ഐ.പി.എല്ലില്‍ മിന്നുന്ന ഫോമിലാണ് മലയാളി താരം സഞ്ജു സാംസണ്‍. കഴിഞ്ഞ രണ്ടു മത്സരങ്ങളിലായി സഞ്ജു നേടിയത് 16 സികസ്‌റുകളാണ്. ഓരോ സിക്‌സറുകളും ഒന്നിന് ഒന്നിന് മികച്ചത്. ഗ്രൗണ്ടിലൂടെ ബോളുകള്‍ പായിച്ച് ഫോറുകള്‍ നേടുന്നതിനേക്കാല്‍ സഞ്ജു ഇഷ്ടപ്പെടുന്നത് ആളൊഴിഞ്ഞ ഗാലറികളില്‍ ബോള്‍ എത്തിച്ച് സിക്‌സുകള്‍ നേടാനാണ്. ഈ സിക്‌സുകള്‍ പിന്നിലെ രഹസ്യമെന്താണ് ചോദിക്കുന്നത് മുതിര്‍ന്ന് ക്രിക്കറ്റ് താരങ്ങളായിരുന്നു. സഞ്ജുവിന്റെ ഹാന്റ് പവറിന് കാരണമായ കഴിക്കുന്ന ഭക്ഷണം എന്താണെന്ന് ചോദിച്ച് പലരും ഇതിനോടകം തന്നെ രംഗത്ത് വന്നിയിരുന്നു. ഇതാ ഇപ്പോള്‍ സഞ്ജു തന്നെ ഈ രഹസ്യം വെളിപ്പെടുത്തുകയാണ്. ഈ സീസണില്‍ സഞ്ജുവിന്റെ ആദ്യ അഭിമുഖം ഒരു മലയാളം ന്യൂസ് ചാനല്‍ നല്‍കിയിരുന്നു. ലോക്ഡൗണ്‍ കാലത്തെ കഠിനാദ്ധ്വാനത്തിനൊപ്പം മുന്‍ കേരള ക്രിക്കറ്റ് ടീം നായകന്‍ റൈഫി വിന്‍സന്റ് ഗോമസിന്റെ പിന്തുണയും ഉപദേശവും തനിക്ക് ഊര്‍ജമായി എന്നാണ് സഞ്ജു അഭിമുഖത്തില്‍ പറഞ്ഞത്.

സെഞ്ചുറി നേടുന്നതില്‍ അല്ല ടീമിന്റെ ജയമാണ് ലക്ഷ്യം. ഇന്ത്യന്‍ ടീമില്‍ തിരിച്ചെത്തുന്നതിനെ കുറിച്ച് ഇപ്പോള്‍ ആലോചിക്കുന്നില്ലെന്നും സഞ്ജു പറഞ്ഞു. കിംഗ്‌സ് ഇലവന്‍ പഞ്ചാബിന് എതിരായ മത്സരം വലിയ അനുഭമായിരുന്നു. റണ്‍സ് കണ്ടെത്താന്‍ വിഷമിക്കുമ്പോള്‍ രാഹുല്‍ തിവാട്ടിയക്ക് പരമാവധി പിന്തുണ നല്‍കാനാണ് ശ്രമിച്ചത്. ഒരു സിക്‌സ് അടിച്ചാല്‍ മതി ഫോമിലെത്താന്‍ പറ്റുമെന്ന് അദേഹത്തോട് പറഞ്ഞു. അതിനു ശേഷം വമ്പന്‍ സിക്‌സുകളുമായി തിവാട്ടിയ ടീമിനെ ജയിച്ചപ്പോള്‍ ഏറെ സന്തോഷം തോന്നി. സിക്‌സര്‍ അടിച്ചുകൂട്ടുക എന്നതായിരുന്നു ടീമിന് ആവശ്യം. മികച്ച സിക്‌സര്‍ പ്രകടനം പുറത്തെടുക്കാന്‍ കഴിഞ്ഞതില്‍ സന്തോഷമുണ്ട്. അതിനായി പരിശീലനം നടത്തിയിരുന്നു. ലോക്ക്ഡൗണിലെ നാലഞ്ച് മാസം ജിമ്മിലും, ബീച്ചിലും, ഗ്രീന്‍ഫീല്‍ഡ് സ്‌റ്റേഡിയത്തിലും പരിശീലനം നടത്തിയിരുന്നു. ഫിറ്റ്‌നസ് നന്നായി ശ്രദ്ധിച്ചിരുന്നു. അത് ഗുണം ചെയ്തു. ഭാര്യ ചാരുവിന്റെയും കുടുംബാംഗങ്ങളുടേയും പിന്തുണ ലഭിച്ചു. രാവിലെ അഞ്ചരയ്ക്ക് എഴുന്നേറ്റാണ് പരിശീലനം തുടങ്ങുന്നത്. ഫിറ്റ്‌നസ് പരിശീലകന്‍ അമല്‍ മനോഹരനും നന്ദിയറിയിക്കുന്നു.

കേരള മുന്‍ നായകനും ഐപിഎല്‍ താരവുമായിരുന്ന റൈഫി വിന്‍സന്റ് ഗോമസിന്റെ പിന്തുണയും ഉപദേശവും സഹായമായി. കഴിഞ്ഞ 10 വര്‍ഷമായി റൈഫി തന്നെ പിന്തുണയ്ക്കുന്നുണ്ട്. സഹായം നല്‍കാറുണ്ടെന്നും സഞ്ജു പറഞ്ഞു. സെഞ്ചുറി താനെ വന്നുകൊള്ളും. സെഞ്ചുറി അടിക്കുമെന്ന് പ്രതീക്ഷിച്ചല്ല മത്സരത്തില്‍ ഇറങ്ങുന്നത്. ടീമിന്റെ ആവശ്യം അനുസരിച്ചാണ് കളിക്കുന്നത്. ടീമിനായി എത്രയും പെട്ടെന്ന് റണ്‍സ് എടുക്കാനാണ് ശ്രമിക്കുന്നത്. അതിന് വേണ്ടിയാണ് സിക്‌സറുകളില്‍ ശ്രദ്ധകേന്ദ്രീകരിക്കുന്നത്. ഇന്ത്യന്‍ ടീമിലേക്ക് തിരിച്ചുവരുന്നതിനെ കുറിച്ച് ഇപ്പോള്‍ ചിന്തിക്കുന്നില്ല. ദേശീയ ടീം തെരഞ്ഞെടുപ്പ് തന്റെ കയ്യിലല്ല. മികച്ച പ്രകടനം തുടരാനും പ്രകടനം മെച്ചപ്പെടുത്താനുമാണ് താന്‍ ശ്രമിക്കുന്നതെന്നും സഞ്ജു പറഞ്ഞു. കഴിഞ്ഞ സീസണിലെ പ്രകടനത്തില്‍ തനിക്ക് നിരശയുണ്ടായിരുന്നു. അതുകൊണ്ട് തന്നെ പുതിയ സീസണിന് ഒരുങ്ങുമ്പോള്‍ വ്യക്തമായ പദ്ധതിയുണ്ടായിരുന്നുവെന്നും സഞ്ജു പറഞ്ഞു. സഞ്ജുവിനെ ഇന്ത്യന്‍ ടീമില്‍ ഉള്‍പ്പെടുത്താത്തത് അത്ഭുതം നല്‍കുന്നു എന്ന് ഓസീസ് ഇതിഹാസം ഷെയ്ന്‍ വോണ്‍ കഴിഞ്ഞ ദിവസം പറഞ്ഞിരുന്നു.

വരുന്ന പത്തോ അതിലധികം വര്‍ഷമോ തനിക്ക് ക്രിക്കറ്റില്‍ തുടരാന്‍ സാധിക്കും. അതുകൊണ്ടുതന്നെ എല്ലാം ക്രിക്കറ്റിന് സമര്‍പ്പിക്കാനാണ് തന്റെ തീരുമാനം. കാരണം തനിക്ക് വേണ്ടതെല്ലാം ക്രിക്കറ്റാണ് നല്‍കുന്നത്. കുടുംബവും സുഹൃത്തുക്കളും നല്‍കുന്ന പിന്തുണ വലുതാണ്. തന്റെ അച്ഛന്‍ കരുത്തുറ്റ മനസിന്റെ ഉടമയാണ്. ആ കരുത്ത് തന്നെയാണ് തനിക്കും ലഭിച്ചിട്ടുള്ളത്. തന്റെ ശരീരത്തിന്റെ കരുത്തും താന്‍ മനസിലാക്കുന്നു. കായികപരമായ കരുത്ത് വര്‍ധിപ്പിക്കാന്‍ താന്‍ കൂടുതല്‍ സമയം ചിലവഴിക്കുന്നു. അതിന്റെ ഫലം പുറത്തുവരുന്നത് കാണുമ്പോള്‍ വളരെ സന്തോഷമുണ്ടെന്നും സഞ്ജു പറഞ്ഞു.

2019 സീസണില്‍ 12 മത്സരത്തില്‍ നിന്ന് 342 റണ്‍സാണ് സഞ്ജു സാംസണ്‍ ആകെ നേടിയത്. എന്നാല്‍ ഇത്തവണ സഞ്ജുവിന്റെ തിരിച്ചുവരവാണ് ആദ്യ രണ്ട് മത്സരത്തിലൂടെ കണ്ടത്. ഇന്ന് കൊല്‍ക്കത്ത നൈറ്റ് റൈഡേവ്‌സിനെതിരെയാണ് രാജസ്ഥാന്‍ റോയല്‍സിന്റെ മത്സരം.