ഒരു വര്‍ഷത്തിനിടെ ഏറ്റവും വില കൂടിയ ഭക്ഷ്യവസ്തു വെളിച്ചെണ്ണ. കഴിഞ്ഞ വര്‍ഷം ഓണത്തിന് വെളിച്ചെണ്ണയുടെ വില ലിറ്ററിന് 125 രൂപയായിരുന്നു. ഇപ്പോള്‍ ലിറ്ററിന് 225 (ക്വിന്റലിന് 9200 ല്‍ നിന്ന് 16600 ആയി).

കഴിഞ്ഞ ഓണത്തിന് ശേഷം വില താഴ്ന്നിരുന്നു. ഇതുവരെയുണ്ടായിരുന്ന പതിവ് തെറ്റിച്ച് വില ഓരോ ദിവസവും കുതിക്കുകയാണ്. ഈ തിരുവോണത്തിന് ക്വിന്റലിന് 15,700 ആയിരുന്നു. ഒരാഴ്ചകൊണ്ട് 900 രൂപ ഉയര്‍ന്ന് ഇപ്പോള്‍ 16600 ലെത്തിയിരിക്കുകയാണ്. ഇനിയുമുയരുമെന്നാണ് വിപണിയിലെ വിദഗ്ധരുടെ അഭിപ്രായം. വിലക്കയറ്റത്തിന് പല കാരണങ്ങളാണ് പറയുന്നത്.

തേങ്ങ വ്യാപകമായി ഉത്പാദിപ്പിക്കുന്ന പാലക്കാട് ജില്ലയില്‍ കൊടും വരള്‍ച്ച കാരണം ഉത്പാദനം 40 ശതമാനത്തോളം കുറഞ്ഞതായി വ്യാപാരികള്‍ പറയുന്നു. മറ്റ് ജില്ലകളിലും ഉത്പാദനം കുറഞ്ഞു. തമിഴ്‌നാട്ടിലും സമാന സ്ഥിതിയായിരുന്നു. തമിഴ്‌നാട്ടിനെ ഉണക്ക് കാര്യമായി ബാധിച്ചതിനാലാണ് നാളികേര ഉത്പാദനത്തില്‍ ഇത്തവണ കേരളത്തിന് ഒന്നാം സ്ഥാനത്ത് എത്താന്‍ കഴിഞ്ഞത്. തമിഴ്‌നാടിനെ ആശ്രയിച്ചാണ് കേരളത്തിലെ എണ്ണ മില്ലുകളുടേയും വെളിച്ചെണ്ണ കയറ്റുമതിയുടേയും നിലനില്പ്തന്നെ.

വെളിച്ചെണ്ണയില്‍ മായമുള്ളതിനാല്‍ ഗള്‍ഫ് ഉള്‍പ്പടെയുള്ള വിദേശരാജ്യങ്ങളിപ്പോള്‍ തേങ്ങ വാങ്ങി എണ്ണയാക്കുകയാണ്. ഇതിനായി അഞ്ചും പത്തും വര്‍ഷത്തേക്കുള്ള കരാറാണ് അവിടത്തെ വെളിച്ചെണ്ണ നിര്‍മാണ യൂണിറ്റുകളുമായി കേരളത്തിലെ കയറ്റുമതിക്കാര്‍ ഉണ്ടാക്കിയിരിക്കുന്നത്. കയറ്റുമതിക്കായി കേരകര്‍ഷകരുമായി ഉടമ്പടിയുണ്ടാക്കിയിരിക്കുന്നവര്‍ ഗുണമേന്മയുള്ള തേങ്ങ കയറ്റുമതി ചെയ്യുകയാണ്. ഇതിനാല്‍ ആഭ്യന്തര വിപണിയില്‍ ക്ഷാമവും വിലക്കയറ്റവും ഉണ്ടാകുന്നു.

തേങ്ങാപ്പൊടിയും റെഡിമെയ്ഡ് തേങ്ങാപ്പാലും ഉള്‍പ്പടെയുള്ള മൂല്യവര്‍ധിത ഉത്പന്നങ്ങള്‍ക്ക് ആഭ്യന്തര വിപണിയില്‍ത്തന്നെ ആവശ്യകത കൂടി. ഇത്തരം വസ്തുക്കള്‍ക്ക് വിദേശത്തും വന്‍ ആവശ്യക്കാരാണ്. ബെംഗളൂരു ഉള്‍പ്പടെയുള്ള സ്ഥലങ്ങളില്‍ ഇത്തരം കമ്പനികള്‍ ഏറെയുണ്ട്. ഇവിടേയ്ക്കാവശ്യമായ തേങ്ങ വന്‍ വില കൊടുത്ത് കേരളത്തില്‍നിന്ന് സംഭരിക്കുന്നുണ്ട്. സംഭരണത്തിനായി കര്‍ഷകരുമായി ഉടമ്പടിയുണ്ടാക്കുന്നതിനാല്‍ ആഭ്യന്തര വിപണിയില്‍ ലഭിക്കാതെ വരുന്നു. അത് വിലക്കയറ്റത്തിന് കാരണമാകുന്നു.

തേങ്ങയുടെ വിലയിടിയുമ്പോള്‍ തേങ്ങ താങ്ങുവിലയ്ക്ക് സംഭരിക്കുന്ന കേരഫെഡിന്റെ ഇടപെടല്‍ വിലക്കയറ്റം നിയന്ത്രിക്കുന്നതിലുണ്ടായില്ല. കേരഫെഡ് സംഭരിച്ച തേങ്ങ ഉപയോഗിച്ചുണ്ടാക്കുന്ന വെളിച്ചെണ്ണയുടെ വില വിലക്കയറ്റത്തിനനുസരിച്ച് കൂട്ടുകയും ചെയ്തു. എങ്കിലും വിപണി വിലയേക്കാള്‍ അല്പം കുറച്ചാണ് നല്കിയത്. കേരഫെഡ് സംഭരിച്ച തേങ്ങ തീര്‍ന്നു വരികയാണ്. അതിനാല്‍ വില അല്പമെങ്കിലും കുറഞ്ഞ കേര വെളിച്ചെണ്ണ അധികം താമസിയാതെ വിപണിയില്‍ ഇല്ലാതാകും.