ഇതെന്റെ രണ്ടാം ജന്മം... മൂന്നു മണിക്കൂര് അബോധാവസ്ഥയില് കിടന്നു; ഞാന് മരിച്ചുവെന്ന് പരിശീലകന് ഇന്ത്യന് സംഘത്തെ വിളിച്ചു പറഞ്ഞു
ഇത് എന്റെ രണ്ടാം ജന്മമാണ്. ഒളിംപിക്സ് മാരത്തണില് ഫിനിഷ് ചെയ്തയുടന് തളര്ന്നുവീണ എനിക്കു ബോധമില്ലായിരുന്നു. മൂന്നു മണിക്കൂര് അബോധാവസ്ഥയില് കിടന്നു എന്നു പിന്നീട് അറിഞ്ഞു. ഇടയ്ക്കു പരിശീലകന് വന്നു നോക്കുമ്പോള് പള്സ് പോലും ഇല്ലായിരുന്നത്രെ. ഞാന് മരിച്ചുവെന്നാണ് അദ്ദേഹം ഇന്ത്യന് സംഘത്തെ വിളിച്ചു പറഞ്ഞത്... ഇത് പറയുന്നത് റിയോയില് മാരത്തണ് മല്സരത്തിനിടെ കുടിക്കാന് തുള്ളി വെള്ളംപോലും കിട്ടാതെ ഇന്ത്യന് അധികൃതരുടെ അനാസ്ഥക്കിരയായ മലയാളിതാരം ഒ.പി.ജയ്ഷ. പനിയും ചുമയും മൂലം വിശ്രമത്തിലാണു ജയ്ഷ. സിക്ക വൈറസ് ബാധയുണ്ടോയെന്ന് ഇന്നലെ പരിശോധന നടത്തി. ഇല്ലെന്നു തെളിഞ്ഞു. ഇവിടെ സഹോദരിക്കൊപ്പം വിശ്രമത്തിലാണു ക്ഷീണിതയായ ജയ്ഷ.
മാരത്തണില് 89ാമതായിരുന്നു ജയ്ഷയുടെ ഫിനിഷ്. ഒപ്പം മല്സരിച്ച കവിത റൗത്ത് 120ാം സ്ഥാനത്തും. 42 കിലോമീറ്ററാണു മാരത്തണിന്റെ ദൈര്ഘ്യം. മല്സരം നടക്കുമ്പോള് റിയോയില് 35 ഡിഗ്രി ചൂടായിരുന്നുവെന്നു ജയ്ഷ പറഞ്ഞു. 'റോഡിലൂടെ മല്സരം പുരോഗമിക്കുന്തോറും ചൂട് കൂടിവന്നു. ഓരോ എട്ടു കിലോമീറ്റര് കൂടുമ്പോഴാണു സംഘാടകര് വെള്ളം ക്രമീകരിച്ചിരുന്നത്. പക്ഷേ, അത്രയും പിടിച്ചുനില്ക്കാന് കഴിയാത്ത അവസ്ഥയായിരുന്നു. ഓരോ രണ്ടര കിലോമീറ്ററിലും അതതു രാജ്യങ്ങള്ക്കു വെള്ളവും പഴങ്ങളും വയ്ക്കാം. പക്ഷേ, ആ പോയിന്റുകളില് ഇന്ത്യയുടെ പേരെഴുതിയ ബോര്ഡല്ലാതെ മറ്റൊന്നുമുണ്ടായിരുന്നില്ല. മറ്റു രാജ്യക്കാര്ക്കായി വച്ചിരിക്കുന്ന വെള്ളമോ പഴങ്ങളോ എടുക്കാന് വൊളന്റിയര്മാര് സമ്മതിക്കില്ല. കുഴഞ്ഞു തളര്ന്ന് ഒരുവിധത്തിലാണു ഫിനിഷിലേക്കെത്തിയത്. ശരീരത്തിലെ ജലാംശം മുഴുവന് നഷ്ടപ്പെട്ടിരുന്നു.
'ഫിനിഷ് ചെയ്തതും ഞാന് തളര്ന്നുവീണു. പിന്നീടുള്ള കാര്യങ്ങള് മറ്റുള്ളവര് പറഞ്ഞാണ് അറിയുന്നത്. വൊളന്റിയര്മാര് എന്നെ ഒരു ക്ലിനിക്കിലേക്കു മാറ്റി. അവിടെ തണുത്ത വെള്ളത്തിലാണു ഡോക്ടര് എന്നെ കിടത്തിയത്. ഒരു കയ്യിലൂടെ ഗ്ലൂക്കോസും മറ്റേ കയ്യിലൂടെ സോഡിയവും കടത്തിവിട്ടു. ഡോക്ടര് ഇടയ്ക്കിടെ എന്റെ മുഖത്തു തട്ടുന്നുണ്ടായിരുന്നു. കണ്ണു തുറന്നുവെന്നല്ലാതെ എന്താണു സംഭവിക്കുന്നതെന്ന് എനിക്കറിയില്ലായിരുന്നു. അതിനിടയിലായിരിക്കണം എന്റെ പരിശീലകന് നിക്കൊളായ് സ്നസരേവ് അവിടെയെത്തിയത്. അദ്ദേഹം എന്റെ കയ്യില് പിടിച്ചു നോക്കിയപ്പോള് പള്സില്ലായിരുന്നു. ഉടന് അദ്ദേഹം ഇന്ത്യയുടെ മുഖ്യ പരിശീലകന് രാധാകൃഷ്ണന് നായരെ വിളിച്ചു പറഞ്ഞതു ജയ്ഷ മരിച്ചു, നിങ്ങള് വേഗം ഇവിടേക്ക് എത്തണമെന്നാണ്. ഡോക്ടര്മാരോടു വിവരങ്ങള് തിരക്കുന്നതിനിടെ നിയന്ത്രണം വിട്ട കോച്ചിനെ അധികൃതര് പുറത്താക്കി. രാധാകൃഷ്ണന് സാറും മറ്റുള്ളവരുമെത്തിയശേഷം എന്നെ ഗെയിംസ് വില്ലേജിലെ ക്ലിനിക്കിലേക്കു മാറ്റി. വൈകുന്നേരം മുതല് രാത്രി പത്തുവരെ എനിക്ക് അവിടെ കഴിയേണ്ടിവന്നു.'
ഇതുപോലൊരു സംഭവം ജീവിതത്തില് ആദ്യമാണെന്നു താരം പറഞ്ഞു. മാരത്തണ് ഓടാന് പറ്റില്ലെന്നറിയിച്ച് അത്ലറ്റിക് ഫെഡറേഷനും സായിക്കും താന് കത്തെഴുതിയിരുന്നു. പക്ഷേ, കോച്ച് സമ്മതിച്ചില്ല. 1500ല് മല്സരിച്ചു യോഗ്യത നേടാനുള്ള തന്റെ ശ്രമത്തെ നിക്കൊളായ് നിരുല്സാഹപ്പെടുത്തി. ഇനി ഒരിക്കലും മാരത്തണില് മല്സരിക്കുന്നില്ലെന്നും 1500ല് ദേശീയ റെക്കോര്ഡ് തിരുത്തിയശേഷം വിരമിക്കുകയാണു ലക്ഷ്യമെന്നും താരം പറഞ്ഞു.
https://www.facebook.com/Malayalivartha