സന്തോഷ് ട്രോഫി ഫുട്ബാളില്‍ തുടര്‍ച്ചയായ മൂന്നാം ജയവുമായി ഫൈനല്‍ റൗണ്ട് ഉറപ്പിച്ച് കേരളം. ഗ്രൂപ് എയിലെ മൂന്നാം മത്സരത്തില്‍ ഛത്തിസ്ഗഢിനെ എതിരില്ലാത്ത മൂന്നൂ ഗോളുകള്‍ക്കാണ് കേരളം വീഴ്ത്തിയത്. മത്സരത്തിന്റെ ഏഴാം മിനിറ്റില്‍ ഇ.എസ്. സജീഷിലൂടെ തന്നെ കേരളം ലീഡെടുത്തു.

55ാം മിനിറ്റില്‍ ജുനൈനും 69ാം മിനിറ്റില്‍ നായകന്‍ നിജോ ഗില്‍ബര്‍ട്ടും കേരളത്തിന്റെ ലീഡ് വര്‍ധിപ്പിച്ചു. ഗ്രൂപ്പിലെ മൂന്നു മത്സരങ്ങളും ജയിച്ച് ഒമ്പത് പോയന്റോടെ ഒന്നാമതാണ് കേരളം.

ചൊവ്വാഴ്ച ഗ്രൂപ്പിലെ അവസാന മത്സരത്തില്‍ ഗോവയാണ് കേരളത്തിന്റെ എതിരാളികള്‍. രണ്ടു കളികളില്‍ നാലു പോയന്റുമായി ഗോവ രണ്ടാമതും മൂന്നു മത്സരങ്ങള്‍ കളിച്ച ഗുജറാത്ത് നാലു പോയന്റുമായി മൂന്നാം സ്ഥാനത്തുമാണ്. ആറു ഗ്രൂപ്പിലെയും ജേതാക്കളും ഏറ്റവും മികച്ച മൂന്നു രണ്ടാം സ്ഥാനക്കാരുമാണ് ഫൈനല്‍ റൗണ്ടില്‍ പ്രവേശിക്കുക.