എഫ്.എ കപ്പിലെ നാലാം റൗണ്ട് പോരാട്ടത്തില്‍ മാഞ്ചസ്റ്റര്‍ യുനൈറ്റഡിന് തകര്‍പ്പന്‍ ജയം. ന്യൂപോര്‍ട്ട് കണ്‍ട്രിയെ രണ്ടിനെതിരെ നാല് ഗോളിനാണ് യുനൈറ്റഡ് വീഴ്ത്തിയത്.

കളി തുടങ്ങി ഏഴ് മിനിറ്റിനകം ബ്രൂണോ ഫെര്‍ണാണ്ടസിലൂടെ യുനൈറ്റഡ് മുന്നിലെത്തുകയും ചെയ്തു. ഇടതുവിങ്ങില്‍ നിന്ന് ആന്റണി നല്‍കിയ ക്രോസ് പോസ്റ്റിലേക്ക് വഴിതിരിച്ചു വിടേണ്ട ദൗത്യമേ ബ്രൂണോക്കുണ്ടായിരുന്നുള്ളൂ. ആറ് മിനിറ്റിനകം യുനൈറ്റഡ് രണ്ടാം ഗോളും നേടി. വലതുവിങ്ങില്‍ നിന്ന് ഡലോട്ട് നല്‍കിയ പാസ് കോബി മൈനൂ അനായാസം വലയിലെത്തിക്കുകയായിരുന്നു.

18ാം മിനിറ്റില്‍ ഗര്‍ണാച്ചോയുടെ തകര്‍പ്പന്‍ ഇടങ്കാലന്‍ ഷോട്ട് ക്രോസ് ബാറില്‍ തട്ടിത്തെറിച്ചത് ലീഡ് വര്‍ധിപ്പിക്കാനുള്ള അവസരം നഷ്ടമാക്കുകയായിരുന്നു. തുടര്‍ന്ന് ബ്രസീലിയന്‍ താരം ആന്റണിക്ക് രണ്ട് അവസരങ്ങള്‍ ലഭിച്ചെങ്കിലും മുതലാക്കാനായില്ല.36ാം മിനിറ്റില്‍ ന്യൂപോര്‍ട്ട് ഒരു ഗോള്‍ തിരിച്ചടിച്ചു. ബ്രയന്‍ മോറിസിന്റെ തകര്‍പ്പന്‍ ലോങ് റേഞ്ചര്‍ യുനൈറ്റഡ് താരം ലിസാന്‍ഡ്രൊ മാര്‍ട്ടിനസിന്റെ തലയില്‍ തട്ടി വലയില്‍ കയറുകയായിരുന്നു.

രണ്ടാം പകുതി തുടങ്ങി രണ്ട് മിനിറ്റിനകം ന്യൂപോര്‍ട്ട് സമനിലയും പിടിച്ചു. ഇടതുവിങ്ങില്‍നിന്ന് ആദം ലൂയിസ് നല്‍കിയ ക്രോസ് വില്‍ ഇവാന്‍സ് പോസ്റ്റിനുള്ളിലേക്ക് തട്ടിയിടുകയായിരുന്നു.ഇതോടെ പതറിയ യുനൈറ്റഡ് ഗോളിനായി ആഞ്ഞുപിടിച്ചു. 68ാം മിനിറ്റില്‍ അതിന് ഫലവും കണ്ടു. ലൂക് ഷോയുടെ ഷോട്ട് പോസ്റ്റില്‍ തട്ടിത്തെറിച്ചപ്പോള്‍ പന്ത് കിട്ടിയ ആന്റണി പിഴവില്ലാതെ ലക്ഷ്യത്തിലെത്തിക്കുകയായിരുന്നു.