ബ്രസീല്‍ താരം റൊണാള്‍ഡീഞ്ഞോ വ്യാജ പാസ്‌പോര്‍ട്ടുമായി അറസ്റ്റില്‍
വ്യാജ പാസ്‌പോര്‍ട്ടുമായി യാത്ര ചെയ്യാനുള്ള ശ്രമത്തിനിടെ ബ്രസീലിയന്‍ സൂപ്പര്‍താരം റൊണാള്‍ഡീഞ്ഞോ പാരഗ്വായില്‍ അറസ്റ്റിലായതായി റിപ്പോര്‍ട്ട്.
2002-ല്‍ ലോകകപ്പ് നേടിയ ബ്രസീല്‍ ടീമില്‍ അംഗമായിരുന്ന മുപ്പത്തൊന്‍പതുകാരനായ റൊണാള്‍ഡീഞ്ഞോ സ്പാനിഷ് ക്ലബ് ബാര്‍സിലോനയുടെയും ഫ്രഞ്ച് ക്ലബ് പിഎസ്ജിയുടെയും മിന്നും താരമായിരുന്നു.
റൊണാള്‍ഡീഞ്ഞോയും സഹോദരന്‍ റോബര്‍ട്ടോയും പാരഗ്വായ് പൗരന്‍മാരാണെന്ന് തെളിയിക്കുന്ന വ്യാജ യാത്രാ രേഖകളുമായി അറസ്റ്റിലായ വിവരം പാരഗ്വായ് ആഭ്യന്തര മന്ത്രാലയം സ്ഥിരീകരിച്ചു. പാരഗ്വായില്‍ ഇരുവരും താമസിച്ചിരുന്ന ഹോട്ടലില്‍നിന്ന് വ്യാജ രേഖകള്‍ പിടിച്ചെടുത്തതായാണ് വിവരം.
പാരഗ്വായിലെ പ്രശസ്തനായ കാസിനോ ഉടമ നെല്‍സണ്‍ ബെലോട്ടി റൊണാള്‍ഡിഞ്ഞോയെയും സഹോദരനെയും പാരഗ്വായിലേക്ക് ക്ഷണിച്ചിരുന്നതായി പൊലീസും സ്ഥിരീകരിച്ചു. പാരഗ്വായ് സന്ദര്‍ശനത്തിന്റെ ഭാഗമായി രാജ്യത്തിന്റെ വിവിധ ഭാഗങ്ങളില്‍ ഒട്ടേറെ പൊതുപരിപാടികളിലും റൊണാള്‍ഡീഞ്ഞോ പങ്കെടുക്കേണ്ടതായിരുന്നു.
2018-ല്‍ പരിസ്ഥിതി നിയമ ലംഘനവുമായി ബന്ധപ്പെട്ട് റൊണാള്‍ഡീഞ്ഞോയുടെ ബ്രസീലിയന്‍ പാസ്‌പോര്‍ട്ട് റദ്ദാക്കിയിരുന്നു. ഈ സാഹചര്യത്തിലാണ് പാരഗ്വായിലേക്ക് കടക്കാന്‍ താരം വ്യാജ രേഖകള്‍ ഉപയോഗിച്ചത്.
https://www.facebook.com/Malayalivartha
