ഇഞ്ചുറി ടൈം ഗോളില്‍ സൗദിക്ക് ജയം.... ലീഫ സ്‌റ്റേഡിയത്തില്‍ നടന്ന ആവേശകരമായ മത്സരത്തില്‍ 2-1നാണ് സൗദി ഒമാനെ പരാജയപ്പെടുത്തിയത്.
14ാം മിനിറ്റിലെ പെനാല്‍റ്റി ഗോളിലൂടെ ലീഡ് നേടിയ ഒമാനെതിരെ, കളിയുടെ 78ാം മിനിറ്റില്‍ അബ്ദുല്‍റഹ്മാന്‍ ഗരീബും, ഇഞ്ചുറിടൈമിലെ അവസാന മിനിറ്റില്‍ അലി അബ്ദുല്ലയ്ഹിയും ആണ് ഗോള്‍ നേടി വിജയ ശില്‍പികളായത്.

ഖലീഫ ഇന്റര്‍നാഷണല്‍ സ്‌റ്റേഡിയത്തില്‍ നടന്ന മത്സരം കളത്തിലും ഗാലറിയിലും പുറത്തുമെല്ലാം ആവേശത്തിരമാല തീര്‍ക്കുന്നതായിരുന്നു. ഗാലറി നിറഞ്ഞുകവിഞ്ഞ 41,000ത്തിലേറെ വരുന്ന ആരാധകരുടെ നിലക്കാത്ത ആരവങ്ങള്‍ക്കു നടുവിലായിരുന്നു പോരാട്ടത്തിന് കിക്കോഫ് കുറിച്ചത്.

ലോകകപ്പില്‍ അര്‍ജന്റീനയെ അട്ടിമറിച്ച് ലോകഫുട്ബാളില്‍ മേല്‍വിലാസം ഉറപ്പിച്ച സൗദിയുടെ ആക്രമണങ്ങളെയെല്ലാം ഒമാന്‍ വരച്ച വരയില്‍ അവസാനിപ്പിക്കുന്നതാണ് ഗ്രൗണ്ടില്‍ കണ്ടത്. ഒമാന്റെ ഒരു ഗോള്‍ ലീഡോടെയാണ് ആദ്യ പകുതി പിരിഞ്ഞത്. രണ്ടാം പകുതിയില്‍ നിര്‍ണായകമായ ചില മാറ്റങ്ങളിലൂടെ സൗദി കളത്തെ സജീവമാക്കിയതിനു പിന്നാലെ 78ാം മിനിറ്റിലാണ് സമനില ഗോള്‍ പിറന്നത്. അല്‍ ഷെഹ്!രിക്ക് പകരക്കാരനായി കളത്തിലിറങ്ങി മൂന്നു മിനിറ്റിനുള്ളില്‍ വിജയ ഗോള്‍ നേടിക്കൊണ്ട് അബ്ദുല്‍റഹ്മാന്‍ ഗരീബ് സൗദിയുടെ താരമായി മാറി.

96ാം മിനിറ്റില്‍ കോര്‍ണര്‍ കിക്കിലൂടെയെത്തിയ അവസരം അലി അല്‍ ഔജാമിയുടെ ഹെഡ്ഡര്‍, പോസ്റ്റിനു മുന്നില്‍ നിന്ന് അലി അബ്ദുലയ്ഹി രണ്ടാം ടച്ചിലൂടെ വലയിലാക്കി. എന്നാല്‍, ഓഫ് സൈഡ് വിളിച്ച റഫറി ഗോള്‍ നിഷേധിച്ചതോടെ മിനിറ്റുകള്‍ നീണ്ട അനിശ്ചിതത്വമായി. ഒടുവില്‍, ഗോളില്ലെന്ന നിലയില്‍ പ്ലെ ഓണ്‍ ആയതിനു പിന്നാലെയാണ് വി.എ.ആറിലൂടെ ആ തീരുമാനമെത്തുന്നത്. ഓഫ് സൈഡ് തിരുത്തി, സൗദിക്ക് വിജയ ഗോളായി.