രൂപയുടെ മൂല്യത്തിൽ വർധന. ഒരിടവേളയ്ക്ക് ശേഷം മൂല്യം ഉയർന്ന് രൂപ 90ൽ താഴെയെത്തി. വ്യാപാരത്തിന്റെ ആരംഭത്തിൽ 26 പൈസയുടെ നേട്ടം രേഖപ്പെടുത്തിയതോടെയാണ് ഒരു ഡോളറിന് 90 എന്ന നിലവാരത്തിലും താഴെയെത്തിയത്.

നിലവിൽ ഒരു ഡോളറിന് 89.92 എന്ന നിലയിലാണ് രൂപയുടെ മൂല്യം. ഡോളർ ദുർബലമായതും രാജ്യാന്തര വിപണിയിൽ എണ്ണ വില കുറഞ്ഞതുമാണ് രൂപയൂടെ മൂല്യത്തിൽ പ്രതിഫലിച്ചത്.

നാലുദിവസത്തെ നഷ്ടത്തിന് ശേഷം 12 പൈസയുടെ നേട്ടത്തോടെയാണ് ഇന്നലെ രൂപ ക്ലോസ് ചെയ്തത്. ഇത് ഇന്നും തുടരുന്ന കാഴ്ചയാണ് ദൃശ്യമായത്. ഇറക്കുമതി ചെയ്യുന്ന ഇന്ത്യൻ ഉൽപ്പന്നങ്ങൾക്ക് മേൽ താരിഫ് ഉയർത്തുമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെ ഭീഷണി നിലനിൽക്കുമ്പോഴാണ് രൂപയുടെ മുന്നേറ്റമുള്ളത്.

അതേസമയം ഓഹരി വിപണി നഷ്ടത്തിലാണ്. ചൊവ്വാഴ്ച നഷ്ടത്തോടെയാണ് ഓഹരി വിപണി ക്ലോസ് ചെയ്തത്. ഇത് ഇന്ന് വ്യാപാരത്തിന്റെ തുടക്കത്തിലും തുടരുന്നതാണ് കണ്ടത്. ബിഎസ്ഇ സെൻസെക്‌സ് 200 പോയിന്റാണ് താഴ്ന്നത്.