ഇന്ത്യയ്‌ക്കു മുന്നില്‍ ഓസ്‌ട്രേലിയ വീണ്ടുംപതറുന്ന അവസ്ഥയാണ്‌ നാലാം ടെസ്റ്റിലും കാണാന്‍ കഴിയുന്നത്‌. ഡല്‍ഹിയില്‍ നടക്കുന്ന നാലാം ടെസ്റ്റിന്റെ ആദ്യനാള്‍ കളിനിര്‍ത്തുമ്പോള്‍ ഓസ്‌ട്രേലിയ എട്ടിന്‌ 231 എന്ന നിലയിലാണ്‌. ഇന്ത്യക്കുവേണ്ടി അശ്വിന്‍ നാലു വിക്കറ്റും, ജഡേജയും,ഇശാന്തും രണ്ട്‌ വിക്കറ്റുകള്‍ വീതവും വീഴ്‌ത്തി. ടോസ്‌ നേടിയ ഓസ്‌ട്രേലിയ ബാറ്റിംഗ്‌ തെരെഞ്ഞെടുക്കുകയായിരുന്നു.

പരിക്കേറ്റ ക്‌ളാര്‍ക്കിനു പകരം വാട്‌സനാണ്‌ ടീമിനെ നയിച്ചത്‌. ഒന്‍പതാം വിക്കറ്റില്‍ സിഡിലും, പാറ്റിന്‍സണും നടത്തിയ ചെറുത്തു നില്‍പാണ്‌ 200 കടക്കാന്‍ ഓസ്‌ട്രേലിയയെ സഹായിച്ചത്‌. വാര്‍ണ്ണര്‍ റണ്‍സൊന്നും എടുക്കാതെ പുറത്തായി. പിന്നാലെ 17 റണ്‍സുമായി വാട്‌സണും,38 റണ്‍സുമായി എഡ്‌കോവനും,രണ്ടു റണ്‍സ്‌ മാത്രമായി മാത്യുവെയ്‌ഡും, 10 റണ്‍സുമായി ഗ്ലൈന്‍ മാക്‌സ്വെല്ലും പുറത്തായി. സ്‌മിത്ത്‌ 46 റണ്‍സുമായാണ്‌ ഔട്ടായത്‌. ഇന്ത്യന്‍ നിരയില്‍ ശിഖര്‍ ധവാനു പകരം അജിന്‍ക്യാ രഹാനേയെ ഉള്‍പ്പെടുത്തി. രഹാനയുടെ അരങ്ങേറ്റ ടെസ്റ്റ്‌ മത്സരമാണിത്‌.