രാജ്യത്ത് പെട്രോള്‍, ഡീസല്‍ വില കുറച്ചു. പെട്രോളിന് 22 പൈസയും ഡീസലിന് 24 പൈസയുമാണ് കുറച്ചത്. കൊച്ചിയില്‍ പെട്രോള്‍ വില 90.72 രൂപയാണ്. ഡീസലിന് 85.29 രൂപയും. കോഴിക്കോട് പെട്രോളിന് 91.02 രൂപയും ഡീസലിന് 85.59 രൂപയുമാണ്.

കഴിഞ്ഞ ആഴ്ചയും ഇന്ധനവിലയില്‍ നേരിയ കുറവ് രേഖപ്പെടുത്തിയിരുന്നു. പെട്രോളിനും ഡീസലിനും 21 പൈസ വീതമാണ് കുറഞ്ഞത്. ഫെബ്രുവരി 27നാണ് ഇന്ധന വില അവസാനം വര്‍ധിപ്പിച്ചത്.

അതേസമയം രാജ്യത്തിന്റെ പല ഭാഗങ്ങളിലും പെട്രോള്‍ വില നൂറ് കടന്നിരുന്നു. വില കുറഞ്ഞില്ലെങ്കില്‍ ചരക്ക് കടത്ത് കൂലി കൂടും. ഓരോ സാധനങ്ങള്‍ക്കും വില ഉയരുകയും ചെയ്യും. അത് രാജ്യത്ത് വലിയ പ്രതിഷേധത്തിന് ഇടയാക്കും. മാത്രമല്ല, സാമ്പത്തിക അടിത്തറ ഇളകുകയും ചെയ്യും. ഈ സാഹചര്യം ഒഴിവാക്കാനാണ് സൗദി അറേബ്യ ഉള്‍പ്പെടെയുള്ളവരോട് എണ്ണ വില കുറയ്ക്കാന്‍ നടപടി സ്വീകരിക്കണമെന്ന് ഇന്ത്യ ആവശ്യപ്പെട്ടത്. പക്ഷേ അതുണ്ടായില്ല.

മാത്രമല്ല, സൗദിയുടെ പ്രതികരണം അല്‍പ്പം പ്രകോപനപരമായിരുന്നു. കൊറോണ ശക്തിപ്പെട്ട കഴിഞ്ഞ മെയ് മാസത്തില്‍ എണ്ണ ബാരലിന് വില 20 ഡോളര്‍ ആയികുറഞ്ഞിരുന്നു. അന്ന് വന്‍തോതില്‍ എണ്ണ ഇന്ത്യ സംഭരിച്ചിട്ടുണ്ട്. ഇത് ഉപയോഗിച്ചോളൂ എന്നായിരുന്നു സൗദിയുടെ പ്രതികരണം. സൗദിയുടെ നയതന്ത്ര വിരുദ്ധമായ പ്രതികരണമാണ് എന്ന് ഇന്ത്യന്‍ എണ്ണ വകുപ്പ് മന്ത്രി ധര്‍മേന്ദ്ര പ്രധാന്‍ പറഞ്ഞു.

ഈ സാഹചര്യത്തില്‍ പശ്ചിമേഷ്യന്‍ രാജ്യങ്ങള്‍ക്ക് പുറത്തുള്ള എണ്ണ രാജ്യങ്ങളില്‍ നിന്ന് കൂടുതല്‍ ഇറക്കാന്‍ നടപടിയെടുക്കുകയാണ് ഇന്ത്യ. ഇതാകട്ടെ, സൗദിയെ പ്രകോപിപ്പിക്കുന്നതുമാണ്.

സൗദിയില്‍ നിന്ന് കൂടുതല്‍ എണ്ണ വാങ്ങുന്ന രണ്ടാമത്തെ രാജ്യമാണ് ഇന്ത്യ. എണ്ണ വില കുറയുന്നത് സൗദിയുടെ സാമ്പത്തിക രംഗത്ത ബാധിക്കും. വില കൂടുന്നത് ഇന്ത്യയുടെ സാമ്ബത്തിക മേഖലയെയും. വില കുറവില്‍ എവിടെ നിന്ന് ലഭിച്ചാലും എണ്ണ വാങ്ങുമെന്നാണ് മന്ത്രി ധര്‍മേന്ദ്ര പ്രധാന്‍ കഴിഞ്ഞ ദിവസം പറഞ്ഞത്.

അമേരിക്കയില്‍ നിന്ന് ഇന്ത്യ വാങ്ങുന്ന എണ്ണയുടെ അളവ് 2.11 മില്യണ്‍ മെട്രിക് ടണ്‍ ആയി ഉയര്‍ന്നിട്ടുണ്ട്.