ചൈന പെട്രോള്‍, ഡീസല്‍ കാറുകളുടെ ഉത്പാദനവും വിപണനവും നിരോധിക്കുന്നു. അന്തരീക്ഷമലിനീകരണം കുറയ്ക്കുകയാണ് ഇതുകൊണ്ട് ലക്ഷ്യമിടുന്നതെന്ന് ടിയാന്‍ജിനില്‍ കാര്‍ ഫോറം ഉദ്ഘാടനംചെയ്ത് ചൈനീസ് വ്യവസായമന്ത്രി സിന്‍ ഗുവോബിന്‍ പറഞ്ഞു.

ലോകത്തെതന്നെ ഏറ്റവും വലിയ വാഹനവിപണിയാണ് ചൈനയുടേത്. ചില യുറോപ്യന്‍ രാജ്യങ്ങളുടെ പാത പിന്തുടര്‍ന്നാണ് പുതിയ നിയമം കൊണ്ടുവരുന്നത്. പ്രാബല്യത്തില്‍ വരുത്തുന്നത് സംബന്ധിച്ച പഠനങ്ങള്‍ ആരംഭിച്ചതായും മന്ത്രി അറിയിച്ചു.

നിര്‍ബന്ധിത നിരോധനം വേണോ എന്നതില്‍ തീരുമാനമായിട്ടില്ലെന്നും അദ്ദേഹം കൂട്ടിച്ചേര്‍ത്തു. നിരോധനം ആഭ്യന്തര വാഹനവിപണിക്ക് വന്‍ തിരിച്ചടിയാകുമെന്ന് ചൈനയുടെ വ്യവസായവകുപ്പ് ആശങ്കയറിയിച്ചു. കഴിഞ്ഞവര്‍ഷം 2.8 കോടി കാറുകളാണ് ചൈന ഉത്പാദിപ്പിച്ചത്. ലോകത്തിലെ മൊത്തം ഉത്പാദനത്തിന്റെ മൂന്നില്‍ ഒന്നാണിത്.

ചൈനയിലേക്ക് കൂടുതല്‍ ഇലക്ട്രിക് കാറുകള്‍ എത്തിക്കാനുള്ള നടപടികള്‍ മറ്റ് കാര്‍ നിര്‍മാതാക്കളായ റെനൊ-നിസാന്‍, ഫോര്‍ഡ്, ജനറല്‍ മോട്ടോഴ്‌സ് എന്നിവ ആരംഭിച്ചിട്ടുണ്ട്. 2025 ആകുന്നതോടെ ചൈനയിലെ നിരത്തിലെത്തുന്ന കാറുകളുടെ അഞ്ചില്‍ ഒന്ന് ഇലക്ട്രിക്, ഹൈബ്രിഡ് ആക്കാനുള്ള ശ്രമങ്ങളും കമ്പനികള്‍ നടത്തുന്നുണ്ട്.