ലോകത്തിലെ ഏറ്റവും വലിയ ആഡംബര കപ്പലായ ടൈറ്റാനിക് നിര്‍മ്മിച്ച ഹര്‍ലന്‍ഡ് ആന്‍ഡ് വൂള്‍ഫ് പാപ്പര്‍ നടപടികള്‍ക്കുള്ള അപേക്ഷ സമര്‍പ്പിച്ചു. കമ്പനി വില്‍ക്കാന്‍ ശ്രമിച്ചെങ്കിലും പരാജയപ്പെട്ടതിനാലാണ് പാപ്പര്‍ നടപടികളിലേക്ക് നീങ്ങിയത്. നൊര്‍വീജിയന്‍ കമ്പനിയായ ഡോള്‍ഫിന്‍ ഡ്രില്ലിംഗിന്റെ ഉടമസ്ഥതയിലാണ് ഹര്‍ലന്‍ഡ് ആന്‍ഡ് വൂള്‍ഫ് പ്രവര്‍ത്തിക്കുന്നത്. 1861ല്‍ പ്രവര്‍ത്തനമാരംഭിച്ച ഹര്‍ലന്‍ഡ് ആന്‍ഡ് വൂള്‍ഫില്‍ രണ്ടാം ലോകമഹായുദ്ധ കാലത്ത് 30,000ല്‍പ്പരം ജീവനക്കാരുണ്ടായിരുന്നു. അര നൂറ്റാണ്ട് കഴിഞ്ഞപ്പോള്‍ ജീനക്കാരുടെ എണ്ണത്തില്‍ കുറവ് വരുത്തി.

വടക്കന്‍ അയര്‍ലന്‍ഡില്‍ സ്ഥിതിചെയ്യുന്ന ഷിപ്യാര്‍ഡിലെ തൊഴില്‍ നഷ്ടപ്പെടുമെന്ന ഭീതിയിലാണ് ജീവനക്കാര്‍. ജീവനക്കാരുടെ തൊഴിലുകള്‍ പ്രതിസന്ധിയിലാണെങ്കിലും ഷിപ്യാര്‍ഡ് അടച്ചുപൂട്ടാന്‍ സാധ്യതയില്ല. ഇന്ന് 130 ഫുള്‍ ടൈം ജീവനക്കാരും നിരവധി കരാര്‍ ജീവനക്കാരുമാണ് കമ്പനിക്കുള്ളത്. പ്രധാനമായും ഊര്‍ജ്ജ മറൈന്‍ എന്‍ജിനിയറിംഗ് പദ്ധതികളിലാണ് കമ്പനി ശ്രദ്ധകേന്ദ്രീകരിച്ചിരിക്കുക. ഷിപ്യാര്‍ഡിലെ ഒരു ഭാഗത്ത് ടൈറ്റാനിക്കിനുവേണ്ടി മാറ്റിവച്ച മ്യൂസിയം സ്ഥിതിചെയ്യുന്നുണ്ട്. ടൈറ്റാനിക് ഡിസൈന്‍ ചെയ്ത കെട്ടിടത്തില്‍ അടുത്തിടെ 4സ്റ്റാര്‍ ഹോട്ടല്‍ തുടങ്ങുകയും ചെയ്തു.

ഏറ്റവും വലിയ ആഡംബര കപ്പല്‍ എന്ന പേരില്‍ 1912 നീറ്റിലിറങ്ങിയ ടൈറ്റാനിക് കന്നിയാത്രയില്‍ത്തന്നെ തകര്‍ന്നപ്പോള്‍ 1500ല്‍പ്പരം പേരുടെ ജീവനാണ് പൊലിഞ്ഞത്. 1975 മുതല്‍ 1989 വരെയുള്ള കാലയളവില്‍ ഹര്‍ലന്‍ഡ് ആന്‍ഡ് വൂള്‍ഫ് സര്‍ക്കാര്‍ ഉടമസ്ഥതയിലായിരുന്നു.