സ്വകാര്യ സ്വാശ്രയ മെഡിക്കല്‍ കോളജുകള്‍ എംബിബിഎസ്‌, ഡന്റല്‍, ആയുര്‍വേദ, സിദ്ധ, യുനാനി എന്നീ വിഭാഗങ്ങളിലെ വിദ്യാര്‍ഥികളില്‍ നിന്നു കേരള ആരോഗ്യ സര്‍വകലാശാലയ്‌ക്കു നല്‍കാനായി പിരിച്ചെടുക്കുന്ന ഫീസ്‌ നിജപ്പെടുത്തിക്കൊണ്ട്‌ ജസ്‌റ്റിസ്‌ ജയിംസ്‌ കമ്മിറ്റി നിര്‍ദേശം നല്‍കി.
മേല്‍ വിഭാഗം ബിരുദ വിദ്യാര്‍ഥികളില്‍ നിന്നു റജിസ്‌ട്രേഷനും സര്‍ട്ടിഫിക്കറ്റ്‌ പരിശോധനയ്‌ക്കും തിരിച്ചറിയല്‍ കാര്‍ഡിനുമായി 1600 രൂപയും സര്‍വകലാശാല യൂണിയന്‍ ഫീസിനത്തില്‍ 400, സ്‌പോര്‍ട്‌സിനത്തില്‍ 400 ഉള്‍പ്പെടെ 2400 രൂപ ഒറ്റത്തവണ ഫീസായി പ്രവേശന സമയത്ത്‌ ഈടാക്കി സര്‍വകലാശാലയുടെ നിശ്‌ചിത അക്കൗണ്ടില്‍ അടയ്‌ക്കണം. ഇതേ വിഭാഗങ്ങളില്‍പ്പെട്ട ബിരുദാനന്തര ബിരുദ വിദ്യാര്‍ഥികളില്‍ നിന്നും യഥാക്രമം 2700, 400, 400 രൂപ വീതം മൊത്തം 3500 രൂപ ഈടാക്കാം. നഴ്‌സിങ്‌, ഫാര്‍മസി, പാരാമെഡിക്കല്‍, മറ്റു കോഴ്‌സുകള്‍ എന്നിവയ്‌ക്കു ബിരുദ വിദ്യാര്‍ഥികളില്‍ നിന്ന്‌ യഥാക്രമം 600, 200, 200 എന്നീ ഇനങ്ങളിലായി മൊത്തം 1000 രൂപയും, ബിരുദാനന്തര ബിരുദ വിദ്യാര്‍ഥികള്‍ യഥാക്രമം 800, 200, 200 രൂപ വീതം ആകെ 1200 രൂപയും ഒറ്റത്തവണയായി വാങ്ങാം.
എല്ലാ കോളജ്‌ അധികൃതരും അടുത്ത അധ്യയനവര്‍ഷത്തെ പ്രവേശനവുമായി ബന്ധപ്പെട്ടു പിരിച്ചിട്ടുള്ള തുകകളില്‍ കൂടുതലായവ വിദ്യാര്‍ഥികള്‍ക്കു തിരിച്ചു നല്‍കണമെന്നു ജസ്‌റ്റിസ്‌ ജയിംസ്‌ കമ്മിറ്റി നിര്‍ദേശിച്ചു. കൂടുതല്‍ വിവരങ്ങള്‍ക്ക്‌ www.asckerala.org എന്ന വെബ്‌സൈറ്റില്‍.