തെലങ്കാനയിലെ വെങ്കണ്ണപാലത്ത് നഴ്സിങ് വിദ്യാർഥിനിയെ വീടിന് പുറത്ത് ദുരൂഹസാഹചര്യത്തിൽ മരിച്ചനിലയിൽ കണ്ടെത്തിയതിന്റെ ഞെട്ടലിലാണ് നാട്. വെങ്കണ്ണപാലം സ്വദേശിനിയും ഖമ്മത്തെ സ്വകാര്യ കോളേജിലെ ആദ്യവർഷ നഴ്സിങ് വിദ്യാർഥിനിയുമായ ഹരിണി (18) ആണ് ദാരുണമായി കൊല്ലപ്പെട്ടത്. പെൺകുട്ടിയുടെ മരണത്തിൽ ദുരൂഹതയുണ്ടെന്ന കുടുംബത്തിന്റെ ആരോപണങ്ങൾക്ക് പിന്നാലെയാണ് പൊലീസ് അന്വേഷണം ഇപ്പോൾ ഊർജ്ജിതമാക്കിയത്.

പെൺകുട്ടിയുടെ മൃതദേഹം പോസ്റ്റ്മോർട്ടത്തിന് അയച്ചതോടെയാണ് മരണത്തിലെ യഥാർത്ഥ കാരണം പുറത്തുവന്നത്. ശ്വാസംമുട്ടിയാണ് ഹരിണി മരിച്ചതെന്ന് പോസ്റ്റ്മോർട്ടം റിപ്പോർട്ടിൽ വ്യക്തമായിട്ടുണ്ട്. ഇതോടെ പെൺകുട്ടിയുടേത് കൊലപാതകമാണെന്ന നിഗമനത്തിൽ പൊലീസ് എത്തിച്ചേരുകയായിരുന്നു.

അവധിക്കാലത്ത് വീട്ടിലെത്തിയ ദുരന്തം

പഠന ആവശ്യങ്ങൾക്കായി കോളേജ് ഹോസ്റ്റലിൽ നിന്നിരുന്ന ഹരിണി അവധിക്കാലമായതിനാലാണ് ദിവസങ്ങൾക്ക് മുൻപ് സ്വന്തം വീട്ടിലെത്തിയത്. അച്ഛൻ നേരത്തേ മരിച്ചതിനാൽ ഹരിണിയും സഹോദരിയും അമ്മ രാജേശ്വരിയും മാത്രമാണ് ഈ വീട്ടിൽ താമസിച്ചിരുന്നത്. സന്തോഷത്തോടെ കഴിഞ്ഞിരുന്ന കുടുംബത്തിലേക്ക് അപ്രതീക്ഷിതമായാണ് ഈ ദുരന്ത വാർത്ത എത്തിയത്.

മൃതദേഹം കണ്ടെത്തിയത് കുളിമുറിയോട് ചേർന്ന്

കൂലിപ്പണിക്കാരിയായ അമ്മ രാജേശ്വരി കഴിഞ്ഞദിവസം വൈകീട്ട് ജോലി കഴിഞ്ഞ് വീട്ടിലെത്തിയപ്പോഴാണ് ഹരിണിയെ കാണാനില്ലെന്ന വിവരം അറിയുന്നത്. തുടർന്ന് സമീപപ്രദേശങ്ങളിൽ നടത്തിയ തിരച്ചിലിനൊടുവിൽ വീടിന് പുറത്തെ കുളിമുറിയോട് ചേർന്ന ഭാഗത്ത് ഹരിണിയെ മരിച്ചനിലയിൽ കണ്ടെത്തുകയായിരുന്നു.

അയൽക്കാർക്കെതിരെ കുടുംബത്തിന്റെ മൊഴി

സംഭവത്തിൽ അസ്വാഭാവിക മരണത്തിനാണ് പൊലീസ് ആദ്യം കേസെടുത്തിരുന്നത്. എന്നാൽ തങ്ങളുടെ മകളെ അപായപ്പെടുത്തിയതാണെന്നും, ഇതിനുപിന്നിൽ അയൽക്കാരായ ചിലർക്ക് പങ്കുണ്ടെന്നും ആരോപിച്ച് അമ്മ രാജേശ്വരി പൊലീസിന് നൽകിയ മൊഴി കേസിൽ നിർണായകമായി. ഇതിന് പിന്നാലെ പോസ്റ്റ്മോർട്ടം റിപ്പോർട്ട് കൂടി വന്നതോടെ കേസിൽ കൊലപാതകക്കുറ്റം കൂടി ചുമത്തുകയായിരുന്നു.

സംഭവവുമായി ബന്ധപ്പെട്ട് പ്രധാന പ്രതിയെന്ന് സംശയിക്കുന്നയാൾ നിലവിൽ ഒളിവിലാണെന്നാണ് പൊലീസ് നൽകുന്ന വിവരം. ഇയാളെ കണ്ടെത്താനായി പൊലീസ് വിവിധ സംഘങ്ങളായി തിരിഞ്ഞ് തിരച്ചിൽ ഊർജ്ജിതമാക്കിയിട്ടുണ്ട്.

കേസിന്റെ അന്വേഷണത്തിന്റെ ഭാഗമായി പ്രദേശവാസികളും സംശയിക്കപ്പെടുന്നവരുമായ ഒട്ടേറെപേരെ പൊലീസ് ഇതിനോടകം ചോദ്യം ചെയ്തിട്ടുണ്ട്. പ്രതികളെന്ന് സംശയിക്കുന്നവരെ എത്രയും വേഗം പിടികൂടാനായി തെരച്ചിൽ തുടരുകയാണെന്ന് കേസ് അന്വേഷിക്കുന്ന പൊലീസ് ഉദ്യോഗസ്ഥർ വ്യക്തമാക്കി.