പ്രീ-പെയ്ഡ് പേയ്‌മെന്റ് കാര്‍ഡുകളുടെ പരിധി ഇരട്ടിയാക്കി
പ്രീപെയ്ഡ് പണമിടപാടുകള്‍ സംബന്ധിച്ച മാനദണ്ഡങ്ങള്‍ റിസര്‍വ് ബാങ്ക് ഉദാരവത്കരിച്ചു. ഇതിന്റെ ഭാഗമായി പ്രീപെയ്ഡ് കാര്‍ഡുകളുടെ ഉയര്‍ന്ന പരിധി ഒരു ലക്ഷം രൂപയാക്കി ഉയര്‍ത്തി. നിലവിലിത് 50,000 രൂപയായിരുന്നു. പ്രീ-പെയ്ഡ് പേയ്‌മെന്റ് മാര്‍ഗങ്ങളിലെ ബാലന്‍സ് ഒരിക്കലും ഒരു ലക്ഷം കവിയരുതെന്ന് ആര്‍.ബി.ഐ. വ്യക്തമാക്കി.
നേരിട്ടുള്ള പണമിടപാടുകള്‍ കുറയ്ക്കാന്‍ സഹായിക്കുന്നതാണ് പ്രീപെയ്ഡ് ക്യാഷ് കാര്‍ഡുകള്‍. പല ബാങ്കുകളും ഇപ്പോള്‍ ഗിഫ്റ്റ് കാര്‍ഡുകളും പ്രീപെയ്ഡ് കാര്‍ഡുകളും ലഭ്യമാക്കുന്നുണ്ട്. ഇതിന്റെ കാലാവധി ഒരു വര്‍ഷം എന്നത് മൂന്നു വര്‍ഷമായി ഉയര്‍ത്തുകയും ചെയ്തു.
ഒരാള്‍ക്ക് ഒരു കാര്‍ഡ് മാത്രമേ നല്‍കാവൂവെന്ന് ബാങ്കുകള്‍ക്ക് നിര്‍ദേശം നല്‍കിയിട്ടുണ്ട്. എന്നാല്‍, ഒരു കുടുംബത്തിലെ ഒന്നിലേറെ പേര്‍ക്ക് പ്രീപെയ്ഡ് പേയ്‌മെന്റ് മാര്‍ഗങ്ങള്‍ അനുവദിക്കാം.
ഇന്ത്യയില്‍ സന്ദര്‍ശനത്തിനെത്തുന്ന വിദേശികള്‍ക്കും വിദേശ ഇന്ത്യക്കാര്‍ക്കും (എന്‍.ആര്‍.ഐ.) രൂപയുടെ അടിസ്ഥാനത്തിലുള്ള പ്രീപെയ്ഡ് കാര്‍ഡുകള്‍ നല്‍കാനും കേന്ദ്ര ബാങ്ക് അനുമതി നല്‍കി. എക്‌സ്‌ചേഞ്ച് ഹൗസുകള്‍, മണി റെമിറ്റന്‍സ് സ്ഥാപനങ്ങള്‍ എന്നിവയുമായി ചേര്‍ന്ന് കോ-ബ്രാന്‍ഡഡ് കാര്‍ഡുകളും ബാങ്കുകള്‍ക്ക് പുറത്തിറക്കാം.
https://www.facebook.com/Malayalivartha
