ജയത്തോടെ മാഞ്ചസ്റ്റര്‍ യുനൈറ്റഡ് ഇംഗ്ലീഷ് പ്രീമിയര്‍ ലീഗ് പോയന്റ് പട്ടികയില്‍ മൂന്നാം സ്ഥാനത്തേക്ക് . 30ാം റൗണ്ടില്‍ നോട്ടിങ്ഹാം ഫോറസ്റ്റിനെ ഏകപക്ഷീയമായ രണ്ടു ഗോളുകള്‍ക്കാണ് യുനൈറ്റഡ് തോല്പിച്ചത്.

പോയന്റ് നിലയില്‍ ഒപ്പമുണ്ടായിരുന്ന ന്യൂകാസില്‍ യുനൈറ്റഡ് കഴിഞ്ഞദിവസം തോല്‍ക്കുകയും ചെയ്തതോടെ 59 പോയന്റുമായി എറിക് ടെന്‍ ഹാഗിന്റെ ടീം ഒറ്റക്ക് മൂന്നാമതെത്തി. ന്യൂകാസിലിന് 30 കളികളില്‍ 56 പോയന്റാണുള്ളത്. ആഴ്‌സനല്‍ (31 മത്സരങ്ങളില്‍ 74 പോയന്റ്), മാഞ്ചസ്റ്റര്‍ സിറ്റി (30 കളികളില്‍ 70 പോയന്റ്) ടീമുകളാണ് ഒന്നും രണ്ടും സ്ഥാനത്ത്.

ബ്രസീല്‍ വിംഗര്‍ ആന്റണിയുടെ മിന്നുംപ്രകടനമാണ് യുനൈറ്റഡ് വിജയം അനായാസമാക്കിയത്. ഒരു ഗോള്‍ (32ാം മിനിറ്റ്) നേടുകയും മറ്റൊന്നിന് അസിസ്റ്റ് നല്‍കുകയും ചെയ്തു ആന്റണി. ഡീഗോ ഡാലോട്ടിന്റെ വകയായിരുന്നു രണ്ടാം ഗോള്‍ (76).

സീസണിന്റെ തുടക്കത്തില്‍ വന്‍തുകക്ക് ടീമിലെത്തിയ ആന്റണിയുടെ ഒക്ടോബറിനുശേഷമുള്ള ആദ്യ പ്രീമിയര്‍ ലീഗ് ഗോളാണിത്. പ്രീമിയര്‍ ലീഗിലെ താരത്തിന്റെ ആദ്യ അസിസ്റ്റും. ഡാലോട്ടിന്റെയും പ്രീമിയര്‍ ലീഗിലെ കന്നി ഗോളായിരുന്നു ഇത്.

ഫസ്റ്റ് ചോയ്‌സ് സ്റ്റോപ്പര്‍ ബാക്കുകളായ റാഫേല്‍ വരാനെക്കും ലിസാന്‍ഡ്രോ മാര്‍ട്ടിനെസിനും പരിക്കേറ്റതിനാല്‍ ഹാരി മഗ്വയറെയും വിക്ടര്‍ ലിന്‍ഡലോഫിനെയും പ്രതിരോധ ചുമതല ഏല്പിച്ചാണ് യുനൈറ്റഡ് ഇറങ്ങിയത്.