ഐപിഎല്‍ എലിമിനേറ്റര്‍ പോരാട്ടത്തില്‍ റിഷഭ് പന്തിന്റെ ബാറ്റിംഗ് മികവില്‍ സണ്‍റൈസേഴ്‌സ് ഹൈദരാബാദിനെതിരെ ഡല്‍ഹിക്ക് ജയം . ഈ ജയത്തോടെ ഡല്‍ഹി ക്യാപിറ്റല്‍സ് രണ്ടാം ക്വാളിഫയറില്‍ കളിക്കാന്‍ യോഗ്യത നേടി. അവസാന പന്ത് വരെ ഉദ്വേഗം നിറഞ്ഞുനിന്ന മത്സരത്തില്‍ രണ്ട് വിക്കറ്റിനാണ് ഡല്‍ഹിയുടെ ജയം.
ആദ്യം ബാറ്റ് ചെയ്ത ഹൈദരാബാദ് എട്ടു വിക്കറ്റിന് 162 റണ്‍സാണ് നേടിയത്. മറുപടി ബാറ്റിങിനിറങ്ങിയ ഡല്‍ഹിക്കുവേണ്ടി പൃഥ്വി ഷായും , റിഷഭ് പന്തും മികച്ച പ്രകടനം കാഴ്ചവെച്ചു .ഇനി ചെന്നൈ സൂപ്പര്‍ കിങ്‌സാണ് ഡല്‍ഹിയുടെ എതിരാളി. ഇതിലെ വിജയികള്‍ ഫൈനലില്‍ മുംബൈ ഇന്ത്യന്‍സിനെ നേരിടും.

അവസാന രണ്ടു പന്തില്‍ ജയിക്കാന്‍ രണ്ടു റണ്‍സ് വേണമെന്നിരിക്കെ അഞ്ചാമത്തെ പന്തില്‍ കീമോ പോള്‍ ബൗണ്ടറിലൂടെ ഡല്‍ഹിയുടെ വിജയ റണ്‍സ് നേടി. ഡല്‍ഹിക്കുവേണ്ടി ധവാന്‍ പതിനേഴും ശ്രേസ് അയ്യര്‍ എട്ടും റണ്‍സ് മാത്രമാണ് നേടിയത്. ഹൈദരാബാദിനുവേണ്ടി ഭുവനേശ്വര്‍ കുമാറും ഖലീല്‍ അഹമ്മദും റാഷിദും രണ്ട് വിക്കറ്റ് വീതം വീഴ്ത്തി.
ഭുവനേശ്വര്‍ കുമാര്‍ 42റണ്‍സ് വിട്ടുകൊടുത്താണ് രണ്ട് വിക്കറ്റ് വീഴ്ത്തിയത്. നാലോവറില്‍ 41 റണ്‍സ് വിട്ടുകൊടുത്ത ബേസില്‍ തമ്പിക്ക് വിക്കറ്റൊന്നും വീഴ്ത്താന്‍ കഴിഞ്ഞില്ല. രണ്ടോവര്‍ ബാക്കിയുണ്ടായിരുന്ന ഖലീലിന് അവസരം നല്‍കാതെ നിര്‍ണായക സമയത്ത് ബേസിലിനെ പന്ത് ഏല്‍പിച്ചതാണ് ഹൈദരാബാദിന് തിരിച്ചടിയായത്.