ശ്രീലങ്കയ്ക്കെതിരായ രണ്ടാം ടെസ്റ്റില്‍ വിജയം നേടി 2-0ന് പരമ്പര തൂത്തുവാരാനും, ഒപ്പം ഐസിസി ലോക ടെസ്റ്റ് ചാമ്പ്യന്‍ഷിപ്പില്‍ നില മെച്ചപ്പെടുത്താനും ഇന്ത്യ ഇറങ്ങുന്നു.

മൂന്ന് വര്‍ഷത്തിന് ശേഷം വിദേശ മണ്ണില്‍ ഒരു ടെസ്റ്റ് പരമ്പര വിജയം സ്വന്തമാക്കുക എന്ന ലക്ഷ്യത്തോടെയാണ് ശുഭ്മന്‍ ഗില്ലും സംഘവും സിംഹളീസ് സ്‌പോര്‍ട്‌സ് ക്ലബ് ഗ്രൗണ്ടില്‍ ഇന്ന് രാവിലെ 10ന് ആരംഭിക്കുന്ന മത്സരത്തിന് ഇറങ്ങുന്നത്. ഗാലെയില്‍ നടന്ന ആദ്യ ടെസ്റ്റില്‍ 165 റണ്‍സിന്റെ ആധികാരിക ജയം നേടിയാണ് ഇന്ത്യ പരമ്പരയില്‍ 1-0ത്തിന് മുന്നിലെത്തിയത്. ഈ വിജയം ഇന്ത്യന്‍ ടീമിനും മുഖ്യ പരിശീലകന്‍ ഗൗതം ഗംഭീറിനും വലിയ ആശ്വാസമാണ് നല്‍കിയിരിക്കുന്നത്.

രണ്ടാം ടെസ്റ്റില്‍ ഇന്ത്യ തന്നെയാണ് ഫേവറിറ്റുകളെങ്കിലും, ക്യാപ്റ്റന്‍ ശുഭ്മന്‍ ഗില്ലില്‍ നിന്നും ഓപ്പണര്‍ യശസ്വി ജയ്‌സ്വാളില്‍ നിന്നും വലിയൊരു ഇന്നിങ്‌സ് ടീം പ്രതീക്ഷിക്കുന്നുണ്ട്. നായകനായി ചുമതലയേറ്റ ശേഷമുള്ള ഗില്ലിന്റെ ഫോം മികച്ചതാണെങ്കിലും, ഇടംകൈയ്യന്‍ സ്പിന്നര്‍മാര്‍ക്കെതിരെയുള്ള അദ്ദേഹത്തിന്റെ പ്രകടനം ആശങ്കയുണ്ടാക്കുന്നുണ്ട്. ഗാലെ ടെസ്റ്റില്‍ പ്രഭാത് ജയസൂര്യയുടെ പന്തില്‍ രണ്ട് ഇന്നിങ്‌സുകളിലും ഗില്‍ പുറത്തായിരുന്നു. ഈ ദൗര്‍ബല്യം മറികടന്ന് മികച്ചൊരു ഇന്നിങ്‌സ് കളിക്കാനായാല്‍ അത് ഗില്ലിന്റെ ക്യാപ്റ്റന്‍സി കരിയറിലെ മറ്റൊരു നാഴികക്കല്ലാകും. മറുവശത്ത്, ഓപ്പണര്‍ യശസ്വി ജയ്‌സ്വാളും തന്റെ സ്ഥിരത വീണ്ടെടുക്കാനുള്ള തീവ്ര ശ്രമത്തിലാണ്.

പ്ലേയിങ് ഇലവനില്‍ കുല്‍ദീപ് യാദവിന്റെ കാര്യത്തില്‍ അനിശ്ചിതത്വം നിലനില്‍ക്കുന്നുണ്ട്. ഗാലെയില്‍ പ്രതീക്ഷിച്ചത്ര തിളങ്ങാനായി ഇടംകൈയ്യന്‍ സ്പിന്നറായ കുല്‍ദീപിന് സാധിച്ചിരുന്നില്ല. ശ്രീലങ്കന്‍ നിരയില്‍ നിരവധി ഇടംകൈയ്യന്‍ ബാറ്റര്‍മാരുള്ളതിനാല്‍ അദ്ദേഹത്തിന് പകരം ഓഫ് സ്പിന്നര്‍ സാരന്‍ഷ് ജെയിനെ ടീമില്‍ ഉള്‍പ്പെടുത്താനായി സാധ്യതയുണ്ടോ എന്ന ചര്‍ച്ചകളും സജീവമാണ്.
അതേസമയം തിരിച്ചുവരവ് ലക്ഷ്യമിട്ടാണ് ശ്രീലങ്ക തയ്യാറെടുക്കുന്നത്.