ടോള് പ്ലാസയില് കാര്ഡ് തട്ടിപ്പ്; കാര്ഡ് ഉപയോഗിച്ചയാള്ക്ക് നഷ്ടമായത് 87000 രൂപ
പുണെ- മുംബൈ പാതയിലെ ടോള് പ്ലാസയില് 230 രൂപയുടെ ടോള് നല്കാന് കാര്ഡ് നല്കിയ ആള്ക്ക് അക്കൗണ്ടില് നിന്ന് 87,000 രൂപ നഷ്ടപ്പെട്ടു. പുണെയില് സെയില്സ് മാനേജറായ ദര്ശന് പാട്ടീല് എന്നയാളാണ് തട്ടിപ്പിനിരയായത്. ഈ മാസം ഒമ്പതിനായിരുന്നു സംഭവം.
പുണെയിലേക്കുള്ള യാത്രക്കിടെ പാട്ടീല് ഖലപുറിലെ ടോള് പ്ലാസയില് ടോള് നല്കുന്നതിനായി തന്റെ ഡെബിറ്റ് കാര്ഡ് സ്വവൈപ് ചെയ്യാന് നല്കി. വൈകുന്നേരം 6.27 ന് ടോള് പ്ലാസയില് നിന്ന് 230 അടച്ചതിന്റെ ബില് ലഭിക്കുകയും മൊബൈലില് സന്ദേശം എത്തുകയും ചെയ്തു. പിന്നീട് 8.31 ന് പാട്ടീലിന്റെ മൊബൈലിലേക്ക് വീണ്ടും സന്ദേശമെത്തി.
20,000 രൂപയുടെ സാധനം വാങ്ങിയതിന് പണം ഈടാക്കിയുള്ള സന്ദേശമായിരുന്നു ഇത്. തൊട്ടുപിന്നാലെ ഇത്തരത്തില് വിവിധ സാധനങ്ങള് വാങ്ങിയെന്ന് പറഞ്ഞ് ആറു സന്ദേശങ്ങള് കൂടി വന്നു. ആകെ 87,000 രൂപ അക്കൗണ്ടില് നിന്ന് നഷ്ടപ്പെട്ടെന്ന് പാട്ടീല് പറഞ്ഞു. ഇതും കൂടാതെ 100 രൂപയുടെ ഒരു ഇടപാടും പത്തു രൂപയുടെ മൂന്ന് ഇടപാടുകളും കൂടി കുറ്റവാളികള് നടത്തിയെന്നും പാട്ടീല് പറഞ്ഞു.
കാര്ഡ് ഉപയോഗിച്ചപ്പോള് പിന് നമ്പര് ആര്ക്കും നല്കിയിരുന്നില്ലെന്നും ഏതെങ്കിലും തട്ടിപ്പിലൂടെ പിന് നമ്പര് സ്വന്തമാക്കിയതാവാമെന്നും ദര്ശന് പറയുന്നു. ഇടപാടുകളിലൊന്നും വണ് ടൈം പാസ്വേര്ഡ് (ഒടിപി) നമ്പര് എത്തിയിരുന്നില്ല. ഇതെങ്ങനെ സംഭവിക്കുമെന്നും ദര്ശന് ചോദിക്കുന്നു.
പുണെ ഹദാപ്സര് പോലീസ് സ്റ്റേഷനിലും ബാങ്കിനും പരാതി നല്കിയിട്ടുണ്ട് ദര്ശനല് പാട്ടീല്. ഓണ്ലൈന് വഴിയുള്ള ഇടപാടുകളുടെ സുരക്ഷക്കായി വരാറുള്ള ഒറ്റത്തവണ പാസ്വേഡുകളൊന്നും പാട്ടീലിന്റെ മൊബൈലില് എത്തിയിട്ടില്ല.
https://www.facebook.com/Malayalivartha