ലിവര്‍പൂളിനെ ഗോളടിക്കാതെ പിടിച്ചുകെട്ടിയ മാഞ്ചസ്റ്റര്‍ യുണൈറ്റഡിന് വിജയതുല്യമായ സമനില
ലിവര്‍പൂളിനെ ഗോളടിക്കാതെ പിടിച്ചുകെട്ടിയ മാഞ്ചസ്റ്റര്‍ യുണൈറ്റഡിന് വിജയതുല്യമായ സമനില തന്നെയായിരുന്നു ആന്‍ഫീല്‍ഡില്‍ കണ്ടത് (00). കളിയുടെ സമസ്ത മേഖലകളിലും മേധാവിത്തം ലിവര്‍പൂളിനായിരുന്നെങ്കിലും ഗോളാക്കാനായില്ല.
ഗോളെന്നുറച്ച നിരവധി ഷോട്ടുകള്‍ യുണൈറ്റഡിന്റെ വലയിലേക്ക് ഒന്നിന് പിറകെ ഒരോന്നായി പാഞ്ഞെങ്കിലും യുണൈറ്റഡിന്റെ കാമറൂണിയന്‍ ഗോള്‍ കീപ്പര്‍ അന്‍ഡ്രെ ഒനാനയെ മറികടന്ന് പോകാനായില്ല.
34 ഷോട്ടുകളാണ് ലിവര്‍പൂള്‍ യുണൈറ്റഡിന്റെ ഗോള്‍ മുഖത്തേക്ക് പായിച്ചത്. മറുവശത്ത് പ്രതിരോധത്തിലൂന്നിയ യുണൈറ്റഡ് രണ്ടാം പകുതിയില്‍ ഗോളിലേക്കെന്ന് തോന്നിച്ച കൗണ്ടര്‍ അറ്റാക്കുകള്‍ നടത്തിയെങ്കിലും വിഫലമായി. കളി തീരാന്‍ ഒരു മിനിറ്റ് ബാക്കിയുള്ളപ്പോള്‍ ഫൗളിന് വേണ്ടി വാദിച്ച യുണൈറ്റഡ് പ്രതിരോധ താരം ഡീഗോ ഡലോട്ടിന് റഫറി സെക്കന്‍ഡുകള്‍ക്ക് ഇടയില്‍ രണ്ട് മഞ്ഞ കാര്‍ഡ് കൊടുത്ത് റെഡ് നല്‍കി പുറത്താക്കി.
ഡാര്‍വിന്‍ ന്യൂനസ്, മുഹമ്മദ് സലാഹ്, ലൂയിസ് ഡയസ് എന്നിവരാണ് ലിവര്‍പൂളിന്റെ മുന്നേറ്റം നയിച്ചത്. റാസ്മസ് ഹോജ്‌ലന്‍ഡിനൊപ്പം അലെജാന്‍ഡ്രോ ഗാര്‍നാച്ചോ, സ്‌കോട്ട് മക്ടോമിനയ്, ആന്റണി എന്നിവരാണ് യുണൈറ്റഡിനായി മുന്നേറ്റ നിരയെ നയിച്ചത്.
"
https://www.facebook.com/Malayalivartha
