യുവേഫ യൂറോ കപ്പ് യോഗ്യതാ റൗണ്ടില്‍ ലിച്ചെന്‍സ്റ്റീനെ നേരിട്ട പോര്‍ച്ചുഗലിനായി ഇരട്ടഗോള്‍ നേടി റൊണാള്‍ഡോയുടെ ഗംഭീര പ്രകടനം. ഹോം മത്സരത്തില്‍ പോര്‍ച്ചുഗല്‍ എതിരില്ലാത്ത നാലു ഗോളുകള്‍ക്ക് വിജയിച്ചു.

എട്ടാം മിനിറ്റില്‍ ജോവോ കാന്‍സലോയാണ് പോര്‍ച്ചുഗല്ലിന്റെ ഗോള്‍വേട്ട തുടങ്ങിയത്. ബെര്‍ണാര്‍ഡോ സില്‍വ (47') ഗോള്‍നില രണ്ടാക്കി. 51-ാം മിനിറ്റില്‍ പെനല്‍റ്റിയില്‍ നിന്ന് ലക്ഷ്യം കണ്ട റൊണാള്‍ഡോ, 63-ാം മിനിറ്റില്‍ വീണ്ടും ലക്ഷ്യം കണ്ടു.

ഇതോടെ പോര്‍ച്ചുഗല്‍ ജഴ്‌സിയില്‍ റൊണാള്‍ഡോയുടെ ഗോള്‍ നേട്ടം 120 ആയി ഉയര്‍ന്നു. 197 മത്സരങ്ങളില്‍ നിന്നാണ് പോര്‍ച്ചുഗസ് താരത്തിന്റെ നേട്ടം. വമ്പന്‍ ജയം നേടിയ പോര്‍ച്ചുഗല്‍ ജെ ഗ്രൂപ്പില്‍ ഒന്നാമതാണ്. ഞായറാഴ്ച നടക്കുന്ന രണ്ടാം മത്സരത്തില്‍ പോര്‍ച്ചുഗല്‍ ലക്‌സംബര്‍ഗിനെ നേരിടും.