വടക്കന്‍ മാസിഡോണിയയുടെ പ്രതിരോധത്തില്‍ തട്ടിവീണ ഇറ്റലി 2022ലെ ഖത്തര്‍ ലോകകപ്പിനു യോഗ്യത നേടാനാകാതെ പുറത്ത്. ഇറ്റലിയുടെ സ്വന്തം മൈതാനത്ത് ഇന്നു പുലര്‍ച്ചെ നടന്ന യൂറോപ്യന്‍ പ്ലേ ഓഫ് സെമിയില്‍ എതിരില്ലാത്ത ഒരു ഗോളിന് തോറ്റതോടെയാണ് ഇറ്റലി പുറത്തായത്.

മത്സരത്തിന്റെ അധികസമയത്ത് വീണ ഗോളാണ് യൂറോകപ്പ് ചാമ്പ്യന്മാരായ ഇറ്റലിയുടെ ലോകകപ്പ് സ്വപ്നങ്ങള്‍ക്കു അന്ത്യം കുറിച്ചത്.

92-ാം മിനിറ്റില്‍ അലക്‌സാണ്ടര്‍ ട്രാജ്‌കോവിസ്‌കിയാണ് മാസിഡോണിയയുടെ വിജയ ഗോള്‍ നേടിയത്. തുടര്‍ച്ചയായ രണ്ടാം തവണയാണ് ഇറ്റലി ലോകകപ്പ് യോഗ്യത നേടാനാകാതെ പുറത്താകുന്നത്.

കഴിഞ്ഞ തവണ സ്വീഡനോട് പ്ലേഓഫ് പരാജയപ്പെട്ടു റഷ്യന്‍ ലോകകപ്പിനു പുറത്തായ ഇറ്റലിയുടെ ഫുട്‌ബോള്‍ ചരിത്രത്തിലെ കറുത്ത അധ്യായമായി ഇത് മാറി.