ഐ.എസ്.എല്ലിലെ സംഭവബഹുലമായ സീസണിന് ഇന്ന് സമാപനം. എ.ടി.കെ മോഹന്‍ബഗാന്‍ മുന്‍ ജേതാക്കളായ ബംഗളൂരു എഫ്.സിയെ മഡ്ഗാവിലെ നെഹ്‌റു സ്റ്റേഡിയത്തില്‍ നടക്കുന്ന ഫൈനലില്‍ നേരിടും.

ഫൈനലിലേക്കുള്ള പാതയില്‍ തുടര്‍ച്ചയായ അഞ്ച് മത്സരങ്ങള്‍ ജയിച്ചാണ് ബഗാന്‍ മുന്നേറിയത്. ഇതില്‍ നാല് കളികളിലും ഗോള്‍ വഴങ്ങിയിരുന്നില്ല.17 ഗോളുകള്‍ മാത്രമാണ് സീസണില്‍ വഴങ്ങിയത്. പ്രതിരോധത്തിലെ കരുത്ത് തെളിയിച്ചാണ് ബഗാന്‍ കുതിക്കുന്നത്.

ക്യാപ്റ്റന്‍ പ്രീതം കോട്ടാലും ആസ്‌ട്രേലിയക്കാരന്‍ ബ്രണ്ടന്‍ ഹാമിലുമടങ്ങുന്ന എ.ടി.കെ ബഗാന്റെ പ്രതിരോധ ഭടന്മാര്‍ അത്യധ്വാനികളാണ്. സ്‌ലാവ്‌കോ ഡാമ്യാനോവിച്ചും ആശിഷ് റായിയും പ്രതിരോധത്തിലെ കരുത്തരാണ്.