ഓസ്‌ട്രേലിയന്‍ പര്യടനത്തിലെ മികവുറ്റ പ്രകടനത്തിനുശേഷം ടീം ഇന്ത്യയുടെ കളി ഇനി ന്യൂസീലന്‍ഡില്‍! ബൗണ്‍സിനും, അതിനപ്പുറം റണ്ണൊഴുക്കിനും പേരുകേട്ട ന്യൂസീലന്‍ഡിലെ കുഞ്ഞന്‍ ഗ്രൗണ്ടുകളില്‍ ഇന്ത്യയെ കാത്തിരിക്കുന്നത് 5 ഏകദിനങ്ങളും 3 ട്വന്റി20 മല്‍സരങ്ങളും. നാട്ടില്‍ ശ്രീലങ്കയ്‌ക്കെതിരെ നടന്ന ടെസ്റ്റ്, ഏകദിന പരമ്പരകള്‍ തൂത്തുവാരിയതിന്റെ ആത്മവിശ്വാസത്തിലെത്തുന്ന കിവീസിന് മാര്‍ട്ടിന്‍ ഗപ്ടില്‍, റോസ് ടെയ്‌ലര്‍ എന്നിവരുടെ ബാറ്റിങ് ഫോമും കരുത്തേകും. രോഹിത് ശര്‍മ മുതല്‍ ധോണിവരെ അണിനിരക്കുന്ന ബാറ്റിങ് നിരയാണ് ഇന്ത്യയുടെയും കരുത്ത്.

ടീം ഇന്ത്യ

വിരാട് കോഹ്‌ലി (ക്യാപ്റ്റന്‍), രോഹിത് ശര്‍മ, ശിഖര്‍ ധവാന്‍, വിജയ് ശങ്കര്‍, അമ്പാട്ടി റായുഡു, ദിനേഷ് കാര്‍ത്തിക്, കേദാര്‍ ജാദവ്, എം.എസ്. ധോണി, ശുഭ്മാന്‍ ഗില്‍, കുല്‍ദീപ് യാദവ്, യുസ്‌വേന്ദ്ര ചാഹല്‍, രവീന്ദ്ര ജഡേജ, ഭുവനേശ്വര്‍ കുമാര്‍, മുഹമ്മദ് സിറാജ്, ഖലീല്‍ അഹമ്മദ്, മുഹമ്മദ് ഷമി.

ടീം ന്യൂസീലന്‍ഡ്

കെയ്ന്‍ വില്യംസന്‍ (ക്യാപ്റ്റന്‍), ട്രെന്റ് ബോള്‍ട്ട്, ഡഗ് ബ്രേസ്‌വെല്‍, കോളിന്! ഡി ഗ്രാന്‍ഡ്‌ഹോം, ലോക്കി ഫെര്‍ഗൂസന്‍, മാര്‍ട്ടിന്‍ ഗപ്ടില്‍, മാറ്റ് ഹെന്റി, ടോം ലാതം, കോളിന്‍ മണ്‍റോ, ഹെന്റി നിക്കോള്‍സ്, മിച്ചെല്‍ സാന്ത്‌നെര്‍, ഇഷ് സോധി, ടിം സൗത്തി, റോസ് ടെയ്‌ലര്‍.

മല്‍സരവേദികള്‍

മക്‌ലീന്‍ പാര്‍ക്ക്, നേപ്പിയര്‍, ഒന്നാം ഏകദിനം(ജനുവരി 23)

ക്രിക്കറ്റിനു പുറമേ റഗ്ബി മല്‍സരങ്ങള്‍ക്കും ആതിഥ്യമരുളുന്ന വേദി. മക്‌ലീന്‍ പാര്‍ക്ക് ക്രിക്കറ്റ് ഗ്രൗണ്ടാണ് ലോകത്തിന്റെ ഏറ്റവും കിഴക്കുഭാഗത്തുള്ള ടെസ്റ്റ് വേദി. ബാറ്റ്‌സ്മാന്‍മാരെ അതിരറ്റു പിന്തുണയ്ക്കുന്ന വിക്കറ്റ്. കളിച്ച 33 ഏകദിനങ്ങളില്‍ 20 വട്ടവും വിജയം കിവീസിനൊപ്പം.

ബേ ഓവല്‍, മൗണ്ട് മോന്‍ഗനൂയി – രണ്ട്, മൂന്ന് ഏകദിനങ്ങള്‍(ജനുവരി 26, 28)

ആദ്യ ഏകദിനത്തിന് ആതിഥ്യമരുളിയത് 2014ല്‍. മികച്ച ബാറ്റിങ് വിക്കറ്റ്. 2015-ല്‍ ഓസ്‌ട്രേലിയയിലും ന്യൂസീലന്‍ഡിലുമായി നടന്ന ഏകദിന ലോകകപ്പിനു വേദി ഉപയോഗിക്കപ്പെട്ടിരുന്നില്ല. ഏകദിനത്തില്‍ ന്യൂസീലന്‍ഡ് താരം മാര്‍ട്ടിന്‍ ഗപ്ടില്‍ ഇവിടെ സെഞ്ചുറിയടിച്ചത് രണ്ടു വട്ടം. 10,000 കാണികളെ ഉള്‍ക്കൊള്ളാനാകും.

സെഡന്‍ പാര്‍ക്ക്, ഹാമില്‍ട്ടന്‍, നാലാം ഏകദിനം(ജനുവരി 31), മൂന്നാം ട്വന്റി20(ഫെബ്രുവരി 10)

പ്രകൃതിരമണീയമായ സ്‌റ്റേഡിയം. 1914 മുതല്‍ ക്രിക്കറ്റ് മല്‍സരങ്ങള്‍ക്ക് വേദിയായി. 1957 മുതല്‍ ഫസ്റ്റ് ക്ലാസ് മല്‍സരങ്ങളും കളിച്ചുതുടങ്ങി. 1981-ലെ ആദ്യ ഏകദിന മല്‍സരത്തില്‍ ഇന്ത്യയെ കിവീസ് ഇവിടെ കീഴടക്കിയത് 51 റണ്‍സിന്. പച്ചപ്പുള്ള ഗ്രൗണ്ടില്‍ ബാറ്റ്‌സ്മാന്‍മാര്‍ കരുത്തുകാട്ടും.

വെസ്റ്റ്പാക് സ്‌റ്റേഡിയം, വെല്ലിങ്ടന്‍ – അഞ്ചാം ഏകദിനം(ഫെബ്രുവരി 3), ആദ്യ ട്വന്റി20 (ഫെബ്രുവരി 6)

ഓവല്‍ ആകൃതിയുള്ള സ്‌റ്റേഡിയം അറിയപ്പെടുന്നത് 'ദ് കേക്ക് ടിന്‍' എന്ന പേരില്‍. 2011 റഗ്ബി ലോകകപ്പ്, 2015 ക്രിക്കറ്റ് ലോകകപ്പ് എന്നിവയ്ക്ക് ആതിഥേയത്വം വഹിച്ചു. 37,000 കാണികളെ ഉള്‍ക്കൊള്ളാനാകും. വേദികളിലെ മല്‍സരങ്ങളില്‍ മഴ വില്ലനായതു പലവട്ടം. ബാറ്റിങ് വിക്കറ്റ്

ഈഡന്‍ പാര്‍ക്ക്, ഓക്ക്‌ലന്‍ഡ് , രണ്ടാം ട്വന്റി20(ഫെബ്രുവരി 8)

ന്യൂസീലന്‍ഡിലെ ഏറ്റവും വലിയ ക്രിക്കറ്റ് സ്‌റ്റേഡിയം. 1955-ല്‍ വിന്‍ഡീസിനെതിരെ ന്യൂസീലന്‍ഡ് ആദ്യ ടെസ്റ്റ് വിജയം നേടിയതും ഇവിടെവച്ച്. 1992, 2015 ലോകകപ്പുകള്‍ക്ക് ആതിഥ്യം. പൊട്ടിപ്പൊളിഞ്ഞ ടര്‍ഫും ഏതുസമയത്തും പ്രവര്‍ത്തനരഹിതമാകാവുന്ന ഫ്‌ലെഡ് ലൈറ്റുകളുമാണ് സ്‌റ്റേഡിയത്തിലുള്ളത്. വേദിയിലെ ചെറിയ ബൗണ്ടറികള്‍ ബാറ്റ്‌സ്മാനു സഹായകം. ത്രില്ലര്‍ മല്‍സരങ്ങള്‍ക്കു പേരുകേട്ട വേദി.