വനിതാ ചെസ് ലോകകപ്പ് കിരീടം ആദ്യമായി ഇന്ത്യയിലേക്കെത്തിച്ച് ചരിത്രമെഴുതി 19കാരി ദിവ്യ ദേശ്മുഖ്. ജോര്‍ജിയയിലെ ബാത്തുമിയില്‍ ഇന്ത്യന്‍ താരങ്ങള്‍ മുഖാമുഖം വന്ന ഫൈനലില്‍ 38കാരിയായ കൊനേരു ഹംപിയുടെ പരിചയ സമ്പത്തിനെ ടൈബ്രേക്കറില്‍ വെട്ടി വീഴ്ത്തിയാണ് ദിവ്യ ചാമ്പ്യനായത്.

ടൈബ്രേക്കറിലെ ആദ്യ റാപ്പിഡ് ഗെയിമില്‍ സമനില പാലിച്ച ദിവ്യ രണ്ടാം റാപ്പിഡ് ഗെയിമില്‍ ജയം നേടിയാണ് ചരിത്രം സൃഷ്ടിച്ചത്. റാപ്പിഡ് ഫോര്‍മാറ്റിലെ ലോകചാമ്പ്യനായ ഹംപി വരുത്തിയ പിഴവാണ് ദിവ്യയ്ക്ക് അനുഗ്രഹമായി മാറിയത്. ശനിയാഴ്ചയും ഞായറാഴ്ചയുമായി നടന്ന ഫൈനലിലെ ക്‌ളാസിക് ഫോര്‍മാറ്റിലെ ആദ്യ രണ്ടു ഗെയിമുകളില്‍ സമനില പാലിച്ചതിനെ തുടര്‍ന്നാണ് ടൈബ്രേക്കറിലേക്ക് നീണ്ടത്. ലോകകപ്പ് നേട്ടത്തോടെ ഗ്രാന്‍ഡ് മാസ്റ്റര്‍ പദവിയും ദിവ്യയെ തേടിയെത്തി. 43ലക്ഷം രൂപയോളമാണ് ദിവ്യയ്ക്ക് പ്രൈസ് മണിയായി ലഭിക്കുന്നത്. 30 ലക്ഷത്തോളം രൂപ ഹംപിക്ക് ലഭിക്കും.

അതേസമയം ഇന്ത്യയുടെ 88-ാമത് ഗ്രാന്‍ഡ്മാസ്റ്ററാണ് ദിവ്യ ദേശ്മുഖ്. ഗ്രാന്‍ഡ് മാസ്റ്റര്‍ പട്ടം നേടുന്ന നാലാമത്തെ ഇന്ത്യന്‍ വനിതയുമാണ്.