സൗദി പ്രോ ലീഗില്‍ പോര്‍ച്ചുഗീസ് സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ അല്‍ നസ്റിന് ജയം. ഗോള്‍മഴ കണ്ട മത്സരത്തില്‍ അല്‍ അഹ്ലി സൗദിയെ മൂന്നിനെതിരെ നാല് ഗോളുകള്‍ക്കാണ് അല്‍ നസ്ര്‍ തോല്‍പ്പിച്ചത്.

ക്രിസ്റ്റ്യാനോ റൊണാള്‍ഡോ, ടലിസ്‌ക എന്നിവര്‍ അല്‍ നസ്‌റിനായി രണ്ട് ഗോളുകള്‍ വീതം നേടി. ഫ്രാങ്ക് കെസ്സി, റിയാദ് മഹ്‌റസ്, ഫെറാസ് അല്‍ബ്രിക്കന്‍ എന്നിവരാണ് അല്‍ അഹ്ലിയുടെ സ്‌കോറര്‍മാര്‍. കിക്കോഫായി നാലാം മിനുറ്റില്‍ ക്രിസ്റ്റ്യാനോ റൊണാള്‍ഡോയുടെ സൂപ്പര്‍ കൂള്‍ ഫിനിഷിംഗ് അല്‍ നസ്റിനെ മുന്നിലെത്തിച്ചിരുന്നു.

17-ാം മിനുറ്റില്‍ ടലിസ്‌ക അല്‍ നസ്റിന്റെ ലീഡ് രണ്ടായി ഉയര്‍ത്തി. മുപ്പതാം മിനുറ്റില്‍ ഫ്രാങ്ക് കെസ്സിയിലൂടെ അല്‍ അഹ്ലി തിരിച്ചടിച്ചെങ്കിലും ഇടവേളയ്ക്ക് പിരിയുന്നതിന് തൊട്ടുമുമ്പുള്ള ഇഞ്ചുറിടൈമില്‍(45+6) ടലിസ്‌ക അല്‍ നസ്റിനെ 3-1 എന്ന ഗോള്‍നിലയില്‍ എത്തിച്ചു.

പന്ത് കാല്‍ക്കല്‍ വെക്കുന്നതില്‍ മൃഗീയ ഭൂരിപക്ഷം ക്രിസ്റ്റ്യാനോയും സംഘവും കാട്ടിയെങ്കില്‍ ഷോട്ടുകളുടെ എണ്ണത്തിലും ടാര്‍ഗറ്റ് ഷോട്ടുകള്‍ ഉതിര്‍ക്കുന്നതിലും അല്‍ അഹ്ലിയായിരുന്നു മുന്നില്‍. ജയത്തോടെ ഏഴ് മത്സരങ്ങളില്‍ 15 പോയിന്റുമായി അഞ്ചാം സ്ഥാനത്താണ് അല്‍ നസ്ര്‍. ഇത്രതന്നെ പോയിന്റുള്ള അല്‍ അഹ്ലി സൗദി തൊട്ടുപിന്നില്‍ ആറാമത് നില്‍ക്കുന്നു. 18 പോയിന്റുമായി അല്‍ ഇത്തിഹാദ് തലപ്പത്ത് തുടരുകയാണ്. അല്‍ ഹിലാലാണ് രണ്ടാമത്.