ഇന്ത്യന്‍ സൂപ്പര്‍ ലീഗ് ഫുട്‌ബോള്‍ എട്ടാം സീസണ്‍ കിക്കോഫിന് ഇനി ദിവസങ്ങള്‍ ബാക്കി. 11 ടീമുകളിലായി 66 വിദേശതാരങ്ങളാണ് ബൂട്ടുകെട്ടുന്നത്. ഇതില്‍ 29 പേര്‍ സൂപ്പര്‍ലീഗില്‍ മുമ്പ് കളിച്ചവരാണ്. 37 വിദേശതാരങ്ങള്‍ ഇക്കുറി ലീഗില്‍ അരങ്ങേറും.

സൂപ്പര്‍ ലീഗിലേക്കെത്തിയ വിദേശതാരങ്ങളുടെ കരാര്‍ത്തുക ക്ലബ്ബുകള്‍ സാധാരണയായി പുറത്തുവിടാറില്ല. എന്നാല്‍, വിപണിമൂല്യത്തിന്റെ അടിസ്ഥാനത്തില്‍ ക്ലബ്ബ് നല്‍കിയ തുക ഏറക്കുറെ വ്യക്തമാകും. കഴിഞ്ഞ സീസണിലെപ്പോലെ വിപണിമൂല്യത്തില്‍ കേരള ബ്ലാസ്റ്റേഴ്‌സിന്റെ യുറഗ്വായ് മധ്യനിരതാരം അഡ്രിയന്‍ ലൂണയാണ് ഒന്നാമത്. ഏഴു കോടിയോളം രൂപയാണ് ലൂണയുടെ വിപണിമൂല്യം. കരിയറില്‍ 12.49 കോടിയോളം രൂപവരെ മൂല്യമുണ്ടായിരുന്ന താരമാണ് ലൂണ.

കഴിഞ്ഞ സീസണില്‍ വിവിധ ടീമുകളിലായി കളിച്ച ആറ് താരങ്ങളാണ് കൂടുതല്‍ വിപണിമൂല്യമുള്ള താരങ്ങളുടെ പട്ടികയില്‍ ആദ്യ പത്തു സ്ഥാനത്തുള്ളത്. കൊല്‍ക്കത്ത ക്ലബ്ബ് എ.ടി.കെ മോഹന്‍ ബഗാന്‍ ടീമിലേക്ക് പുതുതായെത്തിച്ച അറ്റാക്കിങ് മിഡ്ഫീല്‍ഡര്‍ ദിമിത്രി പെട്രാടോസാണ് രണ്ടാമത്. ബഗാന്റെ ഫ്രഞ്ച് താരം ഹ്യൂഗോ ബൗമാസ് മൂന്നാമതും. ബ്ലാസ്റ്റേഴ്‌സില്‍നിന്ന് ആദ്യപത്തില്‍ വേറെ താരങ്ങളില്ല. യുക്രൈന്‍ മധ്യനിരതാരം ഇവാന്‍ കലുയൂഷ്‌നി 3.33 കോടി രൂപയുടെ മൂല്യവുമായി 11ാം സ്ഥാനത്തുണ്ട്.

വിപണിമൂല്യം

(താരം, ക്ലബ്ബ്, തുക)

അഡ്രിയന്‍ ലൂണ ബ്ലാസ്റ്റേഴ്‌സ് 7.02*

ദിമിത്രി പെട്രാടോസ് ബഗാന്‍ 6.24

ഹ്യൂഗോ ബൗമാസ് ബഗാന്‍ 4.99

ഫ്‌ളോറന്റീന്‍ പോഗ്ബ ബഗാന്‍ 4.99

റോമെയ്ന്‍ ഫിലിപ്പോട്യൂസ് നോര്‍ത്ത് ഈസ്റ്റ് 4.16

ഇകര്‍ ഗുറെടെക്‌സാന എഫ്.സി. ഗോവ 4.16

യോര്‍ഗെ ഡയസ് മുംബൈ സിറ്റി 4.16

അലന്‍ കോസ്റ്റ ബെംഗളൂരു എഫ്.സി. 3.74

ടിറി ബഗാന്‍ 3.54

ജാവോ വിക്ടര്‍ ഹൈദരാബാദ് എഫ്.സി. 3.33

*തുക കോടി രൂപയില്‍