വിദേശത്തു നഴ്സിംഗ് ജോലിയിൽ പ്രവേശിക്കാൻ ആഗ്രഹിക്കുന്നവർക്ക് സന്തോഷമുള്ള വാർത്ത ... ഐ ഇ എൽ ടി എസ് സ്‌കോർ കുറയ്ക്കുന്നതിന് നഴ്‌സിങ് ആന്‍ഡ് മിഡൈ്വഫറി കൌണ്‍സിൽ (എന്‍.എം.സി) തീരുമാനിച്ചു . ഇനി മുതല്‍ രജിസ്‌ട്രേഷന്‍ യോഗ്യത നേടാൻ റൈറ്റിങ് വിഭാഗത്തിലെ സ്‌കോർ 6.5 മതി. മറ്റ് വിഭാഗങ്ങളായ സ്പീക്കിങ്, ലിസണിങ്, റീഡിങ് തുടങ്ങിയവയിൽ നിലവിലെ സ്‌കോർ ആയ 7 തന്നെ വേണം.
ഐ ഇ എൽ ടി എസ് പരീക്ഷയിൽ പലപ്പോഴും ആവശ്യമായ ഏഴോ അതിലധികമോ ഓവറാൾ സ്‌കോർ പലരും വളരെ ഈസി ആയി നേടാറുണ്ട്. . എന്നാൽ ഏറ്റവും പ്രയാസകരമായ റൈറ്റിങ് വിഭാഗത്തിൽ ആവശ്യമായ സ്‌കോർ 7 നേടാൻ ബഹുഭൂരിപക്ഷത്തിനും കഴിയാറില്ല. ഏഴോ എട്ടോ പ്രാവശ്യം എഴുതിയിട്ടും 6.5 എന്ന കടമ്പയിൽ തട്ടി വീഴുന്നവർ ഏറെയാണ്. ..ഇതിന് പരിഹാരമായാണ് എൻ എം സി പുതിയ നിർദ്ദേശങ്ങൾ മുന്നോട്ട് വെച്ചത് . അടുത്തയാഴ്ചയോടെ പുതിയ നിയമം നടപ്പിൽ വരുത്തും.

ഓവറോള്‍ സ്‌കോര്‍ ഏഴ് എന്നതില്‍ ഇപ്പോഴും മാറ്റമില്ല. ഐ.ഇ.എല്‍.ടി.എസ്. പരീക്ഷയുടെ കാലാവധി രണ്ടു വര്‍ഷമായതിനാല്‍ 2017 ജനുവരിക്കു ശേഷം പരീക്ഷയെഴുതി സമാനമായ സ്‌കോര്‍ നേടിയവര്‍ക്ക്, അതായത് റൈറ്റിങ്ങിൽ മാത്രം 6 .5 ഉം സ്പീക്കിങ്, ലിസണിങ്, റീഡിങ് എന്നിവയിൽ 7 ഉം ലഭിച്ചവർക്ക് ഉടന്‍ രജിസ്‌ട്രേഷന്‍ നടപടികള്‍ തുടങ്ങാം .
റൈറ്റിങ് സ്‌കോറില്‍ മാത്രം 0.5 പോയിന്റിന്റെ കുറവു വരുത്തുന്നത് ചെറിയ കാര്യമായി തോന്നാമെങ്കിലും ഈ പരീക്ഷയില്‍ ഇത് വളരെ നിർണായക നേട്ടമാണ്. ഒട്ടനവധി പേർക്ക് യു കെ നേഴ്സ് എന്ന സ്വപ്നം സാക്ഷാൽക്കരിക്കാൻ ഈ തീരുമാനം വഴിയൊരുക്കും.

ഐ.ഇ.എല്‍.ടി.എസിനൊപ്പം മറ്റു രണ്ടു പരീക്ഷകള്‍കൂടി പാസായാലേ യു.കെ. രജിസ്‌ട്രേഷന്‍ പൂർണമാകൂ. ഓണ്‍ലൈന്‍ കോംപിറ്റന്‍സി ടെസ്റ്റും പ്രാക്ടിക്കല്‍ പരീക്ഷയും. ഓണ്‍ലൈന്‍ കോംപിറ്റന്‍സി ടെസ്റ്റ് നാട്ടിൽ നിന്നും പ്രാക്ടിക്കല്‍ പരീക്ഷ ബ്രിട്ടനിലുമാണ് ചെയ്യേണ്ടത് . ഐ ഇ എൽ ടി എസ്സിനെ അപേക്ഷിച്ചു ഇത് രണ്ടും വളരെ നിസ്സാരമായ കടമ്പയാണ് .

എൻ എച്ച് എസ് ആശുപത്രികൾ ഉൾപ്പെടെ ബ്രിട്ടനിലെ ആരോഗ്യമേഖലയിൽ ഉണ്ടാകുന്ന നേഴ്‌സിംഗ് ജീവനക്കാരുടെ കുറവ്, ബ്രെക്സിറ്റ്‌ നടപ്പാകുന്നതോടെ ഇയു രാജ്യങ്ങളിൽ നിന്നുള്ള ജീവനക്കാരുടെ കൊഴിഞ്ഞുപോക്ക് തുടങ്ങിയ കാരണങ്ങളാണ് പ്രധാനമായും പുതിയ മാറ്റങ്ങൾക്ക് പിന്നിൽ. ആരോഗ്യമേഖലയില്‍ നാല്‍പതിനായിരത്തോളം നഴ്‌സുമാരുടെ ഒഴിവുകൾ ബ്രിട്ടനിൽ ഉണ്ട്.

ബ്രിട്ടനിൽ തന്നെ നേഴ്സുമാരായ നിരവധി മലയാളികൾ മതിയായ ഐ ഇ എൽ ടി എസ് സ്‌കോർ നേടാനാകാതെ കെയർമാരായി ജോലി ചെയ്യുന്നുണ്ട്. പുതിയ നിയമം പ്രാബല്യത്തിൽ വരുന്നതോടെ ഇതിൽ ബഹുഭൂരിപക്ഷത്തിനും നേഴ്സുമാരായി ജോലി ചെയ്യാനാകും.
ബ്രിട്ടനിലെ നിരവധി എൻ എച്ച് എസ് ട്രസ്റ്റുകൾ കേരളമുൾപ്പെടെ ഇന്ത്യയിലെ നിരവധി നഗരങ്ങളിൽ നിന്ന് നേരിട്ട് ഇന്റർവ്യൂ നടത്തി നേഴ്‌സുമാരെ റിക്രൂട്ട് ചെയ്ത് വരുന്നുണ്ട്. പുതിയ മാറ്റങ്ങൾ ഉണ്ടാകുന്നതോടെ കൂടുതൽ പേർക്ക് തൊഴിലവസരങ്ങൾ ലഭിക്കും . എൻ എച്ച് എസ് ട്രസ്റ്റുകളുടേത് സൗജന്യ റിക്രൂട്ട്മെന്റാണ് .