'ഏറ്റവും മോശം' എന്ന ലേബലുള്ള ആ 'അണ്ടര് ആം ബോളി'ന് ഇന്ന് 38 വയസ്സ്!
1981-ലെ വേള്ഡ് സീരിസ് കപ്പില് ഓസ്്ട്രേലിയയും ന്യൂസീലന്ഡുമായുള്ള മല്സരം ഓസ്ട്രേലിയന് ക്രിക്കറ്റിനു ചീത്തപ്പേരുണ്ടാക്കി എന്നു പറഞ്ഞാല് ഒട്ടും അതിശയോക്തിയാവില്ല.
അവസാന പന്തില് കിവീസിനു ജയിക്കാന് വേണ്ടത് ആറു റണ്സ്. വാലറ്റക്കാരന് ബ്രിയന് മെക്കിഷിന് 90 മീറ്റര് ദൂരമുള്ള ബൗണ്ടറി ലൈനിനു മുകളിലൂടെ പന്തടിച്ചു സിക്സര് നേടാതിരിക്കാന് ക്യാപ്റ്റന് ഗ്രെഗ് ചാപ്പലാണ് അനിയന് ട്രെവറിനു തന്ത്രം പറഞ്ഞുകൊടുത്തത് പന്ത് കുത്തിപ്പൊങ്ങാതിരിക്കാന് അണ്ടര് ആം (കൈ മടങ്ങാതെ പന്തു താഴെക്കൂടി ഉരുട്ടി വിടുന്ന രീതി) ബോളെറിയുക. ട്രെവര് അത് അനുസരിച്ചു.
ഉരുണ്ടു ചെന്ന പന്തില് സിക്സറടിക്കാന് കഴിയാതെ ന്യൂസീലന്ഡ് തോല്വി സമ്മതിച്ചു. ഉരുണ്ടുവന്ന പന്ത് തട്ടിയിട്ട മെക്കിഷിന് ക്രുദ്ധനായി ബാറ്റു വലിച്ചെറിഞ്ഞാണ് പ്രതിഷേധിച്ചത്. അന്ന് ക്രിക്കറ്റില് ഈ ബോള് നിയമവിരുദ്ധമായിരുന്നില്ല.പക്ഷേ, ക്രിക്കറ്റ് ഇത്രയും വലിയ ജനകീയ വിനോദമാകുന്നതിനു മുന്പുള്ള കാലമായിരുന്നിട്ടുകൂടി ആരാധകര് അതു ക്ഷമിച്ചില്ല. ട്രെവര് വിവാദനായകനായി; ഓസ്ട്രേലിയന് ക്രിക്കറ്റിനു ചീത്തപ്പേരുമായി.
എന്തായാലും ഓസ്ട്രേലിയന് ക്രിക്കറ്റിന്റെ അന്തസ്സു കളഞ്ഞ കളിക്കാരന് എന്ന ദുഷ്പേരും ചുമന്നായിരുന്നു ട്രെവറിന്റെ പിന്നീടുള്ള ജീവിതം. അണ്ടര് ആം പന്തെറിയാന് നിര്ദേശിച്ച ഗ്രെഗ് ചാപ്പല് രക്ഷപ്പെട്ടു. പക്ഷേ, തന്റെ ജീവിതം പിന്നീട് എങ്ങനെയായെന്നു ട്രെവര്തന്നെ പറയുന്നു:''ആ സംഭവം എന്നെ മാനസികമായി തളര്ത്തി. കുടുംബം തകര്ന്നു. ഭാര്യ ഉപേക്ഷിച്ചു പോയി. പിന്നീടു വിവാഹം കഴിക്കാന് ഞാന് ശ്രമിച്ചില്ല. അതുകൊണ്ടുതന്നെ എനിക്കു മക്കളുമില്ല. എവിടെച്ചെന്നാലും ആളുകള് ഇപ്പോഴും അന്നത്തെ സംഭവമാണു ചോദിക്കുക. ഓസ്ട്രേലിയന് ക്രിക്കറ്റിനു ചീത്തപ്പേരുണ്ടാക്കിയയാള് എന്ന നാണക്കേടും ചുമന്നു ഞാനിപ്പോഴും ഒതുങ്ങിക്കൂടുന്നു.''കുട്ടികള്ക്കു ക്രിക്കറ്റ് പരിശീലനവും ഗോള്ഫ് കളിയുമൊക്കെയായി ജീവിതത്തിന്റെ ഓരംപറ്റി കഴിയുകയാണിപ്പോള് ട്രെവര്.
1981-ലെ ഇതേ ദിവസമാണ് ടീം ക്യാപ്റ്റന് കൂടിയായ ചേട്ടന് ഗ്രെഗ് ചാപ്പലിന്റെ വാക്കു കേട്ട് 'കുപ്രസിദ്ധമായ' ആ അണ്ടര് ആം ബോള് ഓസ്ട്രേലിയന് താരം ട്രെവര് ചാപ്പല് എറിഞ്ഞത്. ക്രിക്കറ്റ് കളത്തില് സംഭവിച്ചിട്ടുള്ള കാര്യങ്ങളില് 'ഏറ്റവും മോശം' എന്ന ലേബലുള്ള 'അണ്ടര് ആം ബോളി'ന് ഇന്ന് 38 വയസ്സ്!
https://www.facebook.com/Malayalivartha
