തിരുവനന്തപുരം മുൻ മേയർ ആര്യ രാജേന്ദ്രനുമായുള്ള തർക്കത്തെ തുടർന്ന് ജോലി നഷ്ടപ്പെട്ട മുൻ കെഎസ്ആർടിസി ഡ്രൈവർ യദു നിയമസഭയുടെ ഔദ്യോഗിക വാഹനത്തിന്റെ ഡ്രൈവറായി ചുമതലയേറ്റത് കുറച്ചുകാലം മുമ്പാണ്. നിയമസഭയിൽ താൽക്കാലി ഡ്രൈവറായാണ് യദുവിനെ നിയമിച്ചത്. യദുവിന്റെ തുറന്നു പറച്ചിൽ തിരുവനന്തപുരത്ത് സിപിഎമ്മിന് കനത്ത പ്രഹരം നൽകിയിരുന്നു. അതുകൊണ്ട് തന്നെ യദു സിപിഎമ്മുകാരെ കണ്ണിലെ കരടാണ്. ഇപ്പോഴിതാ യുഡിഎഫ് നിയമസഭയിൽ താത്കാലിക ഡ്രൈവറായി നിയമിച്ച യദുവിനെതിരെ രംഗത്തു വന്നിരിക്കായാണ് നിയമസഭയിലെ ഇടതു ഉദ്യോഗസ്ഥരുടെ സംഘടന. കേരള ലെജിസ്ലേച്ചർ സെക്രട്ടേറിയറ്റ് സ്റ്റാഫ് അസോസിയേഷനാണ് യദുവിനെ പുറത്താക്കണം എന്നാവശ്യപ്പെട്ട രംഗത്തെത്തിയത്.

യദുവിനെ താത്കാലിക ഡ്രൈവറായി നിയമിച്ച നടപടി അടിയന്തരമായി പുനഃപരിശോധിക്കണമെന്ന് കേരള ലെജിസ്ലേച്ചർ സെക്രട്ടേറിയറ്റ് സ്റ്റാഫ് അസോസിയേഷൻ ആവശ്യപ്പെട്ടു. സംഘടനയുടെ വാർഷിക സമ്മേളനത്തോട് അനുബന്ധിച്ച പ്രവർത്തന റിപ്പോർട്ടിലാണ് ഇക്കാര്യം ഉൾപ്പെടുവിച്ചിരിക്കുന്നത്. സംഘടനയേക്കാൾ സിപിഎമ്മിലെ ചിലരുടെ താൽപ്പര്യമാണ് ഈ വിഷയത്തിൽ ഉണ്ടായിരിക്കുന്നത് എന്നാണ് വ്യ്ക്തമാകുന്നത്.

നേരത്തെ മുൻ സർക്കാരിന്റെ കാലത്ത് കെഎസ്ആർടിസിയിലെ താൽക്കാലിക ഡ്രൈവറുടെ ജോലി നഷ്ടപ്പെട്ടതിനെ തുടർന്ന്, തന്നെ ജോലിയിലേക്ക് തിരിച്ചെടുക്കണമെന്ന ആവശ്യവുമായി യദു രംഗത്തെത്തിയിരുന്നു. അന്നത്തെ ഗതാഗതമന്ത്രിക്ക് ഉൾപ്പെടെ യദു നേരിട്ട് കത്ത് നൽകുകയും ചെയ്തിരുന്നു. തനിക്കെതിരെ നടപടിയെടുത്ത സാഹചര്യത്തിൽ ഒന്നുകിൽ ജോലിയിൽ തിരിച്ചെടുക്കണം, അല്ലെങ്കിൽ ഔദ്യോഗികമായി പിരിച്ചുവിടണമെന്നായിരുന്നു യദു കത്തിൽ ആവശ്യപ്പെട്ടിരുന്നത്.

അന്ന് തിരുവനന്തപുരം മേയറായിരുന്ന ആര്യ രാജേന്ദ്രന്റെ സ്വകാര്യ വാഹനത്തിന് കെഎസ്ആർടിസി ബസ് സൈഡ് കൊടുത്തില്ലെന്ന് ആരോപിച്ചാണ് തർക്കങ്ങളുടെ തുടക്കം. പാളയത്തുവെച്ച് മേയറും കെഎസ്ആർടിസി ഡ്രൈവറായ യദുവും തമ്മിൽ നടുറോഡിൽ കടുത്ത വാക്പോര് നടക്കുകയായിരുന്നു. ഈ സംഭവം അന്ന് വലിയ രാഷ്ട്രീയ വിവാദങ്ങൾക്കാണ് വഴിവെച്ചത്.

പ്ലാമൂട്ടിൽ വെച്ച് ആദ്യം കെഎസ്ആർടിസി ബസ് കാറിനെ ഇടിക്കുന്ന രീതിയിൽ അപകടകരമായി ഓടിച്ചെന്നും തുടർന്ന് ഡ്രൈവർ അശ്ലീല ആംഗ്യം കാണിച്ചെന്നുമായിരുന്നു ആര്യ രാജേന്ദ്രന്റെ പ്രധാന പരാതി. എന്നാൽ, ഇത് തെറ്റാണെന്ന് വ്യക്തമായിരുന്നു. മേയറുടെ പരാതിയുടെ അടിസ്ഥാനത്തിൽ പൊലീസ് ഉടൻതന്നെ യദുവിനെതിരെ കേസെടുക്കുകയും കെഎസ്ആർടിസി ഇയാളെ ജോലിയിൽ നിന്ന് മാറ്റിനിർത്തുകയുമായിരുന്നു.

അതേസമയം, മേയർക്കും ഭർത്താവ് സച്ചിൻ ദേവ് എംഎൽഎയ്ക്കുമെതിരെ യദു നൽകിയ പരാതിയിൽ കേസെടുക്കാൻ പൊലീസ് ആദ്യം തയ്യാറായിരുന്നില്ല. തുടർന്ന് യദു കോടതിയെ സമീപിക്കുകയും കോടതി ഉത്തരവിനെ തുടർന്ന് മേയർക്കും ഭർത്താവിനുമെതിരെ പൊലീസ് കേസെടുത്തത്. ഈ നിയമപോരാട്ടങ്ങൾക്കെല്ലാം ഒടുനിലാണ് യുഡിഎഫ് സർക്കാർ അധികാരത്തിൽ എത്തിയപ്പോൾ യദുവിന് നിയമസഭയിൽ താത്കാലിക നിയമനം ലഭിച്ചിരിക്കുന്നത്.