള് ഇറക്കി വിട്ടിടത്തു നിന്നും 5 കി.മി അകലെയുള്ള കുടിലിലായിരുന്നു അവനെ കണ്ടെത്തിയത്. വനത്തിലൂടെ നടക്കുകയാണെങ്കില് ഏകദേശം 7 കി.മീറ്ററെങ്കിലും നടക്കണം.
അവനെ കാണാതായ ശനിയാഴ്ച രാത്രിയില് തന്നെ അവന് ആ കുടിലിനുള്ളില് അഭയം കണ്ടെത്തിയെന്ന് പരിശീലന സംബന്ധിയായ ആവശ്യത്തിനെത്തിയപ്പോള് അവനെ കണ്ടുപിടിച്ച സൈനികോദ്യോഗസ്ഥനോട് അവന് അറിയിച്ചു. അവിടെയുണ്ടായിരുന്ന മെത്തയും പുതപ്പുമെല്ലാം അവനുപകരിച്ചു. 7 ദിവസം ആഹാരമൊന്നും കിട്ടിയില്ലെങ്കിലും ആ കുടിലിനു പുറത്തുണ്ടായിരുന്ന ടാപ്പില് വെള്ളമുണ്ടായിരുന്നു എന്ന് അവന് പറഞ്ഞു. മെഡിക്കല് ഹെലികോപ്റ്ററില് അവനെ ആശുപത്രിയിലെത്തിച്ച് പരിശോധനകള്ക്കു വിധേയനാക്കി.
7 ദിവസം കാട്ടില് ഒറ്റപ്പെട്ടതിന്റെ യാതൊരു പരിഭ്രാന്തിയും ആ ബാലനുണ്ടായിരുന്നില്ലെന്നത് ഡോക്ടറെ അതിശയിപ്പിച്ചു. ശരീര താപനില അല്പം കുറവായിരുന്നു എന്നതൊഴിച്ചാല് യാതൊരു ആരോഗ്യ പ്രശ്നങ്ങളും അവനില്ലെന്ന് മെഡിക്കല് അധികൃതര് അറിയിച്ചു.
പിന്നീട് മാതാപിതാക്കളെ കണ്ടപ്പോള് അവന്റെ പിതാവ് ടകായുകി ടനൂക്കാ പറഞ്ഞത്, ഞാനാദ്യം ചെയ്തത് അവനോട് സോറി പറയുകയായിരുന്നു. അവനതു മനസ്സിലായതു പോലെ അവന് തലയാട്ടിയത്രേ. തന്റെ മകനെ രക്ഷപ്പെടുത്താന് സഹായിച്ച ഓരോരുത്തരോടും അയാള് നന്ദി അറിയിച്ചു. മകന്റെ നന്മയുദ്ദേശിച്ചായിരുന്നു ചെയ്തതെങ്കിലും താന് ചെയ്തത് ഇത്തിരി കടന്നു പോയതായി തോന്നുന്നുവെന്ന് അയാള് കണ്ണീരടക്കി പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha