മലേഷ്യയിലുണ്ടായ മിന്നൽപ്രളയത്തിൽ ഒഴുക്കിൽപ്പെട്ട് മരിച്ച മൂന്ന് മലയാളികളിൽ ഒരാളായ കണ്ണൂർ തലശ്ശേരി സ്വദേശിയുടെ മൃതദേഹം ഇന്ന് നാട്ടിലെത്തിക്കും...

മലേഷ്യയിലുണ്ടായ മിന്നൽപ്രളയത്തിൽ ഒഴുക്കിൽപ്പെട്ട് മരിച്ച മൂന്ന് മലയാളികളിൽ ഒരാളായ കണ്ണൂർ തലശ്ശേരി സ്വദേശി രഘുനാഥ് മണിക്കോത്തിന്റെ (48)ന്റെ മൃതദേഹം ഇന്ന് നാട്ടിലെത്തിക്കും...
രാത്രി 9.30-ന് ക്വാലാലംപൂരിൽ നിന്ന് പുറപ്പെടുന്ന മലേഷ്യൻ എയർലൈൻസ് വിമാനത്തിലാണ് മൃതദേഹം കൊച്ചിയിലെത്തിക്കുക.
തുടർന്ന് നോർക്കയുടെ പ്രത്യേക ആംബുലൻസിൽ സ്വദേശത്തെത്തിച്ച് നാളെ രാവിലെ പന്തക്കലിലുള്ള വീട്ടുവളപ്പിൽ സംസ്കാര ചടങ്ങുകൾ നടക്കും. അപകടത്തിൽ മരിച്ച എറണാകുളം പിറവം സ്വദേശി അനീഷ് കുഞ്ഞനമലയിൽ (35), കോഴിക്കോട് പേരാമ്പ്ര സ്വദേശി ലിനിൽ ചുണ്ടക്കാട്ടിൽ (44) എന്നിവരുടെ മൃതദേഹങ്ങൾ എത്രയും വേഗം നാട്ടിലെത്തിക്കാനുള്ള ശ്രമങ്ങൾ പുരോഗമിച്ചു വരുന്നു.
നവംബർ ഒൻപതിന് ദീപാവലി ആഘോഷത്തിന്റെ ഭാഗമായി റവാങ്ങിലെ സുങ്ഗായ് പെർത്താക് പിക്നിക് കേന്ദ്രത്തിന് സമീപം ഒത്തുകൂടിയ സംഘമാണ് അപകടത്തിൽപ്പെട്ടത്.
സുഹൃത്തുക്കൾ നദിയിൽ കുളിക്കുന്നതിനിടെ ഇരച്ചെത്തിയ കനത്ത മലവെള്ളപ്പാച്ചിലിൽ അകപ്പെടുകയായിരുന്നു. മലയാളികൾ ഉൾപ്പെടെ എട്ടുപേരാണ് ദുരന്തത്തിൽ മരിച്ചത്. തമിഴ്നാട് സ്വദേശിയും ശ്രീലങ്ക, യമൻ, മലേഷ്യ, നേപ്പാൾ എന്നീ രാജ്യങ്ങളിൽ നിന്നുള്ളവരും മരിച്ചവരിൽ ഉൾപ്പെടുന്നു.
സ്വകാര്യ കമ്പനിയിൽ മെഷീൻ ഓപറേറ്ററായിരുന്ന അനീഷ് ഒരു മാസം മുൻപാണ് സഹോദരന്റെ പുതിയ വീടിന്റെ ഗൃഹപ്രവേശനത്തിൽ പങ്കെടുത്ത് മടങ്ങിയത്.
https://www.facebook.com/Malayalivartha























