വാഹനവിപണി വന്പ്രതിസന്ധിയിലേയ്ക്ക്
ചരിത്രത്തിലാദ്യമായി വാഹനവിപണി വലിയ മാന്ദ്യത്തിലേക്ക് കൂപ്പുകുത്തുകയാണെന്ന് റിപ്പോര്ട്ട്. രാജ്യത്തെ ഏറ്റവും വലിയ വാഹനനിര്മ്മാതാക്കളായ മാരുതി സുസുകി ഇന്ത്യ, ഹ്യുണ്ടായ് മോട്ടോര്, മഹീന്ദ്ര ആന്ഡ് മഹീന്ദ്ര, ടാറ്റാ മോട്ടോഴ്സ്, ഹോണ്ട തുടങ്ങിയ കമ്പനികളുടെ വാഹന വില്പനയിലാണ് വന് ഇടിവ് രേഖപ്പെടുത്തിയിരിക്കുന്നത്. ഓഗസ്റ്റില് രണ്ടക്ക ഇടിവാണ് കമ്പനികള് രേഖപ്പെടുത്തിയത്. ഇതോടെ ചരിത്രത്തിലെ ഏറ്റവും വലിയ മാന്ദ്യത്തിലേക്കാണ് വാഹനവിപണി നീങ്ങുന്നത്.
പ്രമുഖ വാഹനനിര്മാതാക്കളായ മാരുതി സുസുകിയുടെ വില്പന 32.7 ശതമാനമാണ് ഇടിഞ്ഞത്. മാരുതിയുടെ ആഭ്യന്തര വില്പനയില് ഇടിവ് 34.3 ശതമാനമാണ്. ആഭ്യന്തര വിപണിയില് കഴിഞ്ഞ വര്ഷം ഓഗസ്റ്റില് 1,47,700 വാഹനങ്ങള് വിറ്റ സ്ഥാനത്ത് പോയ മാസം ഇറങ്ങിയത് 97,061 വാഹനങ്ങള് മാത്രമാണ്. കോംപാക്ടസ് വിഭാഗത്തില് (സ്വിഫ്റ്റ്, സെലേറിയോ, ഇഗ്നിസ്, ബലേനോ, ഡിസയര്) ഇടിവ് 23.9 ശതമാനമാണ്.
മഹീന്ദ്ര ആന്ഡ് മഹീന്ദ്രയുടെ ആകെ വില്പന 48,321 എണ്ണത്തില്നിന്ന് 36,085 ആയി. ആഭ്യന്തര വിപണിയില് ഇടിവ് 26 ശതമാനമാണ്. യാത്രാവാഹന വിഭാഗത്തില് (യൂട്ടിലിറ്റി വാഹനങ്ങള്, കാറുകള്, വാനുകള്) വില്പന 32 ശതമാനം ഇടിഞ്ഞ് 13,507 ആയി. മുന്വര്ഷം 19,758 എണ്ണം വിറ്റിരുന്നു.
അതേസമയം, ടാറ്റാ മോട്ടോഴ്സിന് ഇടിവ് 58 ശതമാനമാണ്. ഹോണ്ട കാര്സ് ഇന്ത്യയും ടൊയോട്ട കിര്ലോസ്കര് മോട്ടോറും (ടി കെഎം) യഥാക്രമം 51 ശതമാനം, 21 ശതമാനം ഇടിവ് രേഖപ്പെടുത്തി. യാത്രാവാഹനങ്ങളുടെ വില്പനയില് 30 ശതമാനത്തോളം ഇടിവ് രേഖപ്പെടുത്തിയതിനൊപ്പം കൊമേഴ്സല്, ഇരുചക്ര വാഹന വില്പനയിലും ഗണ്യമായ ഇടിവുണ്ടായി.
https://www.facebook.com/Malayalivartha