ഇന്ന് എല്ലാം ഡിജിറ്റല്‍ യുഗത്തിലേയ്ക്ക് മാറിയിരിക്കുകയാണ്. എല്ലാ പണമിടപാടുകള്‍ക്കും ഗൂഗിള്‍ പേ ഉപയോഗിക്കുന്നവരാണ് മിക്കവരും. ഒരു അക്കൗണ്ടില്‍ നിന്ന് എളുപ്പത്തില്‍ മറ്റൊരു അക്കൗണ്ടിലേയ്ക്ക് പണം കൈമാറാന്‍ ആകും എന്ന സവിശേഷതയാണ് മിക്കവരെയും ഗൂഗിള്‍ പേ ഉപയോക്താക്കളാക്കുന്നത്.

ഏത് ബാങ്ക് അക്കൗണ്ട് ഉടമകള്‍ക്കും ഞൊടിയിടക്കുള്ളില്‍ പണം അയക്കാം. എന്നാല്‍ ഇപ്പോഴിതാ ഗൂഗിള്‍ പേ ഉപയോക്താക്കള്‍ക്കായി പ്രത്യേക സ്ഥിരനിക്ഷേപ പദ്ധതികളും ഉടന്‍ ആരംഭിക്കും എന്ന സൂചന നല്‍കിയിരിക്കുകയാണ് കമ്പനി.

ബാങ്കില്‍ അക്കൗണ്ട് ഇല്ലെങ്കിലും ഗൂഗിള്‍പേ വാലറ്റ് ഉപയോഗിച്ച് ബാങ്കുകളില്‍ സ്ഥിരനിക്ഷേപത്തിന് അക്കൗണ്ട് തുറക്കാന്‍ ആകുന്ന സംവിധാനമാകും ആദ്യം ഗൂഗിള്‍ പേ ലഭ്യമാക്കുക. ഇക്വിറ്റാസ് സ്‌മോള്‍ ഫിനാന്‍സ് ബാങ്ക് പോലുള്ള സ്‌മോള്‍ ഫിനാന്‍സ് ബാങ്കുകളുമായി സഹകരിച്ചായിരിക്കും ആദ്യ ഘട്ടത്തില്‍ സേവനങ്ങള്‍ നല്‍കുക.

ഫിന്‍ടെക്ക് സ്റ്റാര്‍ട്ടപ്പായ സേതുവുമായി സഹകരിച്ചാകും ഇതിനുള്ള പ്ലാറ്റ്‌ഫോം ബാങ്ക് വികസിപ്പിക്കുക. ബില്‍പെയ്‌മെന്റുകള്‍ക്കും മറ്റ് പണമിടപാടുകള്‍ക്കും ഇപ്പോള്‍ സേതു ആപ്പ് ഉപയോഗിക്കുന്നുണ്ട്.

ഗൂഗിള്‍ പേ പ്ലാറ്റ്‌ഫോമിലൂടെ സ്ഥിരനിക്ഷേങ്ങള്‍ മുന്‍കൂട്ടി ബുക്ക് ചെയ്യാനുമാകും. ഒരു വര്‍ഷത്തെ സ്ഥിരനിക്ഷേപത്തിന് 6.35 ശതമാനം നിരക്കില്‍ പലിശ ലഭിക്കും എന്നതാണ് ആകര്‍ഷണം. ആധാര്‍ അധിഷ്ഠിത കെവൈസി വിവരങ്ങള്‍ കൈമാറുന്നവര്‍ക്കാണ് അക്കൗണ്ട് തുറക്കാന്‍ ആകുക. ഇതിന് ഒടിപി ലഭിക്കും.

ഏഴു ദിവസം മുതല്‍ 29 ദിവസം വരെയുള്ള കാലാവധിയിലും, 30-45 ദിവസ കാലാവധിയിലും, ഒരു വര്‍ഷം വരെയുള്ള വിവിധ കാലാവധിയിലും ഒക്കെ ദിവസം സ്ഥിരനിക്ഷേപം നടത്താന്‍ ആകും. 3.5 ശതമാനം മുതല്‍ ഒരു വര്‍ഷത്തെ എഫ്ഡിക്ക് 6.35 ശതമാനം വരെയാണ് പരമാവധി പലിശ ലഭിക്കുക.