ലോക അത്‌ലറ്റിക്‌ ചാമ്പ്യന്‍ഷിപ്പിന്റെ നൂറുമീറ്ററില്‍ 9.77 സെക്കന്റില്‍ ഫിനിഷ്‌ ചെയ്‌ത്‌ ജമൈക്കന്‍ താരം ഉസൈന്‍ ബോള്‍ട്ട്‌ ചാമ്പ്യന്‍ പട്ടം തിരിച്ചു പിടിച്ചു. 9.85 സെക്കന്റെടുത്ത്‌ ജസ്റ്റിന്‍ ഗാറ്റ്‌ലിന്‍ രണ്ടാമതെത്തി. മൂന്നാം സ്ഥാനം ജമൈക്കയുടെതന്നെ നെസ്‌റ്റാ കാര്‍ട്ടര്‍ക്കാണ്‌. കഴിഞ്ഞതവണ ഫാള്‍സ് സ്റ്റാര്‍ട്ടിനെത്തുടര്‍ന്ന് 100 മീറ്ററില്‍ അയോഗ്യനാക്കപ്പെട്ട ബോള്‍ട്ട് ഇക്കുറി കരുതലോടെയാണ് ഹീറ്റ്‌സിലും സെമിയിലും മത്സരിച്ചത്. ഹീറ്റ്‌സില്‍ കഴിഞ്ഞ ദിവസം 10.07 സെക്കന്‍ഡില്‍ ഫിനിഷ് ചെയ്ത ബോള്‍ട്ട് സെമിയില്‍ അമേരിക്കന്‍ താരം മൈക്ക് റോഡ്‌ജേഴ്‌സുയര്‍ത്തിയ കടുത്ത വെല്ലുവിളി മറികടന്നാണ് ഫൈനലിലേക്ക് മുന്നേറിയത്. സെമിയിലെ ഹീറ്റ്‌സില്‍ മത്സരിച്ച ബോള്‍ട്ട് 9.92 സെക്കന്‍ഡിലാണ് ഫിനിഷ് ചെയ്തത്.