സൂപ്പര്‍കപ്പ് ഫുട്ബോളിന് ഇന്ന് കോഴിക്കോട്ട് കിക്കോഫ്. കോര്‍പറേഷന്‍ ഇ എം എസ് സ്റ്റേഡിയത്തില്‍ വൈകിട്ട് അഞ്ചിന് ആദ്യമത്സരത്തില്‍ ബംഗളൂരു എഫ്സിയും ശ്രീനിധി ഡെക്കാന്‍ എഫ്സിയും എറ്റുമുട്ടും.

രാത്രി 8.30ന് നടക്കുന്ന രണ്ടാമത്തെ മത്സരം കേരള ബ്ലാസ്റ്റേഴ്സും ഐ ലീഗ് ചാമ്പ്യന്മാരായ പഞ്ചാബ് റൗണ്ട്ഗ്ലാസ് എഫ്സിയും തമ്മിലാണ്. സൂപ്പര്‍കപ്പിന്റെ മൂന്നാമത്തെ പതിപ്പാണ്. ഫെഡറേഷന്‍ കപ്പിനുപകരമായി 2018ല്‍ ആരംഭിച്ച സൂപ്പര്‍കപ്പില്‍ 16 ടീമുകള്‍ അണിനിരക്കും. 11 ഐഎസ്എല്‍ ടീമുകളും അഞ്ച് ഐ ലീഗ് ടീമുകളുമാണ്.

നാലുവീതം ടീമുകളുള്ള നാല് ഗ്രൂപ്പുകളായാണ് മത്സരങ്ങള്‍. ഗ്രൂപ്പ് ജേതാക്കള്‍ സെമിയിലെത്തും. ദിവസവും രണ്ടുവീതം മത്സരം നടക്കും. വൈകുന്നേരം അഞ്ചിനും രാത്രി 8.30നും. എ, സി ഗ്രൂപ്പ് മത്സരം കോഴിക്കോട് കോര്‍പറേഷന്‍ ഇ എം എസ് സ്റ്റേഡിയത്തിലും ബി, ഡി ഗ്രൂപ്പ് മത്സരം മഞ്ചേരി പയ്യനാട് സ്റ്റേഡിയത്തിലുമാണ്.

ഒന്നിടവിട്ട ദിവസങ്ങളിലാണ് ഇരു സ്റ്റേഡിയങ്ങളിലും മത്സരം ഉള്ളത്. ഫൈനല്‍ 25ന് രാത്രി 8.30ന് കോഴിക്കോട്ട് നടക്കും. പയ്യനാട് സ്റ്റേഡിയത്തില്‍ നാളെ വൈകിട്ട് അഞ്ചിന് നടക്കുന്ന ആദ്യ മത്സരത്തില്‍ ഹൈദരാബാദ് എഫ്സിയും ഐസ്വാളും എറ്റുമുട്ടും. രണ്ടാംമത്സരം രാത്രി എട്ടിന് ഒഡിഷ എഫ്സിയും ഈസ്റ്റ് ബംഗാളും തമ്മിലാണ് നടക്കുക.