ആസ്ട്രേലിയന്‍ ക്രിക്കറ്റ് ടീമിന്റെ മുഖ്യ പരിശീലകന്‍ ജസ്റ്റിന്‍ ലാംഗര്‍ക്കെതിരെ പരാതിയുമായി താരങ്ങള്‍. ലാംഗറുടെ പരിശീലന മുറകള്‍ ഒത്തുപോകാന്‍ കഴിയാത്തതും വളരെ കഠിനമാണെന്നതുമാണ് ആസ്ട്രേലിയന്‍ താരങ്ങളെ ചൊടിപ്പിക്കുന്നത്.

ലാംഗറോട് പരിശീലന രീതി മാറ്റുവാന്‍ ആവശ്യപ്പെട്ട് താരങ്ങള്‍ പ്രതിഷേധസ്വരം വ്യക്തമാക്കിയെന്നാണ് ലഭിക്കുന്ന വിവരം. മുന്‍ ഓസീസ് താരമായിരുന്ന ലാഗര്‍ ദേശീയ ടീമില്‍ കളിക്കുമ്പോഴും വിട്ട്കൊടുക്കാത്ത കര്‍ക്കശക്കാരനായിരുന്നു. ഇതേ ശൈലി പരിശീലകന്‍ ആയപ്പോളും താരം തുടരുകയാണ്. ലാംഗറുടെ പരിശീലന ശൈലിയില്‍ താരങ്ങള്‍ക്ക് അതൃപ്തി ഉണ്ടെന്ന വിവരം സിഡ്‌നി മോണിങ് ഹെറാള്‍ഡ് ആണ് റിപ്പോര്‍ട്ട് ചെയ്തത്.

അതേസമയം ആസ്‌ട്രേലിയന്‍ ക്രിക്കറ്റ് ബോര്‍ഡ് ലാംഗറുടെ കരാര്‍ പുതുക്കാന്‍ ഒരുങ്ങുമ്പോഴാണ് താരങ്ങള്‍ പ്രതിഷേധവുമായി രംഗത്ത് വന്നിരിക്കുന്നത്. 2022 വരെയാണ് ലാംഗര്‍ക്ക് നിലവില്‍ കരാറുള്ളത്. 2018ലെ പന്ത് ചുരണ്ടല്‍ വിവാദത്തിന് പിന്നാലെ കോച്ച്‌ ഡാരന്‍ ലേമാന്‍ സ്ഥാനമൊഴിഞ്ഞപ്പോഴാണ് മുന്‍ ഓപ്പണര്‍ കൂടിയായ ലാംഗറെ ആസ്‌ട്രേലിയ പരിശീലകനായി നിയമിച്ചത്.

ഡ്രസ്സിംഗ് റൂമില്‍ കൂടുതല്‍ സ്വാതന്ത്ര്യവും നിയന്ത്രണങ്ങളില്‍ ഇളവും ആണ് താരങ്ങളുടെ പ്രധാന ആവശ്യം. ലാംഗറുടെ കഠിനമായ ഇടപെടല്‍ ടീമിനകത്ത് ഇത് അത്ര സുഖകരമല്ലാത്ത സാഹചര്യമാണുണ്ടാക്കുന്നതെന്നാണ് പുറത്തുവരുന്ന റിപ്പോര്‍ട്ടുകള്‍.

ഇന്ത്യയ്ക്കെതിരെ സ്വന്തം നാട്ടില്‍ വെച്ച്‌ 2-1ന്റെ തോല്‍വി വഴങ്ങേണ്ടി വന്നതും താരങ്ങളില്‍ ലാംഗര്‍ക്കെതിരെ അതൃപ്തി രൂപപ്പെടുവാന്‍ കാരണമായി. ആസ്‌ട്രേലിയക്കായി 105 ടെസ്റ്റുകളും എട്ട് ഏകദിനങ്ങളും ജസ്റ്റിന്‍ ലാംഗര്‍ കളിച്ചിട്ടുണ്ട്. ടെസ്റ്റില്‍ 23 സെഞ്ച്വറികളും മൂന്ന് ഇരട്ട സെഞ്ച്വറികളും സഹിതം 7696 റണ്‍സും താരം നേടിയിട്ടുണ്ട്.