രഞ്ജി ട്രോഫി ക്വാര്‍ട്ടര്‍ പോരാട്ടത്തില്‍ കേരളത്തിനെതിരെ 195 റണ്‍സ് വിജയലക്ഷ്യവുമായി രണ്ടാം ഇന്നിങ്‌സ് ആരംഭിച്ച ഗുജറാത്തിനെ 113 റണ്‍സിന് തകര്‍ത്ത് കേരളം സെമിയില്‍ പ്രവേശിച്ചു.

കൈവിരലിനു പൊട്ടലേറ്റിട്ടും ഒറ്റക്കയ്യില്‍ ബാറ്റുമായി കളത്തിലിറങ്ങിയ സഞ്ജു സാംസണ്‍ പകര്‍ന്നു നല്‍കിയ ആവേശക്കനല്‍ ഊതിക്കത്തിച്ച് രഞ്ജി ട്രോഫി ക്വാര്‍ട്ടറില്‍ കേരള പേസര്‍മാരുടെ അവതാരം. ഫലം, ആഭ്യന്തര ക്രിക്കറ്റില്‍ പുതുചരിത്രമെഴുതി കേരളം ആദ്യമായി രഞ്ജി ട്രോഫി സെമിയില്‍. 195 റണ്‍സ് വിജയലക്ഷ്യം പിന്തുടര്‍ന്ന ഗുജറാത്തിനെ മൂന്നാം ദിനം 31.3 ഓവറില്‍ വെറും 81 റണ്‍സിനാണ് കേരളം എറിഞ്ഞിട്ടത്.

നേരത്തെ, രണ്ടാം ഇന്നിങ്‌സില്‍ 171 റണ്‍സിനു പുറത്തായ കേരളം, ഒന്നാം ഇന്നിങ്‌സ് ലീഡായ 23 റണ്‍സ് കൂടി ചേര്‍ത്താണ് സന്ദര്‍ശകര്‍ക്കു മുന്നില്‍ 195 റണ്‍സ് വിജയലക്ഷ്യമുയര്‍ത്തിയത്. ഒന്നാം ഇന്നിങ്‌സില്‍ പരുക്കുമായി തിരിച്ചുകയറിയ സഞ്ജു സാംസണിനെ വരെ പത്താമനായി കളത്തിലിറക്കിയാണ് കേരളം രണ്ടാം ഇന്നിങ്‌സില്‍ 171 റണ്‍സ് നേടിയത്. ക്വാര്‍ട്ടര്‍ കടമ്പ കടക്കാന്‍ പാര്‍ഥിവ് പട്ടേലിന്റെ നേതൃത്വത്തില്‍ ഇറങ്ങുന്ന ഗുജറാത്ത് നാലാം ഇന്നിങ്‌സില്‍ നേടേണ്ടത് ഈ മല്‍സരത്തിലെ ഉയര്‍ന്ന സ്‌കോറാണ്. കേരളം ഒന്നാം ഇന്നിങ്‌സില്‍ 185 റണ്‍സും രണ്ടാം ഇന്നിങ്‌സില്‍ 171 റണ്‍സും േനടിയപ്പോള്‍ ഗുജറാത്ത് ഒന്നാം ഇന്നിങ്‌സില്‍ 162 റണ്‍സിനു പുറത്തായിരുന്നു.

പേസ് ബോളര്‍മാരുടെ പറുദീസയായി മാറിയ കൃഷ്ണഗിരിയിലെ പിച്ചില്‍ പൊരുതിനിന്ന് അര്‍ധസെഞ്ചുറി നേടിയ സിജോമോന്‍ ജോസഫാണ് കേരളത്തിന് ഭേദപ്പെട്ട സ്‌കോര്‍ സമ്മാനിച്ചത്. 148 പന്തുകള്‍ നേരിട്ട സിജോമോന്‍, എട്ടു ബൗണ്ടറി സഹിതം 56 റണ്‍സെടുത്തു. ജലജ് സക്‌സേന (67 പന്തില്‍ ഏഴു ബൗണ്ടറി സഹിതം പുറത്താകാതെ 44), ക്യാപ്റ്റന്‍ സച്ചിന്‍ ബേബി (43 പന്തില്‍ 24), വിനൂപ് ഷീല മനോഹരന്‍ (27 പന്തില്‍ 16), പി.രാഹുല്‍ (32 പന്തില്‍ 10) എന്നിവരും മികച്ച പ്രകടനം കാഴ്ചവച്ചു.

ഗുജറാത്തിനായി റൂഷ് കലാരിയ, അക്‌സര്‍ പട്ടേല്‍ എന്നിവര്‍ മൂന്നു വിക്കറ്റ് വീതം വീഴ്ത്തി. നഗ്വാസ്‌വല്ല രണ്ടും ചിന്തന്‍ ഗജ, പിയൂഷ് ചാവ്‌ല എന്നിവര്‍ ഓരോ വിക്കറ്റും വീഴ്ത്തി. 96 റണ്‍സിനിടെ അഞ്ചു വിക്കറ്റ് നഷ്ടമാക്കിയ കേരളത്തിന്, ആറാം വിക്കറ്റില്‍ സിജോമോന്‍ ജോസഫ്–ജലജ് സക്‌സേന സഖ്യം പടുത്തുയര്‍ത്തിയ അര്‍ധസെഞ്ചുറി കൂട്ടുകെട്ടാണ് (55) കരുത്തായത്. നാലു വിക്കറ്റിന് 149 റണ്‍സ് എന്ന നിലയില്‍നിന്ന കേരളത്തിന് വെറും 22 റണ്‍സിനിടെയാണ് ശേഷിച്ച ആറു വിക്കറ്റുകള്‍ നഷ്ടമായത്.

മുഹമ്മദ് അസ്ഹറുദ്ദീന്‍ (പൂജ്യം), വിഷ്ണു വിനോദ് (ഒന്‍പത്), ബേസില്‍ തമ്പി (പൂജ്യം), എം.ഡി. നിധീഷ് (പൂജ്യം), സന്ദീപ് വാരിയര്‍ (പൂജ്യം), സഞ്ജു സാംസണ്‍ (പൂജ്യം) എന്നിങ്ങനെയാണ് മറ്റു താരങ്ങളുടെ സ്‌കോര്‍. 

മൂന്നാമനായി ക്രീസിലെത്തി പുറത്താകാതെ നിന്ന രാഹുല്‍ ഷാ മാത്രമാണ് ഗുജറാത്ത് നിരയില്‍ ഭേദപ്പെട്ട പ്രകടനം പുറത്തെടുത്തത്. 70 പന്തുകള്‍ നേരിട്ട ഷാ നാലു ബൗണ്ടറികളുടെ അകമ്പടിയോടെ 33 റണ്‍സെടുത്തു. കേരളത്തെ വിറപ്പിക്കുമെന്നു കരുതിയ ഇന്ത്യന്‍ താരം പാര്‍ഥിവ് പട്ടേല്‍ ഒറ്റ പന്തു മാത്രം നേരിട്ട് റണ്ണൗട്ടായി. കതന്‍ പട്ടേല്‍ (21 പന്തില്‍ അഞ്ച്), പ്രിയങ്ക് പഞ്ചല്‍ (14 പന്തില്‍ മൂന്ന്), പാര്‍ഥിവ് പട്ടേല്‍ (പൂജ്യം), റുജുല്‍ ഭട്ട് (പൂജ്യം), ധ്രുവ് റാവല്‍ (33 പന്തില്‍ 17), കലാരിയ (ഒന്‍പതു പന്തില്‍ രണ്ട്), അക്‌സര്‍ പട്ടേല്‍ (ആറു പന്തില്‍ രണ്ട്), പിയൂഷ് ചാവ്‌ല (ഏഴു പന്തില്‍ നാല്), ചിന്തന്‍ ഗജ (നാലു പന്തില്‍ ഒന്ന്), നഗ്വാസ്‌വല്ല (നാല്) എന്നിങ്ങനെയാണ് ഗുജറാത്ത് താരങ്ങളുടെ രണ്ടാം ഇന്നിങ്‌സിലെ പ്രകടനം. 12 ഓവര്‍ ബോള്‍ ചെയ്ത ബേസില്‍, 27 റണ്‍സ് മാത്രം വഴങ്ങിയാണ് അഞ്ചു വിക്കറ്റ് വീഴ്ത്തിയത്. സന്ദീപ് വാരിയര്‍ 13 ഓവറില്‍ 29 റണ്‍സ് വഴങ്ങി മൂന്നു വിക്കറ്റെടുത്തു. 

മല്‍സരത്തിലാകെ എട്ടു വിക്കറ്റ് വീഴ്ത്തിയതിനു പുറമെ ഒന്നാം ഇന്നിങ്‌സില്‍ 33 പന്തില്‍ അഞ്ചു ബൗണ്ടറിയും ഒരു സിക്‌സും സഹിതം 37 റണ്‍സെടുത്ത് കേരളത്തിന്റെ ടോപ് സ്‌കോററായ ബേസില്‍ തമ്പി, രണ്ടാം ഇന്നിങ്‌സില്‍ കൂട്ടത്തകര്‍ച്ചയ്ക്കിടയിലും പൊരുതി നേടിയ അര്‍ധസെഞ്ചുറിയുമായി കേരളത്തിന് ഭേദപ്പെട്ട ലീഡ് ഉറപ്പാക്കിയ സിജോമോന്‍ ജോസഫ് എന്നിവരാണ് വിജയശില്‍പികളില്‍ പ്രമുഖര്‍. ജലജ് സക്‌സേന, വിനൂപ് മനോഹരന്‍, സന്ദീപ് വാരിയര്‍ തുടങ്ങിയവര്‍ക്കും ഇവര്‍ക്കൊപ്പം ടീമിന്റെ ആത്മവിശ്വാസം ഊതിക്കത്തിച്ച് ചരിത്രവഴിയിലേക്കു നയിച്ച ഇതിഹാസ പരിശീലകന്‍ ഡേവ് വാട്‌മോറിനും നൂറില്‍ നൂറു മാര്‍ക്ക് തന്നെ നല്‍കണം.