ഇന്ത്യയ്‌ക്കെതിരായ രണ്ടാം ട്വന്റി- 20യില്‍ വിന്‍ഡീസിന് എട്ടു വിക്കറ്റിന്റെ തകര്‍പ്പന്‍ ജയം. ഇന്ത്യ ഉയര്‍ത്തിയ 171 റണ്‍സിന്റെ വിജയ ലക്ഷ്യം വിന്‍ഡീസ് ഒന്‍പത് പന്തുകള്‍ ബാക്കി നില്‍ക്കെ വെറും രണ്ടു വിക്കറ്റ് മാത്രം നഷ്ടപ്പെടുത്തി മറികടന്നു. ഇന്ത്യന്‍ ബാറ്റ്‌സ്മാന്‍മാര്‍ താളം കണ്ടെത്താന്‍ പെടാപ്പാടുപെട്ട ക്രീസില്‍ വിന്‍ഡീസിനായി ബാറ്റെടുത്തവരെല്ലാം കോഹ്ലിയുടെ ബോളര്‍മാരെ കണക്കിനു ശിക്ഷിച്ചു. ഏകദിന പരമ്പരയില്‍ കാര്യവട്ടത്ത് മാനം കെടുത്തിവിട്ട ഇന്ത്യയെ അതേ മണ്ണില്‍ തിരിച്ചടിച്ച് പൊള്ളാര്‍ഡും കൂട്ടരും മുംബൈയിലേക്കു മടങ്ങി. ട്വന്റി20 പരമ്പരയിലെ രണ്ടാം മത്സരത്തില്‍ ഇന്ത്യ ഉയര്‍ത്തിയ 171 റണ്‍സ് വിജയലക്ഷ്യം 18.3 ഓവറില്‍ രണ്ടു വിക്കറ്റ് നഷ്ടത്തില്‍ മറികടന്നാണ് കരീബിയന്‍സ് വിജയഭേരി മുഴക്കിയത്. കാര്യവട്ടം സ്‌പോര്‍ട്‌സ് ഹബിലെ കോഹ്‌ലിയുടെയും സംഘത്തിന്റെയും ആദ്യ തോല്‍വിയാണ്. 45 പന്തില്‍ നാലു സിക്‌സും നാലു ഫോറുമായി 65 റണ്‍സെടുത്ത് പുറത്താകാതെ നിന്ന ലെന്‍ഡല്‍ സിമ്മണ്‍സിന്റെ പ്രകടനമാണ് സന്ദര്‍ശകര്‍ക്ക് ആവേശവിജയം സമ്മാനിച്ചത്. ഇന്ത്യന്‍ ബൗളര്‍മാരെയെല്ലാം കണക്കിന് ശിക്ഷിച്ചായിരുന്നു വിന്‍ഡീസിന്റെ ആധികാരിക ജയം.
ഹൈദരാബാദിലെ തനിയാവര്‍ത്തനമായിരുന്നു ഇന്ത്യന്‍ ഫീല്‍ഡിങ്ങില്‍ കാര്യവട്ടത്തും കണ്ടത്. ക്യാച്ചുകള്‍ നിലത്തിടാന്‍ താരങ്ങള്‍ ഓരോരുത്തരായി മത്സരിക്കുന്നത് 44,000ത്തോളം വരുന്ന കാണികള്‍ക്ക് നിരാശയോടെ കണ്ടിരിക്കാനേ സാധിച്ചിരുന്നുള്ളൂ. സിമ്മണ്‍സ് ആറ് റണ്‍സില്‍ നില്‍ക്കുമ്പോള്‍ ഭുവനേശ്വര്‍ കുമാറിന്റെ പന്തില്‍ മിഡ്ഓഫില്‍ കൊടുത്ത അനായാസ ക്യാച്ച് വാഷിങ്ടണ്‍ സുന്ദര്‍ നഷ്ടപ്പെടുത്തി.

തൊട്ടടുത്ത പന്തില്‍ എവിന്‍ ലൂയിസിനെ കീപ്പര്‍ ഋഷഭ് പന്തും വിട്ടുകളഞ്ഞതോടെ ഗാലറിയില്‍ ധോണിക്കും സഞ്ജുവിനുമായി മുറവിളി ഉയര്‍ന്നു. ജീവന്‍ തിരിച്ചുകിട്ടിയ ഓപണര്‍മാര്‍ പിന്നെ തിരിഞ്ഞുനോക്കിയില്ല. പന്തെറിയാന്‍ എത്തിയവരെയൊക്കെ തല്ലി നട്ടെല്ലൊടിച്ചു. ഒന്നാം വിക്കറ്റില്‍ ഇരുവരും 9.5 ഓവറില്‍ 73 റണ്‍സാണ് അടിച്ചുകൂട്ടിയത്. 35 പന്തില്‍ 40 റണ്‍സ് നേടിയ ലൂയിസിനെ സുന്ദറിന്റെ പന്തില്‍ പന്ത് സ്റ്റംപ് ചെയ്ത് പുറത്താക്കുമ്പോഴേക്കും കാര്യങ്ങള്‍ സന്ദര്‍ശകരുടെ വരുതിയിലെത്തിയിരുന്നു. ലൂയിസ് മടങ്ങിയെകിലും ഷിംറോണ്‍ ഹെറ്റ്‌മെയര്‍ക്കൊപ്പം അടിച്ചുകളിച്ച സിമ്മണ്‍സ് വിന്‍ഡീസിന് അനായാസ ജയം സമ്മാനിക്കുകയായിരുന്നു