ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്സ് ഇന്നിറങ്ങും. പ്ലേ ഓഫില്‍ ബംഗളൂരു എഫ് സിയാണ് എതിരാളികള്‍. വൈകുന്നേരം് ഏഴരയ്ക്ക് ബംഗളൂരുവിലാണ് മത്സരം നടക്കുക.

നിര്‍ണായക മത്സരത്തില്‍ തുടര്‍ തോല്‍വികളില്‍ നിന്ന് കരകയറുക കൂടിയാണ് ബ്ലാസ്റ്റേഴ്സ് ലക്ഷ്യമിടുന്നത്. തുടര്‍വിജയങ്ങളുടെ ആത്മവിശ്വാസത്തില്‍ ബംഗളൂരൂ എഫ് സി. ബംഗളൂരു അവസാന എട്ട് കളിയിലും ജയിച്ചപ്പോള്‍ ബ്ലാസ്റ്റേഴ്സ് അവസാന മൂന്ന് കളിയിലും തോറ്റു.
ഇതിനേക്കാള്‍ ബ്ലാസ്റ്റേഴ്സ് ആരാധകര്‍ക്ക് ആശങ്ക നല്‍കുന്നകാര്യം, എതിരാളികളുടെ തട്ടകത്തില്‍ ഇറങ്ങിയ അവസാന അഞ്ച് കളിയും തോറ്റതാണ്.

സസ്പെന്‍ഷനിലായ ഇവാന്‍ കലിയൂഷ്നി ഇല്ലാതെയാവും ബ്ലാസ്റ്റേഴ്സ് ഇറങ്ങുക. പ്രതിരോധനിര പഴുതുകള്‍ അടയ്ക്കുകയും മധ്യനിര സ്ട്രൈക്കര്‍ ദിമിത്രോസ് ഡയമന്റോക്കിസിന് ഗോളവസരം ഒരുക്കുകയും ചെയ്താലേ ബ്ലാസ്റ്റേഴ്സിന് ഇനി രക്ഷയുള്ളൂ. ഹോം ഗ്രൗണ്ടിലെ ആനുകൂല്യം മുതലെടുക്കാന്‍ ഇറങ്ങുന്ന ബംഗളുരൂ ഉറ്റുനോക്കുന്നത് റോയ് കൃഷ്ണ, സുനില്‍ ഛേത്രി, യാവി ഹെര്‍ണാണ്ടസ് എന്നിവരുടെ കാലുകളിലേക്ക്.


പ്രതിരോധനിരയെ നയിക്കാന്‍ സന്ദേശ് ജിംഗാനും ഗോള്‍വലയത്തിന് മുന്നില്‍ വിശ്വസ്തനായി ഗുര്‍പ്രീത് സന്ധുവുമുണ്ട്. സീസണില്‍ കൊച്ചിയില്‍ ഏറ്റുമുട്ടിയപ്പോള്‍ ബ്ലാസ്റ്റേഴ്സ് രണ്ടിനെതിരെ മൂന്ന് ഗോളിന് ജയിച്ചു. ബെംഗളൂരുവില്‍ റോയ് കൃഷ്ണയുടെ ഒറ്റഗോളിനായിരുന്നു ഛേത്രിയുടേയും സംഘത്തിന്റെയും ജയം.

രണ്ടാംപാദത്തില്‍ ബംഗളൂരു ഒറ്റഗോളിന് ബ്ലാസ്റ്റേഴ്‌സിനെ വീഴ്ത്തി. ഇതോടെ ഇരുടീമുകളുടേയും ആരാധകര്‍ ഗാലറിയില്‍ ഏറ്റുമുട്ടുകയും ചെയ്തു. പ്ലേ ഓഫില്‍ വീണ്ടും നേര്‍ക്കുനേര്‍ വരുമ്പോള്‍ കളത്തിനകത്തും പുറത്തും ഒരുപോലും പോരാട്ടച്ചൂട് നിറയുന്നു.