ഏഷ്യാകപ്പ് സൂപ്പര്‍ ഫോറിലെ അവസാനമത്സരത്തില്‍ ഇന്ത്യയെ സമനിലയില്‍ തളച്ച് അഫ്ഗാനിസ്ഥാന്‍. അഫ്ഗാന്‍ ഉയര്‍ത്തിയ 252/8 എന്ന സ്‌കോര്‍ ചേസ് ചെയ്യാനിറങ്ങിയ ഇന്ത്യ ഒരുപന്ത് ശേഷിക്കേ 252ല്‍ ആള്‍ഔട്ടാവുകയായിരുന്നു. രണ്ടുവര്‍ഷത്തെ ഇടവേളയ്ക്കുശേഷം അവിചാരിതമായി നായക കുപ്പായത്തിലിറങ്ങിയ ധോണിയുടെ ഇന്ത്യയ്‌ക്കെതിരെക്കെതിരെ ഓപ്പണര്‍ അഹമ്മദ് ഷെഹ്‌സാദിന്റെ തകര്‍പ്പന്‍ സെഞ്ച്വറി (124) യും മുഹമ്മദ് നബിയുടെ അര്‍ദ്ധ സെഞ്ച്വറി (64) യുമാണ് അഫ്ഗാന് മികച്ച സ്‌കോര്‍ നല്‍കിയത്. മറുപടിക്കിറങ്ങിയ ഇന്ത്യയ്ക്ക് വേണ്ടി അമ്പാട്ടി റായ്ഡുവും(57) ലോകേഷ് രാഹുലും (60) മികച്ച തുടക്കം നല്‍കി. ഓപ്പണിംഗില്‍ 110 റണ്‍സ് കൂട്ടിച്ചേര്‍ത്തശേഷം അമ്പാട്ടി മടങ്ങി. വൈകാതെ രാഹുലും. തുടര്‍ന്ന് ദിനേഷ് കാര്‍ത്തിക് (44) ഒരറ്റത്ത് പൊരുതിനോക്കിയെങ്കിലും ധോണി(8), മനീഷ് പാണ്ഡെ(8) ,കേദാര്‍ യാദവ്(19) എന്നിവര്‍ പെട്ടെന്ന് മടങ്ങിയത് ഇന്ത്യയെ ബാക്ക്ഫുട്ടിലാക്കി.

കാര്‍ത്തികിനെ വിക്കറ്റിന് പുറത്തേക്ക് പോയ പന്തില്‍ അമ്പയര്‍ തെറ്റായി എല്‍.ബി വിളിച്ചപ്പോള്‍ റിവ്യൂ ഓപ്ഷനും കഴിഞ്ഞിരുന്നു. തുടര്‍ന്ന് പ്രതീക്ഷകള്‍ ജഡേജയിലായി. ഇതിനിടയില്‍ ചഹര്‍ (12) പുറത്തായപ്പോള്‍ ഇന്ത്യ 226/7 എന്ന നിലയിലായി. അവസാന ഓവറില്‍ റാഷിദിനെതിരെ ഫോറടിച്ച് ജഡേജ വിജയപ്രതീക്ഷ നല്‍കിയെങ്കിലും അഞ്ചാം പന്തിലെ ക്യാച്ചോടെ കളി സമനിലയില്‍ അവസാനിച്ചു.

ക്യാപ്ടന്‍ രോഹിത് ശര്‍മ്മയ്ക്കും വൈസ് ക്യാപ്ടന്‍ ശിഖര്‍ ധവാനും വിശ്രമം നല്‍കിയതുകൊണ്ടാണ് ധോണി ഇന്നലെ വീണ്ടും ഇന്ത്യന്‍ നായകനായത്. പേസര്‍ ദീപക് ചഹര്‍ അരങ്ങേറ്റം കുറിച്ചപ്പോള്‍ ഭുവനേശ്വര്‍, ബുംറ, ചഹല്‍ എന്നിവര്‍ക്കും വിശ്രമം ലഭിച്ചു. സിദ്ധാര്‍ത്ഥ് കൗള്‍, ഖലീല്‍ അഹമ്മദ് എന്നിവരും ഇന്ത്യന്‍ നിരയിലിറങ്ങി.ഓപ്പണറായി ഇറങ്ങി 38ാം ഓവര്‍ വരെ ക്രീസില്‍ നിന്ന ഷെഹ്‌സാദ് 116 പന്തുകള്‍ നേരിട്ട് 11 ഫോറും ഏഴ് സിക്‌സുമടക്കമാണ് 124 റണ്‍സടിച്ചുകൂട്ടിയത്. ഒരറ്റത്ത് മുഹമ്മദ് ഷഹ്‌സാദ് തകര്‍ത്തടിച്ചപ്പോള്‍ അപ്രതീക്ഷിതമായ തുടക്കമാണ് അഫ്ഗാന് ലഭിച്ചത്. 13ാം ഓവറില്‍ ടീം സ്‌കോര്‍ 65ല്‍ സഹ ഓപ്പണര്‍ ജാവേദ് അഹ്മദി അഞ്ച് റണ്‍സുമായി പുറത്താകുമ്പോള്‍ ഷെഹ്‌സാദ് അര്‍ദ്ധ സെഞ്ച്വറി കടന്നിരുന്നു. 30 പന്തുകളില്‍ നിന്നാണ് ജാവേദ് അഞ്ച് റണ്‍സെടുത്തത്. ജഡേജയുടെ പന്തില്‍ ജാവേദിനെ ധോണി സ്റ്റംപ് ചെയ്യുകയായിരുന്നു. തുടര്‍ന്ന് ഒരറ്റത്ത് ഷെഹ്‌സാദ് തകര്‍ത്തു വീശിയപ്പോള്‍മറ്റേയറ്റം തകര്‍ക്കാന്‍ ഇന്ത്യയ്ക്ക് കഴിഞ്ഞു.
എന്നാല്‍ നേരത്തേ ഫൈനല്‍ ഉറപ്പാക്കിയ ഇന്ത്യ ഇന്ന് പാകിസ്ഥാനും ബംഗ്‌ളാദേശും തമ്മിലുള്ള മത്സരത്തിലെ വിജയിയെ ഫൈനലില്‍ നേരിടും.